بوپسالاۋعا، قورقىتۋعا تەز كونگىش - مامان جاس وسپىرىمدەردىڭ ەسىرتكى تاراتۋى تۋرالى

ءى ءى م ەسىرتكى قىلمىسىنا قارسى ءىس-قيمىل كوميتەتىنىڭ اسا ماڭىزدى ىستەر جونىندەگى اعا جەدەل ۋاكىلى مەدەتبەك سماعۇلوۆتىڭ ايتۋىنشا، ەسىرتكى تاسىمالداۋشىلاردىڭ كوبى - 16-32 جاستاعىلار.

- ءبىراق قازىر 14 جاستان اسقان بالالاردىڭ دا ەسىرتكى تاسىمالداعانى تۋرالى بىرنەشە فاكت تىركەلدى. ويتكەنى، ولار بوپسالاۋعا، قورقىتۋعا تەز كونگىش. بىزدە ادام قۇقىلارىنىڭ جالپىعا بىردەي دەكلاراتسياسى بار. ول جەردە 18 جاسقا دەيىنگى ازاماتتار بالا دەپ ەسەپتەلەدى. دەگەنمەن ەسىرتكى تاسىمالىمەن اينالىسقان جاعدايدا 16 جاستان باستاپ قىلمىستىق جاۋاپكەرشىلىككە تارتىلادى. ال ەگەر اسا اۋىر قىلمىس جاساپ، تارماقتارى ناقتى انىقتالاتىن بولسا، 14 جاستان باستاپ قىلمىستىق جاۋاپكەرشىلىككە تارتىلادى، - دەيدى سپيكەر.

سونداي-اق مەدەتبەك سماعۇلوۆ جاستار اراسىندا كەڭ تاراعان ەسىرتكى تۇرىنە دە جەكە توقتالدى.

- ەسىرتكى تۇرلەرىنىڭ اراسىندا الەمگە كوپ تاراعانى - سينتەتيكالىق ءونىم. بۇل - كاننابيستىك ءونىمنىڭ ورنىنا كەلگەن ءدارى-دارمەكتىك دەڭگەيدەگى پرەپاراتتار.

سينتەتيكامەن كۇرەسۋ وتە قيىن. ءبىز بۇرىن كاننابيستىك ەسىرتكىنىڭ باعىت- باعدارىن، جولىن بىلەتىن ەدىك. قازىر سينتەتيكالىق ەسىرتكى كەز كەلگەن ۇيدە دايىندالا بەرەدى. فورمۋلالارىن دايىنداپ، پرەكۋرسورلارىن الاتىن بولسا، جەتكىلىكتى.

سينتەتيكالىق ەسىرتكى - وتە اۋىر ونىمدەردىڭ ءبىرى. ەكىنشى قولدانعاننان-اق ادام تاۋەلدى بولىپ قالادى. سينتەتيكالىق ەسىرتكىنى جويۋعا اتا-انالار دا بەلسەندى ارالاسۋ كەرەك. ويتكەنى جاستاردىڭ اراسىندا وتە كوپ تاراپ كەلە جاتىر، - دەيدى مەدەتبەك سماعۇلوۆ.

ايتا كەتسەك، جاقىندا پوليتسيا قىزمەتكەرلەرى ءبىر كۇن ىشىندە باتىس قازاقستان، سولتۇستىك قازاقستان جانە قاراعاندى وبلىستارىندا ورنالاسقان ءۇش ەسىرتكى زەرتحاناسىن جويدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى