بيىل 32 پەدوفيلگە حيميالىق كاستراتسيا جاسالعان
حيميالىق كاستراتسيا - ءبىر رەتتىك پروتسەدۋرا ەمەس، ودان بولەك كاستراتسيا جاساۋعا قارسى كورسەتىلىمدەر بولۋى مۇمكىن. دەنساۋلىق ساقتاۋ مينيسترلىگى ءمان-جايدى ءتۇسىندىردى، دەپ حابارلايدى Kazinform.
«وتكەن جىلى 30 پەدوفيلگە حيميالىق كاستراتسيا جاسالدى. ال بيىل قىركۇيەك ايىنىڭ سوڭىندا 32 ادام حيميالىق كاستراتسيادان ءوتتى. حيميالىق كاستراتسيا - ءبىر رەتتىك پروتسەدۋرا ەمەس. پروتسەدۋرا سوت شەشىمىمەن تاعايىندالادى جانە پاتسيەنتكە تەستوستەرون دەڭگەيىن تومەندەتۋ ءۇشىن ۇزاق ۋاقىت انتياندروگەندى پرەپارات سالىنادى»، - دەلىنگەن دەنساۋلىق ساقتاۋ مينيسترلىگىنىڭ Kazinform اگەنتتىگىنە بەرگەن مالىمەتىندە.
سونىمەن قاتار مينيسترلىكتەن پەدوفيلگە مەديتسينالىق تۇرعىدان قارسى كورسەتىلىم بولعان جاعدايدا قانداي شارا قولدانىلاتىنى تۋرالى تۇسىنىك بەرىلدى.
«حيميالىق كاستراتسيا تۇرىندەگى ماجبۇرلەپ ەمدەۋ - تەستوستەرون سينتەزىن تومەندەتۋ جانە رەتسەپتورلاردى بلوكتاۋ ارقىلى جىنىستىق قۇمارلىقتى تومەندەتەتىن انتياندروگەندى پرەپاراتتى قابىلداۋ عانا ەمەس. سونىمەن قاتار پسيحياتر دارىگەر وعان جىنىستىق-رولدىك سايكەستىكتى قالىپتاستىرۋ، جاڭا جىنىستىق مىنەز-قۇلىق پەن پەدوفيلدى الماستىراتىن جىنىستىق ارتىقشىلىقتى دامىتۋ جانە جۇزەگە اسىرۋ ماقساتىندا پسيحوتەراپيالىق كومەك كورسەتىپ، قاداعالايدى. وسىلايشا انتياندروگەندى پرەپاراتتى قولدانۋعا قارسى كورسەتىلىم بولعان جاعدايدا ول ۇنەمى پسيحياتر دارىگەر باقىلاۋىندا بولىپ، پسيحوتەراپيالىق ەم الادى»، - دەيدى ۆەدومستۆودان.
