بيتكوين باعاسى 106 مىڭ دوللاردان اسىپ ءتۇستى
استانا. KAZINFORM - بيتكوين تاعى دا قۇن رەكوردىن جاڭارتىپ، 106 مىڭ دوللار شەگىنەن اسىپ ءتۇستى، دەپ حابارلايدى Kazinform اگەنتتىگىنىڭ ءتىلشىسى.
Binance كريپتوبيرجاسىنىڭ مالىمەتىنشە، 16 - جەلتوقسانعا قاراعان ءتۇنى ماسكەۋ ۋاقىتىمەن ساعات 03:40 تا باعام بىرلىك ءۇشىن 106,6 مىڭ دوللارعا جەتتى. الايدا ساعات 04:22 گە قاراي باعا قايتادان كوتەرىلە باستاعانعا دەيىن 105,4 مىڭ دوللارعا دەيىن تومەندەدى. ءبىر تاۋلىك ىشىندە كريپتوۆاليۋتا قۇنى % 3,5 دان استامعا ءوستى.
بيتكويننىڭ ءوسۋى 5 - قاراشادا ا ق ش پرەزيدەنتىنىڭ سايلاۋ كۇنىمەن تۇسپا- تۇس كەلدى. ول كەزدە باعا $68 مىڭ بولدى، سودان بەرى كريپتوۆاليۋتا ءوزىنىڭ تاريحي ماكسيمۋمدارىن بىرنەشە رەت جاڭارتتى.
TradingView مالىمەتىنشە، سوڭعى 24 ساعاتتا كريپتوۆاليۋتالاردىڭ جالپى كاپيتاليزاتسياسى %0,69 عا ءوسىپ، 3,641 تريلليون دوللارعا جەتتى. بيتكوين 2,08 تريلليون دوللاردى نەمەسە جالپى نارىق قۇنىنىڭ %57 دان ءسال استامىن قۇراپ وتىر.
بيتكوين باعاسىنىڭ ءوسۋى باسقا جەتەكشى كريپتوۆاليۋتالاردىڭ ءوسۋىن ىنتالاندىرىپ وتىر. مىسالى، Ethereum 1,15%- عا قىمباتتادى، ونىڭ قۇنى ءبىر بىرلىك ءۇشىن 4 مىڭ دوللارعا جەتتى.
ساراپشىلار نارىقتىڭ اعىمداعى ديناميكاسىن ينۆەستورلاردىڭ ارتىپ جاتقان قىزىعۋشىلىعىمەن جانە ينۆەستيتسيالىق قۇرال رەتىندە كريپتوۆاليۋتالاردىڭ تارتىمدىلىعىن ارتتىراتىن ماكروەكونوميكالىق فاكتورلارمەن بايلانىستىرىپ وتىر.
وسىعان دەيىن اقشا ايىرباستاۋ ورىندارىندا دوللار 522 - 529 تەڭگەدەن ساۋدالانىپ جاتقانىن جازدىق.
