بىرىككەن اراب امىرلىگى قازاقستاندا جاڭا قالا سالادى
استانا. قازاقپارات - ەكونوميكانى ءارتاراپتاندىرۋ - كەزەك كۇتتىرمەيتىن ماڭىزدى مىندەت. مەملەكەت باسشىسى مۇنايعا بايلانباي، ەلدە شيكىزاتتىق ەمەس سالالاردىڭ تىنىسىن اشۋدى تاپسىردى.
سونىڭ ناتيجەسىندە 6 جىلدا وڭدەۋ ونەركاسىبى %31,4- كە، قۇرىلىس %96,3- كە ۇلعايدى. بۇعان اسىرەسە شەتەلدىك ينۆەستورلاردىڭ قىزىعىپ وتىرعانىن ايتا كەتۋ كەرەك. بىلتىر ولار ءبىزدىڭ ەلگە قارجى سالىپ، ءىرى جوبالارعا باستاماشىل بولدى. ال ساراپشىلار الداعى 3 جىلدا ينۆەستيتسيالىق كليمات بۇدان دا جاقسارا تۇسەتىنىن ايتتى.
ب ا ءا قازاقستاندا جاڭا قالا سالادى. «ەكوسيتي» دەپ اتالاتىن جوبانى شەتەلدىك كومپانيالار توبى اقتاۋدا جۇزەگە اسىرماق. تارتىلاتىن ينۆەستيتسيا كولەمى 4,5 ميلليارد دوللار. جۋىردا قوس تاراپ كەزدەسىپ، ءتيىستى كەلىسىمگە قول قويدى. ساباقتى ينە ساتىمەن بولسا، كوپ ۇزاماي كاسپي جاعالاۋىندا ەكولوگيالىق تازا، سمارت شاھار بوي كوتەرەدى.
الىبەك المابەكوۆ، قازاقستان- ب ا ءا ىسكەرلىك كەڭەسىنىڭ تەڭ ءتوراعاسى:
- مەملەكەت باسشىسى «جاڭا اقتاۋ» جوباسىن جۇزەگە اسىرۋدىڭ ماڭىزدىلىعىن اتاپ وتكەن ەدى. بۇل قالا زاماناۋي قالا بولادى، ەلەكتركار جۇرەدى. 60 مىڭ اعاش وتىرعىزىلادى. گولف كلۋب، ۇلكەن اكۆاپارك سالادى. بۇل ماقساتتاردى ورىنداۋ ءۇشىن ەۋروپالىق كونسالتينگتىك كومپانيالاردى تارتۋعا، جاڭا تەحنولوگيالاردى دامىتۋعا، اقتاۋدى كوركەيتۋگە ۇلەس قوسقىسى كەلىپ وتىر.
بۇل ەل دامۋىنا سەرپىن بەرەر كەلەلى جوبالاردىڭ ءبىر پاراسى عانا. بىلتىر شەتەلدىك كاسىپكەرلەردىڭ قارجىسىنا ەلدە 45 جوبا جۇزەگە اسىرىلعان. ىلكىمدى ءىستىڭ ناتيجەسىندە ەكونوميكانىڭ تىنىسى كەڭەيىپ، جاڭادان 6 مىڭعا تارتا جۇمىس ورنى قۇرىلدى. سونىمەن قاتار مەكتەپ، جول سەكىلدى الەۋمەتتىك نىسانداردىڭ قۇرىلىسى باستالىپ، ينفراقۇرىلىمدى جەتىلدىرۋگە جاعداي تۋدى. ال الداعى 3 جىلدا ءىرى كومپانيالار قۇنى 10 ميلليارد دوللاردان اساتىن ينۆەست باستامالارعا قارجى قۇيايۋى مۇمكىن. قازىر ولاردىڭ بىرقاتارىمەن كەلىسسوزدەر باستالدى.
يسا قۇدابەكوۆ، «Kazakh Invest» ۇ ك» جوبالار دەپارتامەنتى ديرەكتورىنىڭ ورىنباسارى:
- كەيبىرى ءبىزدىڭ ەل ءۇشىن تىڭ جوبا بولماق. ماسەلەن، اۆستريالىق «لاسالزبەرگ» كومپانياسى قازاقستاندا كەراميكالىق پليتا ءوندىرىسىن قولعا الۋدى كوزدەپ وتىر. ولار 54 ميلليون دوللار شاماسىندا قارجى قۇيۋعا نيەتتى. بۇل ءبىزدىڭ ستراتەگيالىق ماڭىزعا يە ءارى يمپورتقا تاۋەلدىلىكتەن ارىلۋعا مۇمكىندىك بەرەتىن بىردەن ءبىر جوبا دەپ ەسەپتەيمىز.
ساراپشىلار قازاقستاننىڭ ينۆەستيتسيالىق الەۋەتى زور ەكەنىن ايتادى. بۇعان حالىقارالىق رەيتينگتەگى كورسەتكىشتەر دالەل. بىلتىر ەلىمىز Moody's اگەنتتىگىنىڭ جوعارى باعاسىنا يە بولدى. قازاقستاندى قارجىلىق تۇراقتى مەملەكەتتەر قاتارىنا ەنگىزدى.
