«بولاشاق» باعدارلاماسى بويىنشا كىمدەر باكالاۆر دەڭگەيىندە وقي الادى
استانا. KAZINFORM - ءماجىلىس زاڭناماعا دارىندى بالالاردى قولداۋ ساياساتىن جەتىلدىرىپ، مەملەكەتتىك ءتىلدىڭ قولدانىسىن بىرىزدەندىرۋدى كوزدەيتىن زاڭ جوباسىن قابىلدادى.
زاڭ جوباسىن ازىرلەگەن جۇمىس توبىنىڭ جەتەكشىسى، ماجىلىستەگى الەۋمەتتىك- مادەني دامۋ كوميتەتىنىڭ ءتوراعاسى اسحات ايماعامبەتوۆ اتالعان زاڭدا مەملەكەتتىك ءتىلدىڭ تسيفرلىق ۇلتتىق سوزدىك قورىن جاساۋ تۋرالى ارنايى نورما بولاتىنىن ايتتى. بۇل نورما مەملەكەتتىك ءتىلدى جاساندى ينتەللەكتتىڭ كۇشىمەن دامىتۋدى كوزدەيدى.
سونداي- اق، قۇجاتتا بەدەلدى حالىقارالىق ءپان وليمپيادالارى مەن عىلىمي سايىستاردا جەڭىمپاز اتانعان جاستاردى «بولاشاق» باعدارلاماسىنىڭ اياسىن كەڭەيتۋ ارقىلى قولدايتىن نورما بار.
- ءبىز «بولاشاق» باعدارلاماسىنىڭ اياسىن كەڭەيتۋدى ۇسىنىپ جاتىرمىز. قازىر «بولاشاق» باعدارلاماسى بويىنشا تەك ماگيستراتۋرا جانە دوكتورانتۋرا دەڭگەيىندە عانا ءبىلىم الۋعا بولادى. ءبىز سوعان باكالاۆرياتتى دا قوسىپ وتىرمىز. ءبىراق ول بارىنە ەمەس، تەك دارىندى، ياعني ارنايى تىزىمگە كىرگەن، تانىلعان، بەدەلدى دەگەن حالىقارالىق وليمپيادادا نەمەسە عىلىمي سايىستا جەڭىمپاز اتانعان تالاپكەر، ءوز باعىتى بويىنشا ءارى قاراي ءبىلىم الامىن دەسە، وعان «بولاشاق» باعدارلاماسى» اياسىندا شەتەلدە مەملەكەت ەسەبىنەن جوعارى ءبىلىم الۋعا مۇمكىندىك بەرىلەدى. ول بالالار «بولاشاق» ارقىلى باكالاۆر دارەجەسىندە ءبىلىم العاننان كەيىن كەمىندە 3 جىل بويى قازاقستاندا جۇمىس ىستەۋگە مىندەتتەلەدى، - دەيدى اسحات ايماعامبەتوۆ.
