بيىل 13 ميلليون شارشى مەتردەن استام تۇرعىن ءۇي سالىندى
قازىرگى تاڭدا قازاقستاندا ينفراقۇرىلىمدى جاڭعىرتۋ جانە وڭىرلەردى دامىتۋ بويىنشا اۋقىمدى جۇمىستار ءجۇرىپ جاتىر، دەپ حابارلايدى Kazinform.
ۇكىمەتتىڭ رەسمي سايتى بۇل تۇرعىن ءۇي قۇرىلىسى، ت ك ش جەلىلەرىن جاڭارتۋ، رەسپۋبليكانىڭ كولىك-لوگيستيكالىق الەۋەتىن نىعايتۋ جانە جاڭا وندىرىستىك كاسىپورىنداردى ىسكە قوسۋعا قاتىستى ەكەنىن جازدى.
بۇل باعىتتاردىڭ بارلىعى ق ر پرەزيدەنتى قاسىم-جومارت توقايەۆتىڭ «ادىلەتتى قازاقستان: ءبارىمىز جانە ءارقايسىمىز ءۇشىن. قازىر جانە ءاردايىم» سايلاۋالدى باعدارلاماسىندا بەلگىلەنگەن.
«2029 -جىلعا قاراي 1 ميلليوننان استام وتباسىن جاڭا باسپانامەن قامتاماسىز ەتۋ بويىنشا بەلسەندى جۇمىس جالعاسۋدا. ماسەلەن، 2023 -جىلعى 10 ايدا 13 ميلليون شارشى مەتردەن استام تۇرعىن ءۇي سالىندى.
2023 -جىلى وڭىرلەردە ينجەنەرلىك- كوممۋنيكاتسيالىق ينفراقۇرىلىم نىساندارىن سالۋعا 5,4 ميلليارد تەڭگە ءبولىندى.
«قولجەتىمدى ينتەرنەت» ۇلتتىق جوباسى بەكىتىلدى»، - دەلىنگەن اقپارات كوزىندە.
سونىمەن قاتار ق ر كولىك- لوگيستيكالىق الەۋەتىن دامىتۋدىڭ 2030 -جىلعا دەيىنگى تۇجىرىمداماسى بەكىتىلدى. اتاپ ايتقاندا، قازاقستاننىڭ ترانزيتتىك الەۋەتىن ەداۋىر ارتتىراتىن ءبىرقاتار ءىرى تەمىرجول جوباسىن ىسكە اسىرۋ باستالدى.
«بارلىعى ءۇش جىل ىشىندە 1 300 شاقىرىمنان استام تەمىرجول سالىنادى. وعان قوسا 2030 -جىلعا دەيىن 11 مىڭ شاقىرىم ت/ج جوندەۋ جۇمىستارىمەن قامتۋ جوسپارلانىپ وتىر.
سوڭعى كەزدەرى جۇك تاسىمالىنىڭ كولەمى 2 ەسە ارتقان ترانسكاسپيي حالىقارالىق كولىك باعىتىن دامىتۋعا ءبىرقاتار ەۋروپالىق كولىك-لوگيستيكالىق كومپانيانى تارتۋ بويىنشا جۇمىستار ءجۇرىپ جاتىر.
قورلاردى ۇلعايتۋ جانە وڭىرلەردى گازداندىرۋ جۇمىسىن ودان ءارى جالعاستىرۋ ءۇشىن جاڭا گاز وڭدەۋ قۋاتتارىنىڭ قۇرىلىسى جالعاسۋدا»، - دەپ جازدى ۇكىمەتتىڭ رەسمي سايتى.
«QazaqGaz» ۇ ك» ا ق قاشاعان كەن ورنىندا قۋاتى جىلىنا 1 ميلليارد م3 بولاتىن گوز قۇرىلىسىن جۇرگىزىپ جاتىر. سونداي-اق قاشاعان مەن قاراشىعاناقتا جىلىنا 6,5 ميلليارد م3 گاز وڭدەيتىن جاڭا گوز قۇرىلىسى جوبالانۋدا.
