بەلگىلى ءانشى گۇلنار سيقىمبايەۆا دۇنيەدەن وزدى

گۇلنار ەرمەك قىزى سيقىمبايەۆا 1961 -جىلى تۇركىستان وبلىسى تولەبي اۋدانىندا دۇنيەگە كەلگەن. ەسترادا ءانشىسى «گۇلدەر» انسامبلىندە ەڭبەك ەتىپ، ونەرسۇيەر قاۋىمعا «مەن ساعان وكپەلەمەيمىن»، «مەرەكەم - سەن»، «اياۋلىم» اندەرىمەن كەڭىنەن تانىلدى. 2000-جىلداردىڭ باسىندا «حابار» تەلەارناسى تۇسىرگەن «ۇيات بولماسىن» باعدارلاماسىنىڭ بەلسەندى قاتىسۋشىسى رەتىندە دە كورەرمەن قاۋىمعا جاقسى تانىمال.

الايدا سوڭعى جىلدارى ءانشى ساحنا تورىنەن كورىنبەي كەتتى.

گۇلنار ەرمەك قىزى ءومىرىنىڭ سوڭعى جىلدارىندا قازاق مەملەكەتتىك قىزدار پەداگوگيكالىق ۋنيۆەرسيتەتىندە ساباق بەرىپ، ستۋدەنتتەرگە ءدارىس وقۋمەن اينالىستى.

«اعا وقىتۋشى دەگەن دارەجەم بار. جالپى، بۇل جۇمىسقا وسى وقۋ ورنىنداعى ونەر جانە مادەنيەت كافەدراسىنىڭ مەڭگەرۋشىسى گۇلنۇر ومىربايەۆا شاقىرعان بولاتىن. شىنىن ايتۋ كەرەك، ءبىزدىڭ جاسىمىزدا انشىلىك ونەردى تاستاماي، جالعاستىرۋ ءبىرشاما قيىندىق تۋدىرادى. ول ءۇشىن ۇنەمى كونسەرت، ءىسساپارلاردا ءجۇرۋ كەرەك. وتباسى، بالا-شاعا، تىرشىلىك قامى بار دەگەندەي... ايتەۋىر، قازىر ۇستاز بولىپ، ءدارىس وقىپ ءجۇرمىن»، - دەپ سۇحبات بەرگەن بولاتىن كوزى تىرىسىندە مارقۇم.

گۇلنار سيقىمبايەۆانىڭ سوڭعى جىلدارى دەنساۋلىعى بولماي، بۇيرەگى سىرقاتتانىپ، ارنايى اپپارات ارقىلى ەم الىپ جۇرگەن بولاتىن.

مارقۇمنىڭ جانازاسى 6-قازان كۇنى ساعات 12.00-دە تۇركىستان وبلىسى تولەبي اۋدانى جامبىل اۋىلىنداعى ءوزى تۋىپ-وسكەن قارا شاڭىراقتا وتپەك.

اۆتور
اسحات رايقۇل

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى