بيىل 600 گە جۋىق قازاقستاندىق «ۇزدىك ەڭبەك يەسى» اتاعىنا تالاسادى
بيىل «ەڭبەك جولى» رەسپۋبليكالىق بايقاۋىنا 591 ءوتىنىش كەلىپ ءتۇستى. وتباسىلار مەن سالا ماماندارى «ۇزدىك ەڭبەك يەسى» اتاعىن قورعايدى.
بايقاۋ تۋرالى تولىعىراق ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆ ايتىپ بەردى، دەپ حابارلايدى قازاقپارات ءتىلشىسى.
«بيىل كونكۋرسقا بارلىعى 591 ءوتىنىش قابىلداندى. «ۇزدىك ەڭبەك اۋلەتى» نوميناتسياسى بويىنشا 143 ءوتىنىش، «جۇمىس ىستەيتىن جاستاردىڭ ۇزدىك تالىمگەرى» نوميناتسياسى بويىنشا 215 ءوتىنىش، «ءوندىرىستىڭ ۇزدىك جاس مامانى» نوميناتسياسى بويىنشا 233 ءوتىنىش قابىلداندى. كونكۋرستىڭ رەسپۋبليكالىق كەزەڭىنىڭ جەڭىمپازدارىن ەڭبەك مينيسترلىگى جانىنداعى كوميسسيا ايقىندايدى. كوميسسيا قۇرامىنا ق ر پارلامەنتىنىڭ دەپۋتاتتارى، ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرى، «اتامەكەن» ۇ ك پ، «قوعامدىق كەلىسىم» ر م م جانە الەۋمەتتىك قىزمەتشىلەر بار»، - دەدى اقمادي سارباسوۆ ورتالىق كوممۋنيكاتسيالار قىزمەتى الاڭىندا وتكەن بريفينگىدە.
ونىڭ ايتۋىنشا، بايقاۋ ەكى كەزەڭنەن تۇرادى.
«ەڭبەك كۇنى مەرەكەسى قارساڭىندا جىل سايىن «ەڭبەك جولى» رەسپۋبليكالىق كونكۋرسىن وتكىزەمىز. ول ادال ءارى ناتيجەلى ەڭبەكتى ىنتالاندىرۋعا، جاستارعا جۇمىسشى ماماندىقتارىن ناسيحاتتاۋعا جانە ەڭبەكقور اۋلەتتەردىڭ كوپجىلدىق تاجىريبەسىن ناسيحاتتاۋعا باعىتتالعان»، - دەيدى ول.
«ەڭبەك جولى» بايقاۋىنىڭ جەڭىمپازدارى 2023-جىلعى 22- قىركۇيەكتە استانادا ەڭبەك كۇنىنە وراي وتەتىن فورۋم بارىسىندا جاريالانادى. جەڭىمپازدارعا اقشالاي سەرتيفيكاتتار مەن ەستەلىك سىيلىقتار تابىس ەتىلەدى.
ايتا كەتسەك، جىل سايىن قىركۇيەكتىڭ سوڭعى دەمالىسى «ەڭبەك كۇنى» مەرەكەسى رەتىندە اتالىپ وتىلەدى، بيىل اتاۋلى كۇن 24- قىركۇيەككە كەلىپ تۇر.
