بريتان ارمياسىنىڭ بەس جىلقىسى لوندون كوشەلەرىمەن جارىسا شاپتى
استانا. KAZINFORM - بريتان ارمياسىنىڭ كاۆالەريالىق پولكىنىڭ بەس جىلقىسى شاباندوزدارىن لاقتىرا ساپ، لوندون كوشەلەرىمەن جارىسا شاپتى، دەپ جازادى Euronews.
كورول چارلز III-تىڭ تۋعان كۇنىنە ارنالعان پارادقا دايىندىق كەزىندە بريتان ارمياسىنىڭ كاۆالەريالىق پولكىنىڭ بەس جىلقىسى بەلگىسىز سەبەپتەرمەن شاباندوزدارىن لاقتىرا ساپ، لوندون كوشەلەرىمەن جارىسا شابا جونەلگەن. ولار بىرنەشە ساعاتتان كەيىن ۇستالدى.
جىلقىلاردىڭ ءبىرى بۋكينگەم سارايىنىڭ ماڭىندا تۇرعان تاكسيگە، ەكىنشىسى تۇراقتا تۇرعان تۋريستەر اۆتوبۋسىنا سوقتىعىسقان. جىلقىمەن سوقتىعىسىپ جانە ۇستاۋ كەزىندە ءتورت ادام زارداپ شەكتى. كەيبىر جانۋارلار دا جاراقات الىپ، ولارعا ۆەتەرينارلىق كومەك كورسەتىلگەن.
الەۋمەتتىك جەلىدە اق جانە قارا ءتۇستى قوس اتتىڭ فوتوسى مەن ۆيدەوسى كەڭىنەن تاراپ كەتتى. بىرەۋىنىڭ الدىڭعى جاعى قىزىل ءتۇستى. كەيىن ونىڭ قان ەكەنى انىقتالدى.
لوندون قالاسى پوليتسياسىنىڭ حابارلاۋىنشا، ەكى جانۋار لوندوننىڭ ورتالىعىنان شىعىسقا قاراي 6 ك م جەردە ورنالاسقان ليمەحاۋس تۇسىندا قۇرىقتالدى.
جىلقىلاردىڭ تۇرا قاشۋىنا نە سەبەپ بولعانى بەلگىسىز. اتتى اسكەرلەر پولكى ولار قۇرىلىس جۇمىستارىنىڭ شۋىنان شوشىپ كەتۋى مۇمكىن دەپ بولجايدى.
جانۋارلارعا يەلىك ەتەتىن بريتان ارمياسىنىڭ كاۆالەريالىق پولكى سالتاناتتى شارالارعا، سونىڭ ىشىندە بريتاندىق مونارحتاردىڭ تاققا وتىرۋىنا قاتىسادى.
اۆتور
ەركەجان سماعۇلوۆا
