بيىل 6 بالا ءوز جاقىندارىنىڭ قولىنان اجال قۇشقان
جىل باسىنان بەرى ەل بويىنشا 25 بالا مەرت بولعان، ونىڭ ىشىندە 6 بالا ءوز جاقىندارىنىڭ قولىنان ءولىپ وتىر، دەپ حابارلايدى Kazinform.
اتالعان پروبلەمانى ق ر بالا قۇقىقتارى جونىندەگى ۋاكىل دينارا زاكيەۆا كوتەردى.
«بۇگىن 7 جاسار قىز قايتىس بولدى. الدىن الا مالىمەت بويىنشا، كۇدىكتى - قىزدىڭ اناسى. وتباسىنىڭ قالعان بالا- شاعاسى بالالاردى قولداۋ ورتالىعىنا ورنالاستىرىلادى. تەرگەۋ بارىسىندا وسىنداي ىستەردىڭ 70 پايىزىنا اينالاسىنداعى ادامدار كۋا بولعانى، ءبارىن كورىپ جۇرگەنى بەلگىلى بولادى. ولار وتباسىنداعى اۋىر جاعدايدى بىلسە دە، ارالاسقىسى كەلمەي نەمەسە قورقىپ ايتپايدى ەكەن. ەگەر بالالارعا قاۋىپ ءتونىپ تۇرعانىنا كۋا بولساڭىزدار، „111“ نەمەسە „102“ نومىرىنە حابارلاسىڭىزدار»، - دەپ جازدى دينارا زاكيەۆا Facebook پاراقشاسىندا.
ونىڭ ايتۋىنشا، پرەزيدەنت تاپسىرماسىمەن بالالاردى قورعاۋ زاڭناماسىنا ەنگىزىلگەن وزگەرىستەردىڭ ماڭىزى زور.
ول جەردە بالا قۇقىعىن قورعاۋدا قىلمىستىق جاۋاپكەرشىلىك قاراستىرىلعان. زاڭناماعا باس-اياعى 109 وزگەرىس ەنگىزىلگەن.
«سونىمەن قاتار ۇكىمەتتىك ەمەس ۇيىمدارمەن بىرلەسىپ الەۋمەتتىك زەرتحانا اشتىق. كەلەسى ماسەلە-كادر كەرەك. زاڭ قابىلدانعان سوڭ ونىڭ ورىندالۋىن قاداعالاۋىمىز قاجەت. قازىر 6,8 ميلليون بالاعا 303 الەۋمەتتىك قىزمەتكەردەن كەلەدى. دەمەك 1 قىزمەتكەرگە - 22 مىڭ بالا. الەمدىك پراكتيكادا 1 قىزمەتشىگە 5 مىڭنان ارتىق بالا بەرىلمەيدى. بۇل ماسەلەنى ءقازىر وقۋ- اعارتۋ مينيسترلىگىمەن بىرگە قاراستىرىپ جاتىرمىز. ەرتەڭ-حالىقارالىق بالا كۇنى. وسىعان وراي 111 جەدەل جەلىسى تۋرالى اقپاراتتى بارىنشا تاراتۋدى سۇرايمىن»،-دەيدى ول.
