بلينكەن تۇركيانىڭ سىرتقى ىستەر مينيسترىمەن كەزدەستى
تاياۋ شىعىسقا ساپارى اياسىندا ا ق ش مەملەكەتتىك حاتشىسى ەنتوني بلينكەن انكاراعا كەلىپ، تۇركيا سىرتقى ىستەر ءمينيسترى حاكان فيدانمەن كەزدەستى.
كەلىسسوزدەر جابىق ەسىك جاعدايىندا ءوتتى، دەپ حابارلايدى Kazinform اگەنتتىگى BBC جاڭالىقتارىنا سىلتەمە جاساپ.
ونىڭ تۇركياعا ساپارى ەلدەگى انتيامەريكالىق كوڭىل-كۇيدىڭ كۇشەيۋى اياسىندا بولدى. جەكسەنبى كۇنى پوليتسيا ا ق ش اسكەرى ورنالاسقان اۆيابازاعا كىرۋگە ارەكەتتەنگەن پالەستينالىق شەرۋشىلەر توبىن توقتاتۋعا ءماجبۇر بولدى.
تۇركيا پرەزيدەنتى رەجەپ تايىپ ەردوعان گازاداعى قانتوگىستى توقتاتىپ، پالەستينالىقتاردى يزرايلدىڭ «قىسىمىنان» قۇتقارۋدى ءوز ەلىنىڭ مىندەتى دەپ اتادى.
سوعىس باستالعاننان كەيىن يزرايل مەن تۇركيا اراسىنداعى بايلانىس ناشارلاپ، ەكى ەل دە ديپلوماتتارىن قايتارىپ الدى. ەردوعان يزرايل پرەمەر-ءمينيسترى بينيامين نەتانياحۋدى «ەسەپتەن شىعاراتىنىن»، ءبىراق تۇركيانىڭ يزرايلمەن بايلانىسىن ۇزگىسى كەلمەيتىنىن ايتتى.
بلينكەن بۇعان دەيىن يزرايلگە بارىپ، گۋمانيتارلىق كومەك جەتكىزۋدى جەڭىلدەتۋ ءۇشىن گازا سەكتورىنداعى اسكەري ارەكەتتەردى ۋاقىتشا توقتاتۋدى سۇرادى. ودان كەيىن باتىس جاعالاۋ، يوردانيا جانە يراك باسشىلارىمەن، مينيسترلەرىمەن كەزدەسۋلەر وتكىزدى.
