بەلگيانىڭ ەڭ ءىرى كومپانياسى قازاقستاندا لوگيستيكالىق ورتالىق سالماق
الماتى. KAZINFORM - بەلگيانىڭ Ahlers حالىقارالىق لوگيستيكالىق كومپانياسى كەلەسى جىلى الماتى ماڭىندا ءىرى لوگيستيكالىق ورتالىق سالۋدى جوسپارلاپ وتىر.
بۇل تۋرالى kazinform تىلشىسىنە بەنيليۋكس ساۋدا پالاتاسىنىڭ پرەزيدەنتى دەنيس ۆان دەن ۆەيح ايتتى.
ونىڭ ايتۋىنشا، كومپانيا بەس جىل ىشىندە قۇرىلىسقا 80 ميلليوننان 120 ميلليون دوللارعا دەيىن ينۆەستيتسيا سالادى.
«لوگيستيكالىق ورتالىق وتە قاجەت، ويتكەنى ول شاعىن جانە ورتا بيزنەستى دامىتۋعا ىقپال ەتەدى. سونىمەن قاتار ۋاقىتشا ساقتاۋ قويمالارىندا جۇكتەردىڭ ايتارلىقتاي كولەمىن ساقتاۋعا جانە وڭدەۋگە مۇمكىندىك بەرەدى. تاۋارلاردى ۋاقىتىلى جەتكىزۋ، نارىق قاجەتتىلىكتەرىن ورىندايدى»، - دەدى ول.
ول الەمدەگى گەوساياسي تۇراقسىزدىق جاعدايىندا ەكى ەلدىڭ ساۋدا-ەكونوميكالىق ىنتىماقتاستىعىن كەڭەيتۋ قاجەتتىگىن جانە جاڭا كولىك ءدالىزى ەكسپورتتاۋشىلارعا بۇدان دا كوپ مۇمكىندىك بەرەتىنىن اتاپ ءوتتى.
«كەزدەسۋدە لوگيستيكادان بولەك، مەديتسينالىق ماسەلەلەردى دە تالقىلادىق. بەلگيادا الەمدىك ستاندارتتارعا ساي وزىق تەحنولوگيالارى مەن زاماناۋي قۇرالدارى بار مەديتسينالىق كومپانيالار جۇمىس ىستەيدى. ءبىزدىڭ تاجىريبەمىز بەن تەحنولوگيالارىمىز قازاقستاننىڭ اۋرۋحانالارىندا دا قولدانىلۋى مۇمكىن»، - دەپ قوستى ول.
دەنيس ۆان دەن ۆەيح قازاقستاننىڭ بەلگياعا ەكسپورتىنىڭ نەگىزگى تاۋارلارى: موليبدەن رۋدالارى مەن كونسەنتراتتارى، حروم وكسيدتەرى مەن گيدروكسيدتەرى، زىعىر تۇقىمدارى، تيتان جانە ودان جاسالعان بۇيىمدار، كومىر، بيداي، وزدىگىنەن جۇرەتىن ماشينالار، ەتيل ءسپيرتى، ماشينالارعا، جابدىقتارعا جانە كولىكتەرگە ارنالعان ترانسميسسيالىق مەحانيزمدەر ەكەنىن تىلگە تيەك ەتتى.
«ال بەلگيادان قازاقستاندىق يمپورتتىڭ نەگىزگى تاۋارلارى: تراكتورلار مەن جۇك كولىگى تراكتورلارى، مۇناي ونىمدەرى، اۋىلشارۋاشىلىق داقىلدارىن جيناۋعا جانە باستىرۋعا ارنالعان ماشينالار مەن مەحانيزمدەر، بولشەك ساۋداعا ورالعان ءدارى- دارمەكتەر، ۆاكسينالار، قان سارىسۋى، قان، اۋا نەمەسە ۆاكۋۋمدىق سورعىلار، كومپرەسسورلار مەن جەلدەتكىشتەر، تەحنيكا جانە ارنايى ماقساتتاعى مەحانيكالىق قۇرىلعىلار، پوليەفيرلەر، ەپوكسيدتى شايىرلارى»، - دەپ ءتۇسىندىردى سپيكەر.
بۇعان دەيىن، قازاقستان مەن بەلگيا اراسىنداعى تاۋار اينالىمى 523 ميلليون دوللاردان اسقانى تۋرالى جازعان ەدىك.
ايتا كەتەيىك، الماتىدا «قازاقستان- بەلگيا» ىسكەرلىك كەڭەسىنىڭ ەكىنشى وتىرىسى ءوتتى.
