بيۋدجەتكە 135 ميلليارد تەڭگە قايتارىلدى: ءاليحان سمايىلوۆ پرەزيدەنتكە ەسەپ بەردى
استانا. KAZINFORM - مەملەكەت باسشىسى جوعارى اۋديتورلىق پالاتانىڭ ءتوراعاسى ءاليحان سمايىلوۆتى قابىلدادى، دەپ حابارلايدى اقوردانىڭ باسپاءسوز قىزمەتى.
قاسىم-جومارت توقايەۆقا جوعارى اۋديتورلىق پالاتانىڭ بىلتىر اتقارعان قىزمەتىنىڭ قورىتىندىلارى مەن وسى جىلعا ارنالعان جوسپارى جونىندە مالىمەت بەرىلدى.
پرەزيدەنتكە بىلتىر 214 نىساندا قۇنى شامامەن 11 تريلليون تەڭگەنى قۇرايتىن 27 اۋديتورلىق ءىس- شارا وتكىزىلگەنى تۋرالى باياندالدى. سونىڭ ناتيجەسىندە جالپى سوماسى 862 ميلليارد تەڭگە بولاتىن ءتۇرلى نورمالاردىڭ بۇزىلعانى انىقتالدى. تەكسەرىستەردىڭ قورىتىندىسى بويىنشا بيۋدجەتكە 135 ميلليارد تەڭگە قايتارىلدى. بۇل 2023 -جىلى وتەلگەن قارجىدان بەس ەسە ارتىق.
مەملەكەت باسشىسىنا قۇرىلىس نىساندارىنداعى باعا قالىپتاستىرۋ، وڭدەۋ ونەركاسىبى جوبالارىن قارجىلاندىرۋ، اۋىل شارۋاشىلىعىن سۋبسيديالاۋ ىسىندە ولقىلىقتار ۇنەمى بايقالاتىنى ايتىلدى.
جوعارى اۋديتورلىق پالاتا بارلىق انىقتالعان زاڭ بۇزۋشىلىقتى جويۋ ءۇشىن ۇكىمەتكە ۇسىنىم بەرىپ، جاۋاپتى مەملەكەتتىك ورگاندارعا نۇسقاما جولداعان.
ءاليحان سمايىلوۆ بيىل 40 تان استام اۋديتورلىق ءىس- شارا وتكىزۋ جوسپارلانعانىن جەتكىزدى. مەملەكەت باسشىسىنىڭ تاپسىرماسى بويىنشا استانا جانە الماتى قالالارى، سولتۇستىك قازاقستان، قوستاناي جانە جامبىل وبلىستارى، سونداي-اق «سامۇرىق- قازىنا» قورى، «قازاتومونەركاسىپ» ۇلتتىق كومپانياسى، KEGOC كاسىپورىنى، ۇلتتىق بانك، توتەنشە جاعدايلار مينيسترلىگى بيۋدجەتتەرىنىڭ ورىندالۋى تەكسەرىلەدى. سونىمەن قاتار عىلىم، قورعانىس، قۇقىقتىق ءتارتىپتى ساقتاۋ، سپورت، الەۋمەتتىك قامتاماسىز ەتۋ، ورمان شارۋاشىلىعى سالالارىندا اۋديتورلىق تەكسەرىستەر جۇرگىزىلەدى.
كەزدەسۋ سوڭىندا پرەزيدەنت مەملەكەتتىك اۋديت جۇيەسىن جەتىلدىرۋ جونىندەگى جۇمىستى جالعاستىرۋدى تاپسىردى. سونىمەن قاتار بيۋدجەت قارجىسىنىڭ يگەرىلۋىن ءتيىمدى باقىلاۋ ءۇشىن زاماناۋي سيفرلىق شەشىمدەردى ەنگىزۋدىڭ ماڭىزىنا نازار اۋداردى.
وسىعان دەيىن ءاليحان سمايىلوۆ تەكسەرۋ ناتيجەلەرى بويىنشا سۋبسيديا العانداردىڭ 3 مىڭى اگروونەركاسىپ كەشەنىنىڭ سۋبەكتىسى ەمەس ەكەنىن جەتكىزگەن بولاتىن.
