بيبىگۇل تولەگەنوۆا: ديماشتىڭ مەنەن جاسى كىشى بولعانىمەن جولى ۇلكەن
استانا. KAZINFORM - بۇگىن قازاقتىڭ «قارلىعاش كومەي» ءانشىسى بيبىگۇل تولەگەنوۆا 95-جاسقا تولىپ وتىر. مەرەيتوي الدىندا ءانشىنىڭ وزىمەن سۇحبات قۇرۋدىڭ ءساتى تۇسكەن. سونى ىقشامداپ وقىرمان نازارىنا ۇسىنىپ وتىرمىز.
- سۇراعىڭدى قويا جاتارسىڭ. ەڭ اۋەلى مەن حالقىما مىڭ دا ءبىر راحمەتىمدى ايتامىن. ءالى كۇنگە مەن 95 جاسقا كەلسەم دە ءانشى قىزىمىز دەپ باعالايدى. سوعان قاراعاندا حالىقتىڭ سۇيىسپەنشىلىگىن ەشبىر اتاقپەن، ەشبىر اقشامەن ساتىپ الا المايسىڭ.
- وسى جاسقا كەلسەڭىز دە تىنىم كورمەي ەل ارالاپ جۇرگەنىڭىزدى حالىقتىڭ سول قۇرمەتىنە دەگەن ىزەتىڭىز دەسەك بولادى عوي؟
- 17- قاراشادان باستاپ مەرەيتوي كونتسەرتتەرىم ءوتىپ جاتقانىن بىلەسىز. «استانا وپەرانىڭ» باستاماسىن الماتىداعى فيلارمونيا جالعاپ اكەتتى. بارىنە شۇكىر دەپ وتىرمىن. قانشا ايتقانمەن ءقازىر ءوزىم ءان ايتا المايمىن. ءبىراق مۇندا مەنىڭ شاكىرتتەرىم، لاۋرەاتتارىم بار. سولار شىعىپ مەنىڭ رەپەرتۋارىمنان ءان ايتادى.
كەيىنگى كۇندەرى كەستەمىز تىم تىعىز بولىپ كەتتى. 95 جاستاعى كەمپىرگە، ارينە، قيىن. بۇرىن ۇلكەن ادامدار جەر ءۇي كەرەك دەپ وتىرعاندا تۇسىنبەيتىنمىن. ەندى ءتۇسىنىپ جاتىرمىن. كىرىپ- شىعىپ جۇرگىسى كەلەدى ەكەن. مەن كەي كەزدە ۇيدەن جارتى ايلاپ شىقپايمىن. ويتكەنى ومىرتقام ەكى جەردەن سىنىپ، قوس تاياققا، كولياسكاعا ءماجبۇر بولىپ قالدىم. ەندى قايتەسىڭ... ءومىر دەگەن سول. ءبىراق تا وسىنىڭ وزىنە دە اللاعا مىڭ شۇكىر دەپ وتىرامىن.
- تۋعان كۇنىڭىزدى بيىل استانادا قارسى الاسىز با؟
- استانادا كونسەرت وتكىزگەننەن كەيىن بىردەن الماتىعا كەتەمىز. 16-جەلتوقسان - تاۋەلسىزدىك كۇنى. سوندىقتان مەن ۇيدە وتىرامىن. بىلتىر كۇندىزگى ساعات وننان باستاپ تۇنگى ساعات ون بىرگە دەيىن قۇتتىقتاپ كەلۋشىلەر ۇزىلگەن جوق. سوعان قاراعاندا مەن شىنىندا باقىتتى ادام ەكەنمىن عوي دەپ ويلايمىن.
بۇگىن ءبىر توپ بيزنەسمەن جينالىپ اشقان بيبىگۇل تولەگەنوۆا اتىنداعى كرەاتيۆتى مەكتەپكە تاعى باردىم. سول مەكتەپكە ءار بارعان سايىن ءبىر قىزىققا تاپ بولامىن. كەشە قاراسام، اشىلعان ءتورت ايدىڭ ىشىندە ءبىرسىپىرا جۇمىس ىستەلىپتى. وقۋ كابينەتتەرىنەن باستاپ اسحاناسىنا دەيىن ارالاپ شىقتىم. ءتۇرلى حالىقتىڭ تاعامى بەرىلەدى ەكەن. ءبىزدىڭ زامانىمىزدا قالاي بولدى؟ «ءبارى فرونت ءۇشىن» دەپ اش- جالاڭاش ەڭبەك ەتتىك قوي. سول قيىندىقتار تەككە كەتپەگەنىنە تاۋبە دەيمىن.
- ءسىزدىڭ وسىنشا جاسقا كەلىپ تىڭ وتىرعانىڭىزدىڭ، ساناڭىزدىڭ سەرگەك وتىرعانىنىڭ قۇپياسى نەدە؟ بالكىم داۋسىڭىزدى ساقتاۋ ءۇشىن قاتاڭ رەجيم ۇستانعان شىعارسىز؟
- مەن رەجيم ساقتادىم دەپ ماقتانا المايمىن. ءبىراق قازىر جاسىم ۇلعايعاندىقتان رەجيمگە باعىنامىن. مايلى، تۇزدى، جىلى تاماق جەمەيمىن. بالا- شاعانىڭ الدىندا ماسىل بولماي، ءوزىڭ دە قينالماي ءومىر سۇرگەن دۇرىس قوي. جاس كەزىمدە اجەم ايتاتىن «ءيا، اللا تاعالام، ماعان از اۋرۋ، اسا ءتوزىم بەر»، - دەپ وتىراتىن. قازىر ويلاپ وتىرسام، «مەنى الاتىن بولساڭ، قيناماي عانا الىپ كەت. ەشكىمگە ماسىل قىلماي، ءوزىمدى دە قيناماي ال»، - دەگەنى ەكەن عوي. ءبىراق تا، قۇدايعا شۇكىر، قولىمنان كەلگەنشە قوس قولىمدى قۋسىرىپ وتىرمايمىن. ءالى كونسەرۆاتوريادا كونسۋلتانت بولىپ جۇمىس ىستەيمىن. سودان كەيىن ەكى جىلدا ءبىر كونكۋرس وتكىزەمىز. جاڭاعى ايتقان مەكتەپ مەنىڭ اتىمدا بولعاننان كەيىن جاۋاپكەرشىلىكتى سەزىنىپ، تىنىس- تىرشىلىگىن باقىلاپ وتىرۋعا تىرىسامىن. سول مەكتەپتى اشىپ، وعان مەنىڭ اتىمدى بەرىپ جۇرگەن بيزنەسمەن جىگىتتەرگە راحمەت.
درون دەگەندى ەستىگەندە جۇرەگىم سەلك ەتە تۇسەتىن. ويتكەنى ۋكراينا مەن رەسەي ءبىر- بىرىنە درونمەن بومبا تاستاعانىن جاڭالىقتاردان كۇندە وقيمىز عوي. مىنا جەردە سول درونمەن 11-12 جاستاعى بالالار فۋتبول ويناپ وتىر. سولاردى تاماشالاپ جارتى ساعاتتاي وتىرىپ قالىپپىن. ءبىرى قاراعاندىدان، ءبىرى استانانىڭ وزىنەن، تاعى ءبىرى قوستانايدان، ءتورتىنشىسى ورالدان كەلىپتى. مەنىڭ ەكى شوبەرەم دە سوندا وقيدى. سولاردىڭ بالالىق شاعى بىزدىكىنە ۇقساماعانىنا شۇكىر ەتەمىن.
- 95 جاسقا كەلگەندە ومىردەن نە ءتۇيدىڭىز؟ قازىرگى زاماننىڭ بەتالىسىنا كوڭىلىڭىز تولا ما؟ نەگە الاڭدايسىز؟ نەگە سۇيىنەسىز؟
- مەن ساياساتتان الىس اداممىن، مادەنيەت ادامىمىن. وسى 95 جاسقا زاماننىڭ تالاي قۇبىلعانىن، قيىندىقتىڭ ءتۇر-ءتۇرىن كورىپ جەتكەندىكتەن وسى كۇنگە مىڭ دا ءبىر راحمەت دەپ قانا ايتا الامىن.
- وندا سۇراعىمدى مادەنيەتكە جاقىنداتىپ قويايىن. قازىرگى قازاق ءان ونەرىنىڭ بەت الىسى تۋرالى نە ايتاسىز؟ قازاق ساحناسىندا جۇرگەن ءىزباسارلارىڭىز اعا بۋىن سالىپ كەتكەن ونەر جولىن قانشالىقتى لايىقتى جالعاستىرىپ جاتىر دەپ ويلايسىز؟
- مەن، بىرىنشىدەن، ديماش قۇدايبەرگەنگە مىڭ دا ءبىر راحمەت ايتامىن. بۇكىل جەر ءجۇزىن اۋزىنا قاراتقان، قازاق ۇنىنە تەلمىرتكەن ادامعا باس ءيۋىمىز كەرەك. جاس بولسا دا بىزدەن جولى ۇلكەن. ەشبىر ءانشىمىز ءدال ونداي جەتىستىككە جەتىپ كورگەن جوق. ويتكەنى ديماشتىڭ ءوزىنىڭ حاريزماسى بار. ساحناعا شىققاندا وتە ءبىر قۋاتتى ەنەرگياسى بار. ول ايتاتىن اندەردىڭ ءمانىن ءتۇسىنۋ ءۇشىن تابىنۋشىلارى قازاقتىڭ ءتىلىن ۇيرەنىپ جاتىر. سونىڭ ءوزى ۇلكەن دارەجە عوي.
بىردە ماعان ءبىر ءوزىڭ سياقتى ءتىلشى كەلىپ قايرات نۇرتاس دەگەن ءانشى مەن ديماشتىڭ قايسىسى شىن ونەرپاز دەگەن سۇراق قويدى. مەن وعان ديماش ءانشى، ال قايرات سياقتىلار ورىنداۋشى ەكەنىن ايتتىم. جۋرناليست ديماشتى ساناۋلى ادام تىڭدايتىنىن، ال قايرات نۇرتاستىڭ انىنە بۇكىل جاستار بيلەيتىنىن ايتىپ قارسى ءۋاج كەلتىردى. ديماش پەن ەسترادادا جۇرگەن قايراتتاردىڭ اراسى جەر مەن كوكتەي دەدىم. ديماش - كوكتە، قايرات سياقتىلار جەردە.
- 95 جىل عۇمىرىڭىزدا تالاي ۇلى ادامدارمەن دامدەس بولدىڭىز عوي. ونەردىڭ اينالاسىنداعى ۇلى تۇلعالاردىڭ ىشىندە كىمدەر ءسىزدىڭ انشىلىك جولىڭىزعا ءوز ىقپالىن تيگىزدى؟
- ونىڭ ءبارىن جوپەلدەمەدە ەسكە ءتۇسىرۋ قيىن عوي. مىسالى، مەن نۇرعيسانىڭ بىرنەشە ءانىن العاش ساحناعا الىپ شىقتىم. مەن 1954 -جىلى كونسەرۆاتوريانى ءبىتىرىپ، تەاترعا كەلگەندە ەكى جىلداي بىرگە جۇمىس ىستەدىك. كەيىن ون بەس جىلداي فيلارمونيادا جۇمىس ىستەدىم. اۋىل- اۋىلدى ارالاپ، ەل ىشىندە ونەر كورسەتتىك. كەيبىر ارىپتەستەرىم سول ءۇشىن مەنى «كولحوز ءانشىسى» دەپ كەلەكە ەتەتىن. ول كەزدە ايتۋ ويىما كەلگەن جوق. ءقازىر ويلاسام، مەن اۋىلداعى قالىڭ قازاقتىڭ رۋحاني تانىمىن، مادەنيەتىن كوتەرۋگە جۇمىس ىستەپپىن. سول اۋىل قازىر دە ءبارىمىزدى اسىراپ وتىر.
نۇرعيسا تۋرالى ايتايىن دەگەنىم، 15 جىلدان دەيىن مەنى قايتا تەاترعا تارتتى. بارمايمىن دەگەنىمە قويمادى. سويتسەم، تەاترعا اكادەميالىق مارتەبە بەرۋ ءۇشىن ۇجىمدا كەمىندە ءبىر ك س رو- نىڭ حالىق ءارتىسى بولۋ كەرەك ەكەن.
ەسەسىنە كەزىندە قولىم جەتپەي قالعان قىز جىبەكتىڭ وبرازىن ساحناعا انمەن الىپ شىقتىم. 1954 -جىلى تەاترعا كەلگەن كەزدە كۇلاش اپايدىڭ بار كەزى ەدى. مەن ورىس اراسىندا وسكەندىكتەن، اۋەلگى ءتۇر- سيپاتىم مەن ءتىلىم دە ناعىز قازاقي بولىپ كورىنبەسە كەرەك، كەيىن دايىن بولعان كەزدە ءوزىم ايتقىزامىن دەپ كەلىسىم بەرمەگەن. سول كىسىنىڭ كەڭەسىمەن «قارلىعاشتى» ايتىپ ءجۇردىم. نۇرعيسا ەكىنشى رەت تەاترعا شاقىرعاندا قىز جىبەككە قولىم جەتتى. سپەكتاكل ەكى كۇن بولدى. سول ەكى كۇندە دە نۇرعيسانىڭ ءوزى باس ديريجەر بولدى.
- ورىس اراسىندا ءوستىم دەپ وتىرسىز عوي. ءسىزدى شىعىستاعى كاتونقاراعايدىڭ جۇرتى ءبىزدىڭ ولكەدە وسكەن ەدى دەپ وتىرادى. سول كەزەڭ تۋرالى بۇرىن ايتىلماعان ەستەلىكتەرىڭىز بار ما؟ اكەڭىز احمەت الاش ارىستارىمەن بايلانىسى بولعانى ءۇشىن ۇستالعان دەيتىن اڭىزدار بار. ول جاعىنان حابارىڭىز بار ما ؟
- ءبىزدىڭ شىن فاميليامىز بايعونىس بولۋ كەرەك ەكەن. مەنىڭ اكەم اشارشىلىق جىلى اكە مەن شەشەدەن بىردەي جەتىم قالادى. نەگىزى ابىرايلىنىڭ قازاعى ەدى. كەيىن اتوم بومباسى جارىلىپ، تۋ-تالاقايى شىققان جەر عوي. جەتىم قالعان سوڭ ىنىسىمەن بىرگە سەمەيدەگى تۋىستارعا بارادى. بايعونىستاردىڭ ولاردى قابىلدايتىن جاعدايى بولماسا كەرەك، «ءنابي اعاڭا بار» دەپ ءجون سىلتەيدى.
- ءنابي دەگەن كىسىنىڭ قانداي تۋىستىعى بولعان؟
- سونى بۇگىنگە دەيىن انىقتاي الماي كەلەمىز. بالكىم قۇداندالى ادام با، بىلمەيمىن. انا كىسى قوس جەتىمدى جىلاپ قارسى الادى. نۇرجان دەيتىن باشقۇرت ايەلى بولاتىن، ەكەۋى 1904 -جىلعى اكەم مەن 1907 -جىلعى ءىنىسىن اسىرايدى. اكەم ءشايشى عالي دەگەن بايدىڭ ۇيىندە ساماۋىر قايناتىپ جۇمىس ىستەيدى. قولى بوساسا، سونىڭ قوراسىن سىپىرادى. ءسويتىپ كۇنەلتەدى.
اكەم مۇحاممەداحمەت 11 گە تولعاندا سونداعى مۋسين دەگەن بايدان قالعان فابريكاعا جۇك تيەۋشىنىڭ كومەكشىسى بولىپ جۇمىسقا تۇرادى. ءىنىسى مۇحاممەدكەرىم ءالى كىشكەنتەي ەكەن.
كەيىن اكەم سول جەردەن ورتكە قارسى كۇزەت قىزمەتىنە اۋىسادى. وندا دا ەڭبەگىمەن كوزگە ءتۇسىپ، كۇزەت باستىعى بولادى. سودان كەيىن اۋداندىق كوميتەت اۋىلدارعا ينسترۋكتور ەتىپ تاعايىندايدى. اكەمىزدىڭ قىزمەت بابىمەن بەسقاراعايدا تۇرعانىمىز ەسىمدە. كەيىن اكەم قالالىق اتقارۋ كوميتەتىندە ينسترۋكتور بولىپ جۇرگەندە الماتىعا ەكى جىلدىق وقۋعا جىبەردى. سول جاقتان كاتونقاراعاي اۋدانىنىڭ اتقارۋ كوميتەتى حاتشىسىنىڭ ورىنباسارى ەتىپ جولداما بەرەدى. ءبىراق ءبىز كاتونقاراعايعا اكەمنەن بۇرىن بارىپ قونىستاندىق. ول الماتىدان تىكەلەي كەلدى. ول جەردە گەراسيموۆ دەگەن ءبىرىنشى حاتشى بولدى. اكەم ەكىنشى بولدى، قاشان دا استىندا قارا ارعىماعى، قالتاسىندا ناگانى بولاتىن. سول ارعىماعىنا ءمىنىپ شەكارانى شارلاپ كەتەتىن.
قىركۇيەكتە ول مەنى قولىمنان جەتەكتەپ مەكتەپكە اپاردى. ال قازان ايىندا «حالىق جاۋى» رەتىندە ۇستالدى. ءتورت ميليتسيونەر كەلىپ، ءۇيدى ءتىنتتى. ءىسساپارعا كەتتىم دەگەن اكەم سودان ورالعان جوق.
شەشەم جەتى بالامەن قالدى. ءبىر ءسىڭلىم قىزىلشادان قايتىس بولدى. تاعى ءبىر ءسىڭلىم 1943 -جىلى ومىردەن ءوتتى.
اكەمنىڭ الاشوردامەن بايلانىسى تۋرالى ەشتەڭە بىلمەيمىن. ول ۇستالعان كەزدە جاس بولدى عوي. بايلانىسى بولدى- اۋ دەپ ويلامايمىن. كەيىن قۇجات تولتىرعاندا اكەمنىڭ 1937 -جىلى ۇستالىپ كەتكەننەن ورالماعانىن اشىق جازىپ ءجۇردىم. سونىڭ كەسىرىنەن كاپيتاليستىك ەلدەرگە گاسترولگە شىعارمايتىن. ر. باعلانوۆا، ر. جامانوۆالار بالالار ۇيىندە وستىك دەپ جازادى ەكەن. ولاردىڭ جولى اشىق بولدى. 1958 -جىلى اكەم اقتالدى. سودان كەيىن دە 10 جىل بويى سوتسياليستىك ەلدەرگە عانا شىعىپ ءجۇردىم. اقىرى 1967 -جىلى ءبىرىنشى رەت مەنى ەگيپەتكە جىبەردى. ودان كەيىن كاناداعا جولىم ءتۇستى دەگەندەي...
ال انام قاتال ادام بولدى. قولىندا بەلبەۋ نەمەسە توبىلعى جۇرەتىن. تىڭداماساڭ، اياقتان وساتىن. ءبىراق ول ءۇشىن انامىزعا رەنجىپ كورگەن جوقپىز. ول كەزدە ءبارى سولاي تاربيەلەيتىن.
اناما كومەكتەسۋ ءۇشىن التىنشى سىنىپتان باستاپ كەشكى مەكتەپكە اۋىستىم. سەمەي ەت كومبيناتىندا جۇمىس ىستەي ءجۇرىپ جەتىنشى سىنىپتى ورىسشا ءبىتىردىم. ورىستاردىڭ ىشىندە ءوستىم دەپ وتىرعانىم سول.
- انشىلىك كىمنەن دارىدى دەپ ويلايسىز؟
- سىزگە اكەم تۋرالى ايتايىن دەگەنىم، مەنىڭ اكەمنىڭ داۋسى وتە جاقسى بولدى. دومبىرا مەن سكريپكانى جاقسى تارتتى. ءشايشى عاليدىڭ قولىندا جۇرگەندە بالاسىنىڭ سكريپكا تارتقانىنا قىزىعا قارايدى ەكەن. بايدىڭ بالاسى موينىنا سكريپكا قىستىرعاندا اكەم ساماۋرىن جاعاتىن اعاشتى سكريپكا ەتىپ ەلىكتەيدى ەكەن. سونى كورگەن ءشايشى عالي اكەمە ءبىر جارمەڭكەدەن سكريپكا اكەپ بەرەدى. ول كىسى دە شالا قازاقتىعىنا قاراماستان اسا ءبىر كورنەكتى، ساليقالى ادام بولعانعا ۇقسايدى. اكەم ول سكريپكانى قاسىنان تاستامايتىن. مەن 1948 الماتىعا كەتكەنشە ۇيدە تۇراتىن. كەيىن تاپپاي قالدىق.
مەنىڭ انام نوعاي بولدى عوي. اكەم الگى سكريپكامەن نوعايدىڭ كۇيلەرىن جاقسى وينايتىن. ال انام قازاق اندەرىن كەرەمەت ورىندايتىن. انشىلىك ماعان ەكەۋىنەن دە دارىعان شىعار. كەيىن قازاق وپەرالارىن ۇيرەنگەن كەزدە قازاق اندەرىنىڭ سارىنىن بىردەن تاني قوياتىنمىن. ويتكەنى انام قازاقتىڭ كوپ ءانىن جاتقا بىلەتىن.
