بەلگىسىز ادامعا قاتەلەسىپ اۋدارىپ جىبەرگەن اقشانى قالاي قايتارۋعا بولادى؟
موبيلدى قوسىمشا ارقىلى اقشانى لەزدە اۋدارۋ ءارقايسىمىز ءۇشىن ۇيرەنشىكتى جاعدايعا اينالدى. اقشانى اۋدارۋ ءۇشىن موبيلدى قوسىمشادا الۋشىنىڭ ءنومىرىن تەرۋ جەتكىلىكتى.
كەيدە اۋدارىم كەزىندە ۇيالى تەلەفون ءنومىرىن نەمەسە كارتا، شوت دەرەكتەمەلەرىن قاتە تەرىپ قاراجات مۇلدەم بەيتانىس ادامعا كەتەتىن جاعداي بولادى. ەگەر بەيتانىس اداممەن قاراجاتتى قايتارۋ تۋرالى كەلىسە الساڭىز جاقسى، ال كەلىسە الماساڭىز شە؟ نەمەسە كەرىسىنشە ءسىزدىڭ شوتىڭىزعا بەيتانىس ادامنان قاراجات تۇسەدى. مۇنداي جاعدايدا نە ىستەۋ كەرەگىن Fingramota.kz تۇسىندىردى.
ءسىز قاتەلەسىپ، اقشانى بەيتانىس ادامنىڭ شوتىنا اۋداردىڭىز
ءسىز تەلەفون ءنومىرى بويىنشا جەدەل تولەم نەمەسە اۋدارىم جاساۋ كەزىندە ءبىر ساننان قاتە جىبەردىڭىز. اقشانى قايتارۋ قيىن بولعانىمەن، ول مۇمكىن. قاراجاتتى جىبەرگەن اداممەن حابارلاسىپ، جاعدايدى ءتۇسىندىرىپ، تۇسكەن سومانى قايتارۋىن سۇراڭىز. ول سىزگە سەنىپ، الاياق دەپ قاتەلەسپەۋى ءۇشىن شوتتى تەكسەرۋدى ۇسىنىڭىز. الۋشى ءسىزدىڭ جاعدايىڭىزدى ءتۇسىنىپ، اقشانى كەرى اۋدارىم ارقىلى قايتارا الادى. ەگەر ول اقشانى قايتارۋدان باس تارتسا سوتقا جۇگىنىپ، اقشانى ءوندىرىپ الۋ تۋرالى تالاپ- ارىز بەرە الاسىز، ويتكەنى ق ر ازاماتتىق كودەكسىنىڭ زاڭناماسىنا سايكەس بۇل ارەكەت "نەگىزسىز بايۋ" رەتىندە قارالادى. سونداي-اق، ءسىز ق ر ۇلتتىق بانكىنىڭ قولدانىستاعى قايتا قارجىلاندىرۋ مولشەرلەمەسى بويىنشا اقشاڭىزدى پايدالانعانى ءۇشىن سىياقى ءوندىرىپ الا الاسىز.
ەگەر ءسىز اقشانى دۇرىس ەمەس كارتا نەمەسە شوت ءنومىرى بويىنشا قاتە جىبەرگەن بولساڭىز، بانككە حابارلاسىپ، ءبارىن ءتۇسىندىرىپ، مەنەدجەردەن اقشانى قالاي قايتارۋعا بولاتىنىن ءبىلۋىڭىز كەرەك. ءبىراق بۇل جاعدايدا بانك تولەمدى ءبىرجاقتى تارتىپپەن قايتارىپ بەرە المايدى. ءار بانكتىڭ وسىنداي ماسەلەنى شەشۋدىڭ وزىندىك ءراسىمى بار. كوبىنەسە، ەگەر اۋدارىم دۇرىس ەمەس بانكتىك شوتقا جىبەرىلسە، اقشانى الۋشىنىڭ كەلىسىمىمەن عانا قايتارۋعا بولادى.
ەگەر قاراجات ءالى وندىرىستە بولسا، وندا اقشانى قايتارىپ الۋعا بولادى. ەگەر ءسىز قاتەلەسىپ، تىركەلمەگەن بانكتىڭ دەرەگىن كورسەتسەڭىز، تولەم جاسالماي، اقشا اۆتوماتتى تۇردە قايتارىلادى.
