بەرليننىڭ بۇرىنعى مەرىنە شابۋىل جاسالدى
استانا. KAZINFORM - سەيسەنبى كۇنى بەرليننىڭ بۇرىنعى ءمەرى جانە Jn وتباسى ىستەرى جونىندەگى فەدەرالدىق ءمينيسترى فرانسيسكا گيففيگە شابۋىل جاسالدى.
بەرلين كىتاپحاناسىنداعى شارا كەزىندە بەلگىسىز ەر ادام ونىڭ ارتىنان كەلىپ، ىشىنە قاتتى زات سالىنعان سومكەمەن ۇرىپ جىبەرگەن. ساياساتكەر باسى مەن موينىنان جاراقات الىپ، امبۋلاتورلىق ەم الۋ ءۇشىن اۋرۋحاناعا جاتقىزىلدى.
پوليتسيا شابۋىلداۋشىنى ۇستادى، ول 74 جاستاعى ەر ادام بولىپ شىقتى. جەرگىلىكتى ب ا ق- تىڭ حابارلاۋىنشا، ونىڭ بويىندا «پسيحيكالىق اۋرۋ بەلگىلەرى» بار. كۇدىكتىنىڭ شابۋىلىنا نە سەبەپ بولعانى انىقتالىپ جاتىر. ەر ادامنىڭ پاتەرىندە ءتىنتۋ جۇرگىزىلدى.
شابۋىلدان كەيىن ف. گيففي وقيعاعا قاتىستى تۇسىنىكتەمە بەردى. ول بولعان جاعدايعا الاڭدايتىنىن، سونداي-اق گەرمانياداعى ساياسي بەلسەندى جانە ادال ادامدارعا شابۋىلدىڭ جيىلەپ جاتقانىن ايتتى.
وتكەن اپتادا ەۋروپارلامەنت دەپۋتاتتىعىنا جەتەكشى كانديداتتاردىڭ ءبىرى سوتسياليست ماتتياس ەككە درەزدەندە پلاكاتتار ءىلۋ كەزىندە اۋىر جاراقات الدى. پوليتسيا تىم وڭشىلدارمەن بايلانىسى بولۋى مۇمكىن ءتورت ءجاسوسپىرىمدى تەرگەپ جاتىر.
بۇعان دەيىن قالادا «جاسىلدار» قوزعالىسىنىڭ بەلسەندىسى سوققىعا جىعىلدى، ال سەيسەنبىدە پارتيانىڭ يۆوننا موسلەرگە شابۋىل جاسالدى.
