بيلەت قۇنى 18 مىڭ تەڭگە. قازاقستاندا تۋريستىك اۋە مارشرۋتتارىن سۋبسيديالاۋ جالعاسادى
استانا. KAZINFORM - قازاقستاندا الەۋمەتتىك ماڭىزى بار جانە تۋريستىك اۋە مارشرۋتتارىن سۋبسيديالاۋ جالعاسادى. وسىلايشا، حالىققا قولجەتىمدى اۋە قاتىناسى ۇيىمداستىرىلماق.
بۇعان دەيىن كاتونقاراعاي، زايسان جانە كەندىرلى كۋرورتتىق ايماقتارىندا وڭىرلىك شاعىن اۆياتسياعا ارنالعان جاڭا اۋەجايلار سالىناتىنى حابارلانعان ەدى.
ءۇش اۋەجايداعى ۇشۋ- قونۋ جولاعىنىڭ پارامەترلەرى - 2 200×35 م، جوبالاردىڭ جالپى قۇنى - 117,7 ميلليارد تەڭگە. بۇل اۋەجايلاردا ATR-72, Q-400 Bombardier سياقتى 74 ورىنعا دەيىنگى وڭىرلىك ۇشاقتاردى پايدالانۋ جوسپارلانۋدا. اتالعان ۇشاقتار ونەركاسىپتى دامىتۋ قورىنىڭ مەحانيزمدەرى ارقىلى ساتىپ الىنادى.
باستى مىندەت - الماتى، استانا جانە باسقا ءدا ىرى قالالاردان وسى اۋەجايلارعا تىكەلەي، حالىققا قولجەتىمدى اۋە قاتىناسىن ۇيىمداستىرۋ.
- جىل سايىن 26 الەۋمەتتىك ماڭىزى بار اۋە باعىتىن سۋبسيديالاۋ ارقىلى كولىك قاتىناسىنىڭ قولجەتىمدىلىگى ارتۋدا. اسىرەسە ءۇشارال، ءۇرجار، تۇركىستان، اقتاۋ، كوكشەتاۋ، بالقاش سياقتى تۋريستىك باعىتتارعا ەرەكشە نازار اۋدارىلادى. ءۇشارال، ءۇرجار جانە بالقاش اۋەجايلارىنداعى شاعىن اۆياتسيا تەرمينالدارى مەن اەرودرومدارىن جوندەۋ جۇمىستارى اياقتالدى، - دەدى ت. لاستايەۆ ۇكىمەتتىڭ بۇگىنگى وتىرىسىندا.
سپيكەردىڭ ايتۋىنشا، بيلەتتەردىڭ ورتاشا قۇنى 18 مىڭ تەڭگە بولاتىن 12 تۋريستىك اۋە باعىتىن سۋبسيديالاۋ جالعاسادى.
سونداي-اق، بىلتىر 10 اۋەجايدا قۇرىلىس جانە جوندەۋ جۇمىستارى جۇرگىزىلگەن. 350 ميلليارد تەڭگە جەكە ينۆەستيتسيا تارتۋ ەسەبىنەن الماتى، شىمكەنت جانە قىزىلوردا قالالارىندا ءۇش جاڭا جولاۋشىلار تەرمينالى جاڭارتىلدى. بۇل ولاردىڭ وتكىزۋ قابىلەتىن 6,5 ەسەگە ارتتىرۋعا مۇمكىندىك بەردى (جىلىنا 3,5 ميلليوننان 23 ميلليون جولاۋشىعا دەيىن).
بەس اۋەجايدا، ونىڭ ىشىندە استانا، اقتوبە، شىمكەنت، قاراعاندى جانە جەزقازعان اۋەجايلارىندا ۇشۋ- قونۋ جولاقتارىنا جوندەۋ جۇمىستارى جۇرگىزىلدى. اقتاۋ جانە پاۆلودار اۋەجايلارىندا كۇردەلى جوندەۋ جۇمىستارى بيىل اياقتالادى.
ايتا كەتەيىك، وتكەن جىلى قازاقستاندىق اۋە كومپانيالار 15 ميلليونعا جۋىق جولاۋشى تاسىمالداعان.
ال اۋە رەيستەرىنىڭ كەشىگۋىن ازايتۋ ءۇشىن جاڭا ۇشاقتار ساتىپ الۋ جوسپارلانۋدا.
