بۇگىن 9 وبلىستا ۇسىك ءجۇرۋى مۇمكىن - قازگيدرومەت
استانا. KAZINFORM — «قازگيدرومەت» ر م ك ەل اۋماعىندا 17- ساۋىردە بولاتىن قاۋىپتى مەتەورولوگيالىق قۇبىلىستارعا بولجام جاسادى.
دەرەككە قاراعاندا، كەزەكتى سولتۇستىك-باتىس سيكلونى مەن ونىمەن بايلانىسقان اتموسفەرالىق فرونتالدى بولىكتەر قازاقستاننىڭ باسىم بولىگىندە تۇراقسىز اۋا رايىن قالىپتاستىراتىن بولادى.
- جاڭبىر مەن قار تۇرىندە جاۋىن-شاشىن جاۋادى. تەك ق ر باتىسى مەن ورتالىعىنا انتيسيكلون جوتاسى اسەر ەتەتىن بولادى - جاۋىن-شاشىنسىز اۋا-رايى بولجانادى. رەسپۋبليكا بويىنشا جەلدىڭ كۇشەيۋى، وڭتۇستىكتە شاڭدى داۋىل مەن تۇمان كۇتىلەدى، - دەلىنگەن اقپاراتتا.
تۇندە اقمولا وبلىسىنىڭ سولتۇستىك-باتىسىندا، اقتوبە وبلىسىنىڭ سولتۇستىگىندە، قوستاناي وبلىسىنىڭ باتىسى مەن شىعىسىندا، سولتۇستىك قازاقستان وبلىسىنىڭ باتىسى مەن سولتۇستىگىندە، قاراعاندى، شىعىس قازاقستان وبلىستارىنىڭ سولتۇستىگى مەن شىعىسىندا، الماتى وبلىسىنىڭ شىعىسى مەن تاۋ بوكتەرى اۋداندارىندا، جەتىسۋ وبلىسىنىڭ سولتۇستىگى مەن ورتالىعىندا، جامبىل وبلىسىنىڭ وڭتۇستىگىندە توپىراق بەتىندە 1-3 گرادۋس ۇسىك جۇرەدى.
كەشە دە ءبىرقاتار ايماقتا ۇسىك ءجۇرىپ، بۇرشاق جاۋدى.