سىزگە بەيتانىس ادامنان قاتە اۋدارىم كەلدى، نە ىستەۋ كەرەك؟
زاڭ بويىنشا ءسىز جىبەرۋشىنىڭ اڭگىمەسىن تىڭداپ، اقشاسىن قايتارۋ ءۇشىن ۋاقىتىڭىزدى جۇمساۋعا مىندەتتى ەمەسسىز. دەگەنمەن، اقشانى جونەلتۋشىگە قايتارعان دۇرىس، ويتكەنى ول كەز كەلگەن ۋاقىتتا ءسىزدى سوتقا بەرە الادى. ءبىراق الدىمەن ءسىزدىڭ شوتىڭىزعا شىنىمەن اقشا تۇسكەنىنە، بۇل قارجىلىق الاياقتاردىڭ ايلا- امالدارى ەمەس ەكەنىنە كوز جەتكىزۋىڭىز كەرەك.
ءتۇرلى جاعدايلار بولادى. شوتىڭىزعا بەيتانىس ادامنان تۇسكەن اقشا سىزگە تيەسىلى بولۋى مۇمكىن. مىسالى، دوسىڭىز سىزگە بۇرىن قارىزعا العان اقشاسىن ءۇشىنشى ادامنىڭ نومىرىنەن جىبەردى نەمەسە جۇمىس ورنىنان قايتا ەسەپتەۋ ناتيجەسىنەن تۇسكەن قاراجات. سوندىقتان بۇل جالعان ەمەس، قاتە اۋدارىم ەكەنىنە كوز جەتكىزىڭىز.
ەسىڭىزدە بولسىن، الاياقتار كوبىنەسە بانك پەن باسقا قارجى ۇيىمدارىنىڭ اتىنان ءسىزدىڭ شوتىڭىزعا بەلگىلى ءبىر سومانىڭ تۇسكەنى تۋرالى SMS-حابارلاما جىبەرەدى، سودان كەيىن قوڭىراۋ شالىپ، قايتارۋدى سۇرايدى. سوندىقتان، كەرى اۋدارىم جاساماس بۇرىن، قاراجاتتىڭ شىنىمەن تۇسكەنىنە كوز جەتكىزىڭىز. مۇنى موبيلدى بانكتىك قوسىمشا ارقىلى نەمەسە بانك وپەراتورىنا رەسمي نومىرمەن حابارلاسۋ ارقىلى بىلە الاسىز.
اقشانىڭ كىمنەن جانە قاشان تۇسكەنىن انىقتاۋ ءۇشىن موبيلدى قوسىمشا نەمەسە ونلاين- پورتال ارقىلى شوتىڭىزدىڭ اۋدارىمدار تاريحىن قاراپ شىعىڭىز. ەگەر ءسىز اقشا اۋدارىمىنىڭ قاتە ەكەنىنە 100 پايىز سەنىمدى بولىپ، جىبەرۋشى سىزبەن بايلانىسپاعان بولسا، بانككە حابارلاسىڭىز. سومانى قايتارۋعا كەلىسىم بەرۋ تۋرالى جازباشا ءوتىنىش جازىڭىز، قارجى ينستيتۋتى ق ر زاڭناماسى بويىنشا تولەمدى قايتارۋ راسىمىنە سايكەس كەرى تولەم جۇرگىزەدى.
قاتە اۋدارىمنىڭ الدىن قالاي الۋعا بولادى؟
اقشانى قاتە اۋدارۋدىڭ الدىن الۋ وتە وڭاي. ترانزاكتسيانى باستاماس بۇرىن ءاردايىم مالىمەتتى مۇقيات تەكسەرىڭىز. باسقا شوتقا اقشا اۋدارۋ فورماسىن تولتىرعان كەزدە كارتا دەرەكتەمەلەرى مەن تەلەفون ءنومىرىن ەكى رەت تەكسەرىڭىز.
تاعى ءبىر اقىلعا قونىمدى كەڭەس - الدىمەن الۋشىنىڭ دەرەكتەمەلەرىنىڭ دۇرىستىعىن ەكى رەت تەكسەرۋ ءۇشىن شاعىن سوما جىبەرىڭىز. الۋشى راستاعاننان كەيىن قالعان سومانى قايتا جىبەرىڭىز. بۇل جاقسى تاجىريبە جانە ءسىزدىڭ ترانزاكسياڭىزدىڭ الۋشىعا جەتكىزىلۋىن قامتاماسىز ەتۋدىڭ ەڭ جاقسى ءتاسىلى.
اقشا اۋدارعان كەزدە ءاردايىم مۇقيات بولىڭىز. بىرنەشە رەت تەكسەرۋگە جۇمسالعان بىرنەشە مينۋت ءسىزدىڭ ەڭبەكپەن تاپقان اقشاڭىزدى جوعالۋدان ساقتايدى.
