بىشكەكتە ۇستالعان 11 جۋرناليست ەكى ايعا قامالدى
بىشكەك. KAZINFORM - قىرعىزستاندا كەشەدەن بەرى جۋرناليستەردىڭ ءۇيى مەن جۇمىس ورنىن ءتىنتىپ، وزدەرىن ۇستاپ جاتىر. ۇستالعان «Temirov Live»، «ايت ايت دەسە»، «پوليتكلينيكا» جانە «ارچا مەديا» قىزمەتكەرلەرىنە بۇگىن سوت بۇلتارتپاۋ شاراسىن سانكسيالادى، دەپ حابارلايدى 24.kg.
ءبىرىنشى ماي اۋداندىق سوتىنىڭ تەرگەۋ سۋدياسى شەشىم شىعارىپ، 11 ب ا ق وكىلىن ەكى ايعا قامادى. ولار ەل استاناسىنداعى 1№ تەرگەۋ يزولياتورىندا بولادى.
ايتا كەتەيىك، ەكى كۇندە ماحابات تاجىبەك قىزى، ساپار اكۋنبەكوۆ، ازامات يشەنبەكوۆ، سايپيدين سۇلتاناليەۆ، اقتىلەك قاپاروۆ، تىنىستان اسىپبەكوۆ، ماقسات تاجىبەك ۇلى، جوودار بۇزىموۆ، جۇمابەك تۇرداليەۆ، ايكە بەيشەكەيەۆا جانە اقىل وروزبەكوۆ سەكىلدى جۋرناليستەر ۇستالدى.
ءبارى - Temirov Live كومپانياسىنىڭ بۇرىنعى نەمەسە قازىرگى قىزمەتكەرلەرى.
Посмотреть эту публикацию в Instagram
ەستەرىڭىزگە سالا كەتەيىك، 16- قاڭتاردا Temirov Live كەڭسەسىنە ءتىنتۋ جۇرگىزىلىپ، رەداكسيانىڭ قۇرال-جابدىقتارى تاركىلەنگەن ەدى.
پوليتسەيلەر باسىلىمنىڭ قازىرگى جانە بۇرىنعى 11 قىزمەتكەرىن ۇستادى.
ىشكى ىستەر مينيسترلىگى وتكەن جىلى 30- جەلتوقساندا تەمىروۆ Live جانە «ايت ايت دەسەنىڭ» الەۋمەتتىك جەلىدەگى پاراقشالارىنىڭ مازمۇنىنا جۇرگىزىلگەن «سوت-لينگۆيستيكالىق ساراپتاما» قورىتىندىسى بويىنشا ەلدىڭ قىلمىس كودەكسىنىڭ 278-بابى (جاپپاي تارتىپسىزدىككە شاقىرۋ) بويىنشا ءىس قوزعادى.
ماحابات تاجىبەك قىزى مەن ازامات يشەنبەكوۆكە قىلمىستىق كودەكستىڭ 41-بابى 2-بولىگى جانە 278-بابى 3-بولىگى بويىنشا ايىپ تاعىلدى.
بۇل باپ جاپپاي تارتىپسىزدىك ۇيىمداستىرۋعا قاتىسى بار كۇدىكتىلەرگە قولدانىلادى.
