بەرىك اسىلوۆ تۇرمىستاعى زورلىق- زومبىلىق جونىندە: ەشكىمنىڭ شەنىنە قارامايىق
سوڭعى ءبىر توقساندا اكىمشىلىك جاۋاپكەرشىلىككە تارتىلعان ءۇي بۇزارلاردىڭ سانى 7 مىڭنان 27 مىڭعا دەيىن ارتتى.
باس پروكۋرور بەرىك اسىلوۆ وتباسىلىق- تۇرمىستىق زورلىق- زومبىلىق پروفيلاكتيكاسى مەن قوعامدىق ورىنداردا قۇقىق بۇزۋشىلىقتىڭ الدىن الۋ ماسەلەلەرى جونىندەگى ۇيلەستىرۋ كەڭەسىنىڭ وتىرىسىندا وسىنداي دەرەك كەلتىردى، دەپ حابارلايدى Kazinform.
«پوليتسيانىڭ ۇيدەگى زورلىق- زومبىلىق تۋرالى شاعىمدارعا ارەكەت ەتۋ ءتاسىلى قايتا قارالدى. سونىڭ ناتيجەسىندە، ءۇشىنشى توقساندا اكىمشىلىك جاۋاپكەرشىلىككە تارتىلعان ءۇيبۇزارلاردىڭ سانى 7 مىڭنان 27 مىڭعا دەيىن ارتتى. جىل باسىنان كىسى ولتىرگەنى جانە دەنەگە ولىممەن اياقتالعان اۋىر جاراقات سالعانى ءۇشىن 80 ادام ۇزاق مەرزىمگە باس بوستاندىعىنان ايىرىلدى»، - دەدى بەرىك اسىلوۆ.
باس پروكۋرور بۇل قۇقىق بۇزۋشىلىقتى جازامەن عانا تىيۋ مۇمكىن ەمەس ەكەنىن ەسكە سالدى. ونىڭ پايىمىنشا، بۇل ىستە قوعامنىڭ قولداۋى ماڭىزدى.
«ءبارىنىڭ ەسىندە شىعار، ىشكى ىستەر مينيسترلىگى قاۋىپسىزدىك بەلدىگى مەن كولىك تەرەزەسىن تۇمشالاۋ فاكتىلەرى بويىنشا ىمىراسىز كۇرەس جۇرگىزگەندە قوعام قولداعان ەدى. ەشكىمنىڭ شەنىنە قاراعان جوق، ەشكىمدى كەشىرگەن جوق. سونىڭ اسەرىنەن جولدا جاپا شەگەتىندەر سانى ازايعان بولاتىن.
بۇكىل سالادا وسىنداي ۇستانىم بولۋى كەرەك. اسىرەسە ايەلدەر مەن بالالاردىڭ اماندىعى تۋرالى ايتىپ وتىرساق، مۇنىڭ ماڭىزى زور. بۇل جەردە ادامداردىڭ قۇقىقتىق ساناسى وزگەرۋى كەرەك. ءالى كۇنگە دەيىن جاپا شەگۋشىلەردىڭ كوبى پوليسياعا جۇگىنبەيدى. ءتىپتى كەيدە تۋىستارى اۋزىن جابادى. كورشىلەر دە ونداي داۋ- جانجالدان اۋلاق بولۋعا تىرىسادى. سونىڭ سالدارىنان ءوزىن جازاسىز سەزىنگەندەردىڭ ۇرىپ- سوعۋ مەن قورلاۋ ارەكەتەرى بالا مەن ايەل ولىمىنە دە اكەپ سوعۋدا. ءبىزدىڭ بۇگىنگى مىندەتىمىز وسىنىڭ بارىنە ناقتى شەشىم قابىلداۋ. كوپتەگەن ايەل مەن بالانىڭ تاعدىرى ءبىزدىڭ ناقتى قادامدارىمىز بەن شەشىمدەرىمىزگە بايلانىستى»، - دەدى ول.
