بوكستان الەم چەمپيونى مەرەي اقشالوۆ تاعى ءبىر قىزمەتكە بارا جاتىر
استانا. KAZINFORM — وسى كۇنى جەر-جەردە سپورت باسقارمالارىنىڭ باسشىلارى اۋىسىپ جاتىر. ەندى قوستاناي وبلىسىنىڭ سپورتىنىڭ تىزگىنىن بوكستان 2013-جىلعى الەم چەمپيونى مەرەي اقشالوۆ ۇستاۋى مۇمكىن.
ول جاقىندا تۋريزم جانە سپورت مينيسترلىگى جاڭىنان قۇرىلعان كوميسسيا وتىرىسىنا كەلىپ، ءوز باعدارلاماسىن تانىستىرعان. مەرەي اقشالوۆ ازىرگە استاناداعى ق. مۇڭايتپاسوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ ديرەكتورى قىزمەتىن اتقارىپ ءجۇر.
مەرەي اقشالوۆ 1988-جىلى 8-مامىردا اياگوز قالاسىندا (قازىرگى اباي وبلىسى) دۇنيەگە كەلدى. قازاقستان رەسپۋبليكاسىنا ەڭبەگى سىڭگەن سپورت شەبەرى. 2013-جىلعى الەم چەمپيونى، ازيا چەمپيونى. 2010-جىلعى اسكەريلەر اراسىنداعى الەم چەمپيونى. 2013-جىلدىڭ ازيا قۇرلىعىنىڭ ەڭ ۇزدىك بوكسشىسى. 2013-جىلى قازاقستاننىڭ «جىل سپورتشىسى». 2008-جىلعى وليمپيادا ويىندارىنىڭ قاتىسۋشىسى. سپورتتىق مانسابىندا 60 جانە 64 كەلىگە دەيىن سالماق دارەجەسىندە جۇدىرىقتاستى.
ەڭبەك جولىن استانا قالاسىنىڭ دەنە شىنىقتىرۋ جانە سپورت باسقارماسىنىڭ بالالار مەن جاسوسپىرىمدەر سپورت مەكتەبىنىڭ ادىسكەرى بولىپ باستادى. كەيىن قالالىق جوعارعى سپورتتىق شەبەرلىگى مەكتەبى، سپورت مەكتەبى ديرەكتورىنىڭ ورىنباسارى، ديرەكتورى بولىپ جالعاستىردى.
ۇلتتىق وليمپيادا كوميتەتىندە اقمولا وبلىسى دەنە شىنىقتىرۋ جانە سپورت باسقارماسى باستىعىنىڭ ورىنباسارى بولدى. اقمولا وبلىسى شورتاندى اۋدانى اكىمىنىڭ ورىنباسارى قىزمەتىن اتقاردى. ودان كەيىن تۋريزم جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىنە قاراستى سپورتتى دامىتۋ ديرەكتسياسىنىڭ بوكستان مەملەكەتتىك جاتتىقتىرۋشىسى بولدى.
