بۋراباي كۋرورتىن دامىتۋ جوسپارىنا 137 ميلليارد تەڭگە ءبولىندى
استانا. KAZINFORM - بۋراباي كۋرورتتىق ايماعىن دامىتۋ ءۇشىن 2025-2029 -جىلدارعا ارنالعان كەشەندى جوسپار بەكىتىلدى، وندا 137 ميلليارد تەڭگەگە 118 ءىس-شارا جۇرگىزۋ قاراستىرىلعان. جوسپار تۋرالى اقمولا وبلىسىنىڭ اكىمى مارات احمەتجانوۆ ۇكىمەت وتىرىسىندا تولىعىراق ايتىپ بەردى.
− بۋراباي كۋرورتى حالىقارالىق ىسكەرلىك، سپورتتىق جانە مادەني-بۇقارالىق ءىس- شارالاردى تارتۋ ورتالىعىنا اينالۋى كەرەك. ول ءتيىستى ينفراقۇرىلىمدى تالاپ ەتەدى. سوندىقتان باستى 34 ينجەنەرلىك جانە كولىكتىك جوبالار ايقىندالدى. ناتيجەسىندە 400 كم سۋمەن جابدىقتاۋ، سۋ بۇرۋ جانە جىلۋمەن جابدىقتاۋ جۇيەلەرى، 116 ك م ەلەكتر جەلىلەرى جانە 80 ك م اۆتوموبيل جولدارىنا رەكونسترۋكتسيا جاسالادى، − دەدى م. احمەتجانوۆ ءوز بايانداماسىندا.
كۋرورتتىڭ سانيتاريالىق جاعدايى دا ەرەكشە باقىلاۋدا، مۇندا 15 سانيتاريالىق-گيگيەنالىق توراپ قوسىمشا ساتىپ الىندى. جىل سوڭىنا دەيىن مەملەكەتتىك-جەكەشەلىك ارىپتەستىكپەن قوقىس سۇرىپتاۋ جانە قاتتى تۇرمىستىق قالدىقتاردى وڭدەۋ كەشەنى سالىنادى.
ءار جىلى شۋچينسك-بۋراباي كۋرورتتىق ايماعىنا 20 ميلليارد تەڭگەگە دەيىن جەكە ينۆەستيتسيالار تارتۋ جوسپارلانىپ وتىر. ناتيجەسىندە وسى سالادا جۇمىسپەن قامتىلعاندار سانى 22 مىڭنان 32 مىڭ ادامعا دەيىن ۇلعايادى.
سونىمەن بىرگە، بيىل اكۆاپاركى جانە دەمالىس ۇيلەرى بار «دولچە باي ۋيندەم» وتەلى، «بۋراباي گراند ۆيللەدج» كوتتەدج قالاشىعى سالىنىپ، «ابىلاي حان» قوناق ءۇيى رەكونسترۋكتسيالانادى.
− تۋريستىك سەرۆيس پەن دەمالۋ جاعدايىن جاقسارتۋ ءۇشىن بيىل 9 شولۋ الاڭى مەن 14 تۋريستىك مارشرۋت جاسالادى، شۋچە كولىنىڭ جاعاجايى اباتتاندىرىلادى. شۋچە قالاسىنداعى دەندروپاركتى رەكونسترۋكتسيالاۋ باستالادى. كوپبەيىندى كونگرەسس ورتالىعى دا ماڭىزدى تۋريستىك وبەكتىلەردىڭ بىرىنە جانە بۋرابايدىڭ اقمارجانىنا اينالۋى قاجەت. قازىرگى ۋاقىتتا جەر ۋچاسكەسى بەلگىلەندى جوبانى ازىرلەۋ جۇمىسى باستالدى، − دەدى وبلىس اكىمى.
سونىمەن قاتار بيىل كۋرورتتىق ايماقتا جاساندى ينتەللەكتپەن جابدىقتالعان 114 بەينەباقىلاۋ كامەراسى ورناتىلادى. ول تۋريستەردىڭ قاۋىپسىزدىگى ءۇشىن قوسىمشا مۇمكىندىك بەرەدى.
ۇيالى بايلانىس پەن ءموبيلدى ينتەرنەتتىڭ ساپاسىن جاقسارتۋ ماقساتىندا، شۋچينسك- بۋراباي كۋرورتتىق ايماعىندا قوسىمشا 7 انتەننا- دىڭگەكتى قۇرىلىس ورناتىلدى. جازعا دەيىن ولاردا موبيلدى وپەراتورلار ورنالاستىرىلاتىن بولادى.
− ءوڭىردىڭ تۋريستىك الەۋەتىن تانىمال ەتۋ جانە دامىتۋ ءۇشىن «Four season» تۇجىرىمداماسى ىسكە اسىرىلىپ جاتىر. بيىل 25 ءىرى حالىقارالىق جانە رەسپۋبليكالىق ءىس- شارالار قاراستىرىلعان. «Burabay Travel» موبيلدى قوسىمشاسىنىڭ كونتەنتى تولىعىپ كەلەدى، ول تۋريستىك كلاستەر تۋرالى اقپارات الۋعا مۇمكىندىك بەرەدى، − دەدى مارات احمەتجانوۆ.
