بوكس فەدەراتسياسى باپكەرلەردى جاپپاي جۇمىستان بوساتۋ تۋرالى جازباعا پىكىر ءبىلدىردى
استانا. قازاقپارات - قازاقستان بوكس فەدەراتسياسىنىڭ رەسمي پاراقشاسىندا فەدەراتسيانىڭ ۆيتسە-پرەزيدەنتى ازيز قوجامبەتوۆ پەن بوكستان باپكەرلەر قۇرامىن جۇمىستان بوساتۋ تۋرالى جازبا جاريالانىپ، بىردەن ءوشىرىلدى. بۇل جايتقا قاتىستى بوكس فەدەراتسياسىنىڭ وكىلدەرى پىكىر ءبىلدىردى، دەپ حابارلايدى Prosports.kz.
«بوكستان قازاقستان ەرلەر ۇلتتىق قۇراماسىنىڭ پاريجدەگى وليمپيادا ويىندارىنداعى تومەن ناتيجەسىنە بايلانىستى كەلەسى مامانداردىڭ قىزمەتىنەن بوساتىلعانىن حابارلايمىز: قازاقستان بوكس فەدەراتسياسىنىڭ ۆيتسە-پرەزيدەنتى - ءازيز قوجامبەتوۆ؛ باس باپكەر - مىرزاعالي ايتجانوۆ؛ اعا جاتتىقتىرۋشى - مارات جاكيەۆ؛ جاتتىقتىرۋشىلار - نۇركەن انداسوۆ، نۇرجان ناسانوۆ، عاني اشكەيەۆ، ەرمەك ەرتايەۆ، تالعاتبەك جاقپەكوۆ، زاكىر سافيۋلين، ازامات ماقاجانوۆ، ءجامىل ءجۇسىپ؛ جاتتىقتىرۋشى-كەڭەسشى - دوناتاس يانۋسيەۆيچۋس»، - دەلىنگەن رەسمي جازبادا.
الايدا اتالمىش جازبا بىرەر مينۋتتان سوڭ جەلىدەن ءوشىرىلدى. فەدەراتسيا پاراقشاسىنداعى بۇل اقپارات بىردەن قىزۋ تالقىعا ءتۇستى.
Nur.kz ءتىلشىسى اتالمىش جازباعا قاتىستى فەدەراتسيا وكىلدەرىنەن پىكىر الدى. ولار تاراپ جاتقان اقپاراتتىڭ شىندىققا جاناستپايتىنىن ايتتى. «بۇل اقپارات شىندىققا ساي كەلمەيدى. قازاقستان بوكسىندا جاقىندا وزگەرىستەر بولادى. ول تۋرالى الداعى كۇندەرى رەسمي تۇردە حابارلايمىز»، - دەلىنگەن رەسمي حابارلامادا.
