بۇرىن تيمۋر قۇلىبايەۆقا تيەسىلى بولعان ۋچاسكەنىڭ ەندىگى تاعدىرى نە بولماق؟
استانا. KAZINFORM - استانا اكىمى جەڭىس قاسىمبەك «كەرۋەن» ساۋدا ورتالىعىنىڭ الدىنداعى قازىر سكۆەر ورنالاسقان جەر ۋچاسكەسىنىڭ بولاشاعى تۋرالى ايتتى.
بۇعان دەيىن ءماجىلىس دەپۋتاتى، زاڭگەر باقىتجان بازاربەك Facebook پاراقشاسىندا بۇل جەر ۋچاسكەسى تيمۋر قۇلىبايەۆقا تيەسىلى بولعانىن، الايدا اۋىل شارۋاشىلىعى مينيسترلىگىنىڭ جەر رەسۋرستارىن باسقارۋ كوميتەتى مەن رەسپۋبليكالىق Jer Amanaty جەر كوميسسياسى ونى مەملەكەتتىك مەنشىككە قايتارعانىن مالىمدەگەن ەدى.
«بۇل ۋچاسكە استانالىقتارعا «سيەۆەرنوە سيانيە» تۇرعىن ءۇي كەشەنى مەن «كەرۋەن» ساۋدا ورتالىعىنىڭ اراسىنداعى ۇلكەن بوس جەر رەتىندە بەلگىلى، ول ۇزاق ۋاقىت بويى پايدالانىلماي كەلدى»، - دەپ جازدى بازاربەك.
بۇگىن ەسىل اۋدانى تۇرعىندارىمەن كەزدەسۋىندە استانا اكىمى جەڭىس قاسىمبەك «كەرۋەن» ساۋدا ورتالىعىنىڭ الدىنداعى جەر ۋچاسكەسى، ياعني قازىرگى سكۆەر مەملەكەتتىك قورعا وتەتىنىن مالىمدەدى.
«جەر تولىقتاي قالاعا قايتارىلادى. قۇرىلىسشى سالعان قاراجات قالا اكتيۆىندە قالادى، ياعني جەكەمەنشىكتە بولمايدى. بۇل پارك قازىردىڭ وزىندە قالا تۇرعىندارىنا قولجەتىمدى جانە ول قالاعا وتە قاجەت. اكىمدىك اۋماقتى اباتتاندىرۋ بويىنشا بايقاۋ وتكىزىپ قويدى»، - دەدى قاسىمبەك.
