بيشىمبايەۆ ءىسى: كورىپكەلدەن جاۋاپ الىندى

پروكۋرورلار بۇل ءوتىنىشتى قاناعاتتاندىرۋدى سۇرادى. الايدا، جابىرلەنۋشىلەر قولداعان جوق. تاراپتاردىڭ ۇسىنىسىن ساراپتاعان سۋديا ايجان قۇلبايەۆا كۋاگەردىڭ بەت-الپەتىن تۇسىرمەي جانە جەكە دەرەكتەرسىز جاۋاپ الۋ تۋرالى شەشىم قابىلدادى.

كورىپكەل بيشىمبايەۆتى اناسى ارقىلى تانيتىن بولىپ شىقتى. شامامەن 1,5-2 جىل بۇرىن تانىسقان. قۋاندىق بيشىمبايەۆ ارا-تۇرا حابارلاسىپ تۇراتىن كورىنەدى.

9-قاراشا كۇنى بيشىمبايەۆ قوڭىراۋ شالعان كەزدە كورىپكەل «نەگە جەدەل جاردەم شاقىرمايسىڭ؟» دەپ ايتقانىن العا تارتىپ وتىر.

«ول ماعان قوڭىراۋ شالدى. «مەن نە ىستەي الام، جەدەل جاردەم شاقىر، دارىگەرگە كورسەت» دەدىم. ول ماعان قايتا-قايتا قوڭىراۋ شالا بەردى. اقىرى، جاۋاپ بەرمەي قويدىم. ول جازا باستادى. «ونىڭ قالى جاقسى دەپ جازىڭىزشى» دەپ قويماي قويدى»، - دەدى ول.

كورىپكەلدىڭ ايتۋىنشا، ساعات 19:30 دا ول بيشىمبايەۆتىڭ اناسى الميراعا تەلەفون سوققان.

«ءسىزدىڭ ۇلىڭىز بىردەڭە ءبۇلدىردى. ولار قاتتى توبەلەسىپ قالدى، بارىپ ءبىلىڭىز. وندا قورقىنىشتى نارسە بولدى. ول قاتتى جىلاي باستاعان سوڭ مەن تۇتقانى قويا سالدىم»، - دەدى كورىپكەل.

ەكىنشى ايىپتالۋشى باقىتجان بايجانوۆ كورىپكەل وتىرىك ايتىپ تۇرعانىن جەتكىزدى. ول كورىپكەلدىڭ «جەدەل جاردەمگە قوڭىراۋ شال دەپ ايتتىم» دەگەن ءسوزىن جوققا شىعارىپ وتىر.

«مەن بۇل جەردە ءبارىن تىڭداپ وتىرمىن. ءبىرىنشى رەت قوڭىراۋدى ساعات ەكىدە شالعان. ول كەزدە مەن بولعان ەمەسپىن. ساعات 15.51 كەزىندە قوڭىراۋ شالعان كەزدە مەن بيشىمبايەۆتىڭ جانىندا بولدىم، ءبارىن ەستىدىم. ونىڭ جاۋابى ماعان كومەكتەسە مە، جوق پا، بىلمەيمىن، ءبىراق ول شىندىقتى ايتىپ تۇرعان جوق. ول «دارىگەردى، جەدەل جاردەمدى شاقىر» دەمەدى. مەن بيشىمبايەۆتىڭ جانىندا تۇرعانمىن. ءبارىن ەستىپ تۇردىم. ول «ونىڭ ميى شارشاعان، ۇيىقتاپ السىن، ءبىرازدان كەيىن ويانادى، سودان كەيىن ۇيگە قايتاسىڭدار» دەدى»، - دەپ بايجانوۆ ەستىگەنىن ايتىپ بەردى.

ەسكە سالا كەتسەك، بيىل 27-ناۋرىزدا ەلوردانىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق. بيشىمبايەۆتىڭ ءىسى بويىنشا القا بيلەردى ىرىكتەۋ ءوتتى. القا بيلەردى فوتو، ۆيدەوعا تۇسىرۋگە جانە جاريالاۋعا تىيىم سالىنعان.

بۇعان دەيىن حابارلاعانىمىزداي، قۋاندىق بيشىمبايەۆتىڭ ءىسى بويىنشا ونلاين-كورسەتىلىم رەيتينگى كەيبىر سەريالداردان اسىپ ءتۇستى. جوعارعى سوتتىڭ كوممۋنيكاتسيا ءبولىمىنىڭ مەڭگەرۋشىسى پەريزات ءسادۋاقاستىڭ ايتۋىنشا ق. بيشىمبايەۆقا قاتىستى سوت پروتسەسىنە قوعام جوعارى قىزىعۋشىلىق تانىتىپ وتىر. تىكەلەي ەفيرگە 250 مىڭ كورەرمەننىڭ ءبىر مەزگىلدە قوسىلۋى بويىنشا رەكورد تىركەلدى. 25-44 جاس ارالىعىنداعى كورەرمەندەر جالپى كورەرمەن سانىنىڭ %58 قۇراپ وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى