«بۋراباي» ۇلتتىق پاركىنىڭ قورىقشىلارى سيرەك كەزدەسەتىن سۇر ۇكىنى ۆيدەوعا ءتۇسىرىپ الدى
«بۋراباي» ۇلتتىق پاركىنىڭ قورىقشىلارى بۇل وڭىردە وتە سيرەك كەزدەسەتىن ۇلكەن سۇر ۇكىنى بەينەكامەراعا ءتۇسىرىپ الدى، دەپ حابارلايدى قازاقپارات ۇلتتىق پاركتىڭ Instagram پاراقشاسىنا سىلتەمە جاساپ.
وندا ۇكىنىڭ جويىلىپ بارا جاتقان قۇس رەتىندە حالىقارالىق «قىزىل كىتاپقا»، رەسەيدىڭ ءبىرقاتار وڭىرلەرىنىڭ «قىزىل كىتابىنا» ەنگەنى ايتىلعان.
تابيعات قورعاۋ ينسپەكتورى ايبەك اقجۇنىس «بۋراباي» ورمان شارۋاشىلىعىن شولىپ ءجۇرىپ، قاراعايدىڭ بيىكتەۋ بۇتاعىندا قونىپ وتىرعان ۇلكەن سۇر ۇكىنى بايقاپ قالعان.
- مەن مۇنداي قۇستى بۇرىن-سوڭدى كورمەگەنمىن. بىردەن تەلەفونىمدى قوستىم. ۆيدەونى ءوزىمىزدىڭ ورنيتولوگتارعا كورسەتىپ ەدىم، عالىمدار سيرەك كەزدەسەتىن سۇر ۇكى ەكەنىن ايتتى، - دەيدى ايبەك مارات ۇلى.
عىلىمدا Strix nebulosa دەگەن اتپەن بەلگىلى. ونى ۇلتتىق پارك اۋماعىندا وسىمەن بار بولعانى ەكىنشى رەت عىلىم ءبولىمى تىركەپ وتىر. ۇلكەن سۇر ۇكى قازاقستاندا تارباعاتاي تاۋلارىندا، كاتونقاراعاي بيوسفەرالىق رەزەرۆاتىندا كەزدەسەدى. رەسەيدىڭ كەي وڭىرلەرىن، موڭعوليانىڭ تاۋلى جەرلەرىن مەكەندەيدى. ءوز تۇقىمداستارىنىڭ ىشىندەگى ەڭ ءىرىسى سانالاتىن قۇس قاناتىن جايعاندا، قۇلاشى 1 جارىم مەترگە دەيىن جەتەدى. ەركەگىنىڭ سالماعى شامامەن 1,2-1,3 كەلى، ۇرعاشىسى 1 كيلوداي تارتادى.
Посмотреть эту публикацию в Instagram
