بۇگىن - حالىقارالىق كىتاپ سىيلاۋ كۇنى
استانا. قازاقپارات - بۇل مەرەكە 2012 -جىلدان بەرى اتالىپ كەلەدى جانە پايدا بولۋ تاريحى دا قىزىق. ەممي برودمۋر ەسىمدى قاراپايىم امەريكا ازاماتىنىڭ باستاۋىمەن وسى كۇندى الەۋمەتتىك جەلىدە جان-جاقتى ناسيحاتتاۋدىڭ ارقاسىندا بۇگىندە حالىقارالىق دەڭگەيدە تانىلعان، دەپ حابارلايدى 24kz.
بۇل كۇن كىتاپقا دەگەن سۇرانىستى ارتتىرۋدىڭ كەرەمەت مۇمكىندىگى دەۋگە بولادى. جالپى قازىر كىتاپ وقۋدى جاستار اراسىندا سانگە اينالدىرۋ ءۇردىسى كوپ بايقالادى.
قوعامدا كىتاپ وقۋ مادەنيەتى جىلدان جىلعا دامىپ كەلەدى دەسەك قاتەلەسپەيمىز. قازىر قايدا جۇرسەڭىز دە، كىتاپ وقۋعا مۇمكىندىك كوپ. اسىرەسە، ءىرى قالالاردا جاستاردى كىتاپ وقۋعا باۋليتىن ەرەكشە كونسەپسيالى ورىندار اشىلىپ جاتىر.
يانا كيم، مەيرامحانا اكىمشىسى:
- وسىنداي ورىندى اشۋىمىزدىڭ نەگىزگى ماقساتى - ادامدارعا مادەني جانە رۋحاني دەمالىس سىيلاۋ. ولار وسىندا وتىرىپ، ءتۇرلى جانرداعى كىتاپتاردى وقي الادى. سونىمەن قاتار ادامداردىڭ كىتاپ وقۋعا دەگەن ىنتاسىن كوتەرۋ جانە ونى سانگە اينالدىرۋ ماقساتىندا ءتۇرلى اكسيالار ۇيىمداستىرامىز. مۇندا كەلگەندەر ءوزارا كىتاپ الماسادى. ياعني، ءوزىڭ وقىعان تۋىندىنى وزگەگە ۇسىنساڭ، ول دا ساعان كىتاپ بەرەدى. نەمەسە ارتىق كىتاپتى وسىندا قالدىرساڭ، تەگىن كوفە ىشە الاسىز.
قازىر مۇنداعى سورەلەردە 2 مىڭنان استام كىتاپ جينالعان. مۇنداي ورىندارعا، اسىرەسە، جاستار ءۇيىر.
بەكسۇلتان ابۋوۆ، استانا قالاسىنىڭ تۇرعىنى:
- ماعان وسى كىتابى بار ورىندار وتە قاتتى ۇنايدى. ءبىزدىڭ استانادا بۇل قارقىندى تۇردە دامىپ كەلە جاتىر. سەبەبى مەن ءوزىم كوپ ۋاقىتىمدى كوفەينيالاردا وتكىزەمىن. كوفەينياعا كىرگەن كەزدە بىردەن وسىنداي كىتاپتار كوزىمە تۇسەدى. تۇراقتى كەلۋشىلەرگە جاڭا كىتاپ سىيلاۋ دا داستۇرگە اينالعان. ال كىتاپسۇيەر قاۋىم ءۇشىن ودان اسقان سىيلىق جوق ەكەنى بەلگىلى.
اقەركە نۇرلان قىزى، استانا قالاسىنىڭ تۇرعىنى:
- كىتاپ بەرگەندى، كىتاپ العاندى مەن وتە قاتتى جاقسى كورەمىن. سىيلىقتىڭ كوكەسى دەپ ايتار ەدىم، وسى كىتاپ الۋدى. كوپتەگەن كىسىگە مەن نەگىزىندە سىيلىقتى كىتاپ رەتىندە بەرگەندى ءجون كورەمىن. حالىقارالىق كىتاپ سىيلاۋ كۇنى رەسمي مەرەكەلەر قاتارىنا ەنگەنىنە كوپ ۋاقىت وتپەسە دە، كوپشىلىك اراسىندا تانىمال بوپ بارادى جانە ءبىز كىتاپ ەڭ باعالى سىيلىق دەگەن قورىتىندىعا كەلدىك. وسى اتاۋلى كۇندى پايدالانىپ، مەن دە ءوزىمنىڭ جەكە كىتاپحانامنان ارىپتەسىمە كىتاپ سىيلاعىم كەلىپ تۇر.
