بيىل 10 ايدا مەملەكەتتىك بيۋدجەتكە 15,5 تريلليون تەڭگە كىرىس ءتۇستى
بيىل 10 ايدا مەملەكەتتىك بيۋدجەتكە 15,5 تريلليون تەڭگە كىرىس ءتۇستى. بۇل تۋرالى ۇكىمەت وتىرىسىندا قارجى ۆيتسە- ءمينيسترى داۋرەن تەمىربەكوۆ ايتتى، دەپ حابارلايدى Kazinform.
«مەملەكەتتىك بيۋدجەتكە تۇسكەن كىرىستەردىڭ سوماسى 15,5 تريلليون تەڭگەنى قۇرادى نەمەسە جوسپار 98,3 پايىزعا ورىندالدى. رەسپۋبليكالىق بيۋدجەتكە 10,5 تريلليون تەڭگەگە جۋىق قاراجات ءتۇستى. جوسپار 92,8 پايىزعا، ونىڭ ىشىندە سالىقتار بويىنشا 87,3 پايىزعا اتقارىلدى. سالىقتار بويىنشا جوسپاردىڭ ورىندالماۋى نەگىزىنەن كورپوراتيۆتىك تابىس سالىعى، يمپورتقا سالىناتىن قوسىلعان قۇن سالىعى، شيكى مۇنايعا ەكسپورتتىق كەدەن باجى جانە پايدالى قازبالاردى وندىرۋگە سالىناتىن سالىق ەسەبىنەن قالىپتاستى»، - دەدى ۆيتسە- مينيستر.
ونىڭ اتاپ وتۋىنشە، كورپوراتيۆتىك تابىس سالىعى بويىنشا جوسپاردىڭ ورىندالماۋى 294 ءىرى سالىق تولەۋشى بويىنشا مالىمدەلگەن اۆانستىق تولەمدەر سوماسىنىڭ % 23- كە ازايۋىمەن بايلانىستى بولدى. يمپورتقا سالىناتىن قوسىلعان قۇن سالىعى بويىنشا جوسپاردىڭ ورىندالماۋى تاۋارلاردىڭ جەكەلەگەن توپتارى بويىنشا يمپورت كولەمىنىڭ تومەندەۋى، ەۋرازيالىق ەكونوميكالىق وداق ەلدەرىنەن يمپورت كولەمىنىڭ 8 پايىزعا ازايۋى ەسەبىنەن ورىن الدى.
«شيكى مۇنايعا ەكسپورتتىق كەدەن باجى بويىنشا جوسپاردىڭ نەگىزگى ورىندالماۋى ەكسپورتتىق كەدەن باجىنىڭ ناقتى قالىپتاسقان مولشەرلەمەسىنىڭ بولجامدى كورسەتكىشتەن 9 پايىزعا تومەندەۋىمەن بايلانىستى بولدى. پايدالى قازبالاردى وندىرۋگە سالىناتىن سالىق بويىنشا جوسپاردىڭ ورىندالماۋىنا نەگىزگى ەكسپورتتىق تاۋارلار باعاسىنىڭ ورتاشا ەسەپپەن 12 پايىز تومەندەۋى اسەر ەتتى. سالىقتىق ەمەس تۇسىمدەر بويىنشا اسىرا ورىنداۋ اكسيالاردىڭ مەملەكەتتىك پاكەتىنە ديۆيدەندتەر ەسەبىنەن قالىپتاستى»، - دەدى ول.
ۆيتسە- مينيستر جەرگىلىكتى بيۋدجەتتەردىڭ كىرىستەرى 111,7 پايىزعا اتقارىلعان جانە 5,1 تريلليون تەڭگەنى قۇراعانىن اتاپ ءوتتى.
«جوسپار 534 ميلليارد تەڭگەگە، ونىڭ ىشىندە سالىقتار بويىنشا 474 ميلليارد تەڭگەگە اسىرا ورىندالدى. الماتى وبلىسىنان باسقا بارلىق وڭىرلەردە كىرىستەر بويىنشا جوسپارلار اسىرا ورىندالىپ وتىر»، - دەدى داۋرەن تەمىربەكوۆ.
اۆتور
مارلان جيەمباي
