بيشىمبايەۆ ىسىنە قاتىستى تەرگەۋ امالدارى جاقىندا اياقتالادى - مينيستر

«بيشىمبايەۆ ءىسى بويىنشا تەرگەۋ امالدارى جالعاسىپ جاتىر. استاناداعى «گاسترو- ورتالىق» ديرەكتورى، ياعني ەكىنشى كۇدىكتى ونىڭ تۋىسى ەكەنىن راستايمىز. قازىر تەرگەۋگە قاتىستى ەشقانداي پروبلەما جوق. جاقىن ارادا تەرگەۋ امالدارىن اياقتايمىز»، - دەدى ە. سادەنوۆ سەناتتىڭ جالپى وتىرىسىنان كەيىن تىلشىلەر سۇراعىنا.

سونىمەن قاتار ول گاسترو- ورتالىقتا قىلمىس جاسالعان كۇنى بەينەكامەرا جازباسىن وشىرگەندەر انىقتالعانىن ايتتى.

«قىلمىستىق پروتسەسس اياسىندا ولاردىڭ ستاتۋسى ناقتىلاندى. وشىرىلگەن بۇكىل بەينەجازبا قالپىنا كەلتىرىلدى. كىنالى ادامدار مەن كۋاگەرلەر انىقتالدى. تەرگەۋ اياقتالعاننان كەيىن بەينەجازبانى وشىرگەن ادامداردىڭ ءبارىنىڭ اتى- ءجونىن جاريالايمىز»، - دەدى مينيستر.

ەسكە سالايىق، بيىلعى 9-قاراشادا استاناداعى باۋ مەيرامحاناسىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ءوزىنىڭ جۇبايىن سوققىعا جىقتى. ايەل جەدەل جاردەم كەلگەنشە كوز جۇمدى.

كەيىن ىشكى ىستەر مينيسترلىگى قۋاندىق بيشىمبايەۆتىڭ ۇستالعانىن راستادى.

ەلوردا پوليتسيا دەپارتامەنتى قر قىلمىستىق كودەكسىنىڭ 99-بابى 1-بولىگى بويىنشا تەرگەۋ امالدارىن باستادى.

11-قاراشادا استانا قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى قۋاندىق بيشىمبايەۆتى 2 ايعا قاماۋعا الۋ شاراسىن سانكتسيالادى.

12-قاراشادا كىسى ءولىمى بولعان «گاسترو- ورتالىق» مەيرامحاناسىنىڭ ديرەكتورى ۇستالدى.

15-قاراشادا وتكەن كەڭەستە پرەزيدەنت ق. توقايەۆ ءى ءى م- گە بيشىمبايەۆتىڭ ءىسىن ەرەكشە باقىلاۋعا الۋدى تاپسىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى