بۇگىن قازاقستاننىڭ 122 ازاماتى مەن ولاردىڭ وتباسى مۇشەلەرى گازا سەكتورىنان ەۆاكۋاتسيالانادى
بۇگىن، 14-قاراشا كۇنى قازاقستاندىقتار مەن ولاردىڭ وتباسى مۇشەلەرى گازا سەكتورىنان مىسىر مەن پالەستينا انكلاۆىنىڭ شەكاراسىنداعى رافاح باقىلاۋ- وتكىزۋ پۋنكتى ارقىلى ەۆاكۋاتسيالانادى.
kazinform اگەنتتىگىنىڭ ءتىلشىسى بۇل تۋرالى گازا سەكتورىنىڭ شەكارا وتكەلدەرى باس باسقارماسىنا سىلتەمە جاساپ حابارلايدى.
14-قاراشاعا قاراعان ءتۇنى گازا سەكتورىنان مىسىر باعىتىندا رافاح باقىلاۋ- وتكىزۋ بەكەتىنەن وتۋگە رۇقسات ەتىلگەن شەتەلدىك ازاماتتاردىڭ ءتىزىمى جاريالاندى، ولاردىڭ اراسىندا «قازاقستان» دەگەن باعاندا قازاقستان مەن پالەستينا ازاماتتىعىن العان 122 ادام بار.
اتاپ وتىلگەندەي، تىزىمدە كورسەتىلگەن ازاماتتار ءتيىستى راسىمدەردەن ءوتۋى ءۇشىن جەرگىلىكتى ۋاقىت بويىنشا تاڭعى ساعات 7:00 دە (استانا ۋاقىتىمەن ساعات 10:00) «رافاح» باقىلاۋ- وتكىزۋ بەكەتىنىڭ سىرتقى وتكەل زالىندا بولۋى ءتيىس.
قازاقستان ازاماتتارىمەن بىرگە 14-قاراشادا گازا سەكتورىنان سولتۇستىك ماكەدونيا، فينليانديا، يوردانيا، ۇلىبريتانيا، يسپانيا، رۋمىنيا، گەرمانيا، رەسەي، شۆەتسيا، ا ق ش جانە دانيا ازاماتتارى شىعادى. سونداي- اق پالەستينا انكلاۆىنان جەكە ءتىزىم ۇسىنعان مىسىردىڭ 159 ازاماتى شىعا الادى.
قازىرگى ۋاقىتتا ق ر سىرتقى ىستەر مينيسترلىگى مەن ق ر مىسىرداعى ەلشىلىگى ازاماتتارىمىزدى ەۆاكۋاتسيالاۋعا كومەك كورسەتۋدى ۇيىمداستىرۋ بويىنشا قاجەتتى شارالار قابىلداۋدا.
ءبىر كۇن بۇرىن سىرتقى ىستەر مينيسترلىگىنىڭ رەسمي وكىلى ايبەك سمادياروۆ 44 ادامنان تۇراتىن قازاقستان ازاماتتارىنىڭ ءبىرىنشى توبىن ەۆاكۋاتسيالاۋ جوسپارلانىپ وتىرعانىن، ولار قۇرلىقپەن كايرگە جەتكىزىلەتىنىن، قاجەتتى قۇجاتتارى تەكسەرىلگەننەن كەيىن قازاقستانعا جونەلتىلەتىنىن حابارلادى.
10-قاراشادا ق ر سىرتقى ىستەر ءمينيسترى مۇرات نۇرتىلەۋ مەن يزرايل سىرتقى ىستەر مينيسترلىگىنىڭ باسشىسى ەلي كوەن تەلەفون ارقىلى سويلەستى. اڭگىمەلەسۋ بارىسىندا م. نۇرتىلەۋ يزرايلدىك ارىپتەسىنە گازا سەكتورىنداعى قازاقستان ازاماتتارىن ەۆاكۋاتسيالاۋعا جاردەمدەسۋدى سۇرادى. بۇعان جاۋاپ رەتىندە ە. كوەن يزرايلدىك تاراپ ق ر ازاماتتارىن ەۆاكۋاتسيالاۋ ماسەلەسىن شەشۋگە بار كۇش- جىگەرىن سالاتىنىن جەتكىزدى.
بۇعان دەيىن ق ر سىرتقى ىستەر مينيسترلىگى گازا سەكتورىندا 76 قازاقستاندىق جانە وتباسى مۇشەلەرىمەن بىرگە ولاردىڭ سانى 161 ادام ەكەنىن حابارلاعان.
10-قاراشادا يزرايل مەن پالەستينالىق حاماس توبى اراسىنداعى سوعىس قيمىلدارى باستالعاننان بەرى باقىلاۋ- وتكىزۋ پۋنكتى ءۇشىنشى رەت جابىلعانى حابارلانعان. اراب ءتىلدى ب ا ق 10-11-قاراشادا شەكارادان ءوتۋ توقتاعانىن جانە ونىڭ گازا سەكتورىنان ەۆاكۋاتسيالانعان ناۋقاستاردى تاسىمالداۋداعى قيىندىقتارعا بايلانىستى بولعانىن جازدى.
