بۇگىن 10 رەسپۋبليكالىق ارنانىڭ تىكەلەي ەفيرىندە جالپى ۇلتتىق تەلەمارافون وتەدى
استانا. KAZINFORM - بۇگىن ساعات 17:00 - 22:00 ارالىعىندا 10 رەسپۋبليكالىق ارنانىڭ تىكەلەي ەفيرىندە «ءبىز بىرگەمىز» جالپىۇلتتىق تەلەمارافونى وتەدى. مۇنداي مارافون ەلىمىزدە العاش رەت ۇيىمداستىرىلىپ وتىر.
تەلەمارافوننىڭ باستى كەيىپكەرلەرى - تابيعي اپات كەزەڭىندە باتىلدىق تانىتىپ، ءوز ءومىرى مەن دەنساۋلىعىن قاۋىپ-قاتەرگە تىگە وتىرىپ قىزمەتى مەن ازاماتتىق بورىشىن ابىرويمەن اتقارعان قازاقستاندىقتار. ولاردىڭ قاتارىندا قۇتقارۋشىلار، مەديتسينا قىزمەتكەرلەرى، اسكەري قىزمەتشىلەر، ەرىكتىلەر، كاسىپكەرلەر مەن سىن ساعاتتا جۇدىرىقتاي جۇمىلىپ، ىنتىماق پەن بىرلىكتىڭ ۇلگىسىن تانىتقان ەل تۇرعىندارى بار.
«Jibek Joly» «Qazaqstan»، «حابار»، «ەۋرازيا»، «ك ت ك»، «31 ارنا»، «Atameken Business» ،«Astana TV»
، «7 ارنا» جانە «Almaty TV» تەلەارنالارىنىڭ 5 ساعاتتىق تىكەلەي ەفيرىندە تاسقىن باسقان اۋماقتى كوزبەن كورگەن، تابيعي اپاتتان زارداپ شەككەن تۇرعىنداردىڭ جان تەبىرەنتەر وقيعالارى ايتىلىپ، تابيعي اپات ايماقتارىنان رەپورتاجدار بەرىلەدى.
شارانىڭ ونلاين ترانسلياتسياسى Jibek Joly ەفيرىندە، سونداي-اق YouTube جەلىسىندە جانە Kazinform اگەنتتىگى سايتىندا جۇرگىزىلەدى.
اۆتور
گۇلنۇر عازيز قىزى
