برازيليا مەن ارگەنتينا ويىنىندا جانكۇيەرلەر توبەلەس شىعاردى
2026-جىلعى الەم چەمپيوناتىنا ىرىكتەۋ ويىنى اياسىندا برازيليا مەن ارگەنتينا قۇرامالارى كەزدەستى.
ريو- دە- جانەيروداعى ماراكانا ستاديونىندا ءانۇران ورىنداۋ كەزىندە ەكى قۇرامانىڭ جانكۇيەرلەرى توبەلەسىپ قالدى، دەپ حابارلايدى Kazinform Sports.kz كە سىلتەمە جاساپ.
جەرگىلىكتى پوليتسيا قىزمەتكەرلەرى فۋتبول فاناتتارى مەن فۋتبولشىلاردى سابىرعا شاقىرىپ، جاعدايدىڭ ۋشىعىپ كەتۋىنە جول بەرمەدى. ارگەنتينا قۇراماسىنىڭ كاپيتانى ليونەل مەسسي كوماندالاستارىن الاڭنان الىپ كەتتى.
جانجالدان سوڭ ماراكانا ستاديونىنداعى ويىن ءوز ۋاقىتىنان 27 مينۋتقا كەش باستالدى.
تارتىستى وتكەن ماتچتاعى جەڭىستى گولدى پورتۋگاليالىق «بەنفيكا» كومانداسىنىڭ قورعاۋشىسى نيكولاس وتامەندي سالىپ، قۇراماسىنا ماڭىزدى ءۇش ۇپايدى سىيلادى. «پەنتاكامپيوندار» بۇل كەزدەسۋدى ون ويىنشىمەن اياقتادى. برازيليا قۇراماسىنىڭ جارتىلاي قورعاۋشىسى دجوەلينتون 81 مينۋتتا الاڭنان قۋىلدى.
ايتا كەتەيىك، 15 ۇپايمەن ارگەنتينا وڭتۇستىك امەريكا ايماعىنداعى ىرىكتەۋ ويىندارىنىڭ تۋرنيرلىك كەستەسىندە ءبىرىنشى ورىندا تۇر. 7 ۇپايمەن برازيليا التىنشى ورىنعا جايعاسقان.
Horrible scenes in the stands prior to Brazil vs Argentina. pic.twitter.com/ZluK2yQI4b
— Alexi Lalas (@AlexiLalas) November 22, 2023
Argentina vs Brazil has always been an exciting fixture but not once did I expect to see this 😭pic.twitter.com/Apg3dChthY
— Reasons (@LFCReasons) November 22, 2023
