بىلتىر وتاندىق كينو ءوندىرىسى 58 پايىزعا ارتتى
استانا. KAZINFORM - ۇكىمەت باسشىسى ولجاس بەكتەنوۆ كينو سالاسىن دامىتۋدا تابىس تابۋدى ماقسات ەتپەۋ كەرەكتىگىن ايتتى.
- قازاقستاندىق كينو ءوندىرىسى بىلتىر%58 عا ءوستى. كاسسالىق تابىسى ەڭ جوعارى 10 فيلمنىڭ اراسىندا ءاربىر ەكىنشى تاسپا وتاندىق ءوندىرىستىڭ تۋىندىسى بولدى. شەتەلدىك جانە وتاندىق كارتينالاردان تۇسەتىن الىم شامامەن تەڭەستى. بۇل كورەرمەندەردىڭ ۇلتتىق كونتەنتكە دەگەن قىزىعۋشىلىعىنىڭ ارتىپ كەلە جاتقانىن بىلدىرەدى. سوندىقتان دا قۇرىلتايدا مەملەكەت باسشىسى ءتۇسىرىلىپ جاتقان فيلمدەر مەن سەريالدارعا ەرەكشە ءمان بەرۋدى تاپسىردى، - دەدى ولجاس بەكتەنوۆ ۇكىمەت وتىرىسىندا.
وسى ورايدا پرەمەر-مينيستر جوبالاردىڭ سانىن كوبەيتىپ، تەك پايدا ءتۇسىرۋدى عانا ماقسات ەتپەي، فيلمدەردىڭ ساپاسىنا باسا نازار اۋدارۋ كەرەكتىگىن باسا ايتتى.
ايتا كەتەيىك، بيىل بالالارعا ارنالعان 5 الەمدىك كينوتۋىندى قازاقشا كورسەتىلەدى.
