بريۋسسەل ماڭىندا تاعى اتىس بولدى: قازا تاپقاندار بار
استانا. KAZINFORM - بەلگيانىڭ اندەرلەحت اۋدانىندا بولعان اتىس سالدارىنان 19 جاستاعى جاس جىگىت قازا تاپتى، دەپ حابارلايدى Euronews.
قىلمىسكەرلەر كولىكپەن قاشىپ كەتكەن، ولاردى ىزدەۋ جۇمىستارى بەلسەندى جۇرگىزىلىپ جاتىر. بەينەباقىلاۋ كامەراسىنا كەمىندە ءبىر قارۋلانعان ادام ءتۇسىپ قالعان. بريۋسسەل پروكۋراتۋراسى تەرگەۋ مۇددەسى ءۇشىن «قوسىمشا تۇسىنىكتەمە بەرمەيتىنىن» مالىمدەدى.
وقيعا «كلەمانسو» مەترو ستانتسياسىنا جاقىن ماڭدا بولعان. بۇل وسى اۋداندا ەكى اپتا ىشىندە بولعان ءۇشىنشى اتىس وقيعاسى. سالدارىنان ءبىر ادام قازا تاۋىپ، تاعى ۇشەۋى جاراقات الدى.
بىرنەشە كۇن بۇرىن بريۋسسەل پروكۋرورى سوڭعى اتىستاردىڭ سەبەپتەرى ەسىرتكى ساۋداسىمەن اينالىساتىن قىلمىستىق توپتار اراسىنداعى ىقپال ءۇشىن كۇرەس ەكەنىن مالىمدەدى.