ال اكەمنىڭ اۋزىنان تاستامايتىن ءبىر ءانى بولدى. كەيىن مادەنيەتتانۋشىلاردان دا، ءداستۇرلى انشىلەردەن دە سۇراپ، تابا الماي قويدىم. ءالى كۇنگە دەيىن ءۇنى قۇلاعىمدا. تەك قايىرماسىنىڭ ءماتىنى عانا ەسىمدە قالىپتى.
- اققۋ ەدىم كولدەگى
- سۇڭقار ەدىم شولدەگى
- امالىم بار ما،
- اتتەڭ ءتاڭىرىم، احوۋ
- شولدەدىم، - دەپ كەلەتىن.
قانداي ءان ەكەنىن ەشكىم ايتا الماي قويدى.
- بالكىم ءوز شىعارعان ءان شىعار؟
- قازاقتىڭ حالىق ءانى دەپ ويلايمىن. تەك بىزگە
جەتپەي قالعان. بىرەۋلەر الاشورداشىلاردىڭ گيمنى بولۋى مۇمكىن دەگەن بولجام ايتتى. كىم ءبىلسىن...
- جالپى ءوزىڭىز قازىر ءان تىڭدايسىز با؟ تىڭداساڭىز كىمدەردى تىڭدايسىز؟
- مەنىڭ اڭسايتىنىم سول حالىق اندەرى عوي. ءقازىر دومبىرامەن ايتاتىندار دا ازايدى. كوبى قىرتىڭ-تىرتىڭ. ەرلى-زايىپتى بولىپ ءان ايتۋ سانگە اينالىپتى. تىڭداسام، تاڭعالام. ءبارى ءبىر- ءبىرىنىڭ اۋزىنا تۇكىرىپ قويعانداي. ەرەكشەلىك جوق. جالعىز مايرا ءىلياسوۆاعا راحمەت. «ساعىندىرعان اندەر» دەپ ەسكى اندەردى جاڭعىرتىپ ءجۇر. ال قازىرگىنىڭ كوبى ءان ەمەس، تاقپاق قوي.
- ءوز بالا- شاعاڭىزدىڭ ىشىندە جولىڭىزدى قۋعان ۇرپاق بار ما؟
- قۇدايعا شۇكىر مىنا سارى قىزىم بار. ەكى قىزىم، ءبىر ۇلىم بولدى. كىشى قىزىم 2007 -جىلى جۇرەكتەن كەتتى. جالعىز قىزىم قالدى. ءوزى شەشەمە تارتقان. ۇلىمنىڭ بەلى اۋىرىپ، ەكىنشى توپتاعى مۇگەدەكتىگى بار. سول ۇلىمنىڭ ماليكا دەگەن ءبىر قىزى بار. سول ماليكا تولەگەنوۆا «استانا وپەرادا» ديرەكتوردىڭ حالىقارالىق بايلانىس جونىندەگى ورىنباسارى. جۋىقتا بىرىككەن اراب امىرلىكتەرىنە ايگىلى «شەلكۋنچيكتى» اپارىپ قويادى. بىلتىر وزدەرى سۇرانىپ بارىپ ەدى، بيىل ارابتار شاقىرىپتى.
ەكى شوبەرەم بيبىگۇل تولەگەن اتىنداعى كرەاتيۆتى مەكتەپتە وقىپ جاتقانىن ايتتىم. ءبىر شوبەرەمە اكەمنىڭ اتىن قويعانبىز. سول احمەت دومبىرانى جاقسى كورەدى. كەزىندە قارشىعا احمەدياروۆ ءوزىنىڭ كوللەكتسيالىق دومبىراسىن سىيلاعان. سونى وسى شوبەرەمە اكەپ بەردىم. سكريپكانى دا ۇيرەنىپ ءجۇر ەكەن. اكەم سياقتى ازامات بولا ما دەپ ۇمىتتەنەمىن. داۋىسى دا كەرەمەت.
- ەلگە ايتار قاندا تىلەگىڭىز بار؟
- قازىر مەنىمەن زامانداس ادام قالماي بارادى. مەنەن كەيىنگى دەگەن ءاسانالىنىڭ ءوزى 88 گە كەلىپتى. شەشەم ايتاتىن، «قارتايعان سوڭ وتىرۋىڭ مولدا سياقتى، اقىرعانىڭ شايتان سياقتى بولادى»، - دەيتىن. سونىڭ ءبارىن حالىقتىڭ ىقىلاسى، جىلى لەبىزى جەڭىلدەتىپ كەتەدى. وسىنداي ءىلتيپاتشىل حالىق امان بولسىن.
ەسىمجان ناقتىباي
