مەملەكەت باسشىسى قىتايدا «ءبىر بەلدەۋ، ءبىر جول» حالىقارالىق ىنتىماقتاستىعىنىڭ III فورۋمىنىڭ اشىلۋ راسىمىنە قاتىستى
قازاقستان پرەزيدەنتىنىڭ بەيجىڭگە رەسمي ساپارىنىڭ ەكىنشى كۇنى «ءبىر بەلدەۋ، ءبىر جول» حالىقارالىق ىنتىماقتاستىعىنىڭ III فورۋمىنىڭ اشىلۋ راسىمىنە قاتىسۋدان باستالدى، دەپ حابارلايدى Kazinform اقوردانىڭ باسپا ءسوز قىزمەتىنە سىتەمە جاساپ.
مەملەكەت باسشىسى ءداستۇرلى قوناقجايلىعى مەن فورۋمدى ءمىنسىز ۇيىمداستىرعانى ءۇشىن ق ح ر ءتوراعاسى شي جينپيڭگە العىس ايتتى.
قاسىم- جومارت توقايەۆ ءوز سوزىندە قىتايدىڭ جاھاندىق قاۋىپسىزدىكتى قامتاماسىز ەتۋ ىسىندەگى شەشۋشى رولىنە نازار اۋدارىپ، ونى ەكونوميكالىق جانە تەحنولوگيالىق دامۋدىڭ لوكوموتيۆى رەتىندە اتاپ ءوتتى.
«قازىرگى گەوساياسي جاعدايدا «ءبىر بەلدەۋ، ءبىر جول» باستاماسى قاجەتتى حالىقارالىق جوباعا جانە ىنتىماقتاستىقتىڭ ءىرى پلاتفورماسىنا اينالدى. بۇل جوبا قىتايدىڭ ەكونوميكالىق قۋاتىن، سونداي- اق ونىڭ جاھاندىق دەڭگەيدەگى جاڭا بەلەستەردى باعىندىرۋعا ۇمتىلىسىن كورسەتەدى. وسىدان ون جىل بۇرىن ءسىز قازاقستاندا العاش رەت «ءبىر بەلدەۋ، ءبىر جول» ۇزاقمەرزىمدى باستاماسىن ۇسىنىپ، ونىڭ باستى قوزعاۋشى كۇشى بولدىڭىز. مۇنىڭ سيمۆولدىق ءمانى زور. وسى ماڭىزدى مەرەيتويدى اتاپ وتە وتىرىپ، بۇگىندە ءسىزدىڭ باستاماڭىز ءوزىنىڭ قاجەتتىلىگىن كورسەتتى جانە الەمدىك قوعامداستىق تاراپىنان مويىندالىپ، جاھاندىق اۋقىمداعى ۇلكەن جوباعا اينالدى دەپ سەنىمدى تۇردە ايتا الامىز»، - دەدى پرەزيدەنت.
مەملەكەت باسشىسى «ءبىر بەلدەۋ، ءبىر جول» جوباسىنىڭ تەڭدەسسىز ءارى اۋقىمدى حالىقارالىق ىنتىماقتاستىق ءۇشىن پارمەندى پلاتفورماعا اينالعانىنا توقتالدى.
«وسى جوباعا قاتىسۋشى مەملەكەتتەردىڭ باستامالارى ارقاسىندا ازيا، ەۋروپا جانە افريكانىڭ 150-دەن استام ەلى تارام- تارام تەمىرجولدار جەلىسى، جوعارى جىلدامدىقتى كۇرە جولدار جانە تەڭىز جولدارى ارقىلى بايلانىس جاساپ وتىر. بۇل جوبا الەم ەكونوميكاسىنىڭ جىلدام قۇبىلىپ تۇرعان جاعدايىندا قازىرگى زاماننىڭ اسا كۇردەلى سىن- قاتەرلەرىنە ءتيىمدى توتەپ بەرە الاتىن جانە مەملەكەتتەرىمىز ءۇشىن جالپىعا ورتاق يگىلىككە اينالدى»، - دەدى قاسىم- جومارت توقايەۆ.
اۆتور
ەلميرا ورالبايەۆا
