بيشىمبايەۆتىڭ ءىسى بويىنشا سوت تەرگەۋلەرى اياقتالدى

سودان كەيىن سوتتالۋشىلار - قۋاندىق بيشىمبايەۆ پەن باقىتجان بايجانوۆقا قاتىستى ۇكىم جاريالانادى. جارىس ءسوز 29-ساۋىردە باستالادى.

بۇگىنگى سوت وتىرىسى سوڭىندا سۋديا ايىپتالۋشىنىڭ پوزيتسياسىن ناقتىلاۋ ماقساتىندا سۇراق قويدى.

بيشىمبايەۆ ايەلىنە جاسالعان سوققىلار ونىڭ ولىمىنە اكەلگەنىن مويىنداپ، الايدا «اسا قاتىگەزدىكپەن ادام ءولتىرۋ» جانە «ازاپتاۋ» باپتارى بويىنشا كىناسىن مويىندامايتىنىن ايتتى.

ەسكە سالساق، 2023-جىلى 9-قاراشادا استاناداعى «Bau» مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم جەتكەنشە كوز جۇمدى. مۇنان سوڭ ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

وتكەن جىلى 15-قاراشادا وتكەن كەڭەستە مەملەكەت باسشىسى قاسىم-جومارت توقايەۆ ىشكى ىستەر مينيسترىنە ق. بيشىمبايەۆتىڭ ءىسىن ەرەكشە باقىلاۋعا الۋدى تاپسىردى.

بيىل 11-قاڭتاردا ەلوردا سوتى قۋاندىق بيشىمبايەۆتى كۇزەتپەن ۇستاۋ مەرزىمىن 2 ايعا ۇزارتقان ەدى، 26-اقپاندا قۋاندىق بيشىمبايەۆتىڭ ءىسى سوتقا ءتۇستى.

1-ناۋرىزدا قۋاندىق بيشىمبايەۆتىڭ ءىسى بويىنشا الدىن الا تىڭداۋ كۇنى بەلگىلەندى. 11-ناۋرىز كۇنى استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءىس بويىنشا الدىن الا تىڭداۋ ءوتتى. الدىن الا تىڭداۋ 12-ناۋرىزدا جالعاستى.

27-ناۋرىزدا ەلوردانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق. بيشىمبايەۆتىڭ ءىسى بويىنشا القابيلەردى ىرىكتەۋ ءوتتى.

29-ناۋرىزداعى سوت وتىرىسىندا مارقۇم سالتانات نۇكەنوۆانىڭ اعاسى ايتبەك امانگەلدى كۋاگەر رەتىندە جاۋاپ بەرىپ، قۋاندىق بيشىمبايەۆ پەن سالتانات نۇكەنوۆانىڭ اراسىنداعى العاشقى ۇرىس-كەرىستەر قالاي باستالعانى تۋرالى مالىمەتتەر ايتتى جانە مارقۇمنىڭ بەت-الپەتى كوگەرگەن سۋرەت كورسەتتى.

ال، 16-ساۋىردە قۋاندىق بيشىمبايەۆتىڭ ءىسى بويىنشا سوت وتىرىسى ۋاقىتشا توقتاتىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى