بەلگيالىق جانىبەك جۇماعۇلوۆتىڭ تۋعان اناسىن تابۋعا قاتىستى ءىس باس پروكۋراتۋراعا جىبەرىلدى

وسى ورايدا Kazinform اگەنتتىگىنىڭ ءتىلشىسى وتانداسىمىزدىڭ اناسىن ىزدەستىرۋ جۇمىستارىنىڭ بارىسىمەن تانىسۋ ءۇشىن جانىبەك جۇماعۇلوۆتىڭ قازاقستانداعى رەسمي وكىلى قىمبات دوسجانمەن سۇحباتتاسقان ەدى.

«2004 -جىلى قازاقستاننان اسىراپ الىنعان جانىبەك جۇماعۇلوۆتىڭ تۋعان اناسىن ىزدەۋمەن اينالىسقانىمىزعا ءبىر جارىم ايدان استى. وسى ۋاقىت ىشىندە ءبىراز دەرەك جينادىق جانە كەيبىر جايتتاردى قۇقىق قورعاۋ ورگاندارىنىڭ كومەگىنسىز جاساي المايتىنىمىزدى تۇسىندىك. وسى ورايدا ءبىز (جانىبەك جۇماعۇلوۆ، قىمبات دوسجان جانىبەكتىڭ قازاقستانداعى رەسمي وكىلى) ارقالىق قالالىق پوليتسيا دەپارتامەنتىنە «سالعىرتتىق» (نەمقۇرايلىلىق) دەگەن باپپەن ءىس قوزعاۋ تۋرالى ارىز جازدىق. الايدا ءىستى قىلمىستىق قۇرامى جوق دەپ جاۋىپ تاستادى»، - دەدى قىمبات دوسجان.

رەسمي وكىلدىڭ ايتۋىنشا، جانىبەك جۇماعۇلوۆ ەلىمىزگە تۋعان اناسىن ىزدەپ كەلگەن جانە قازاقستانعا كەلۋ ءۇشىن ول 6 اي بويى تابىسىن ۇنەمدەپ، جيناعان. جەرلەسىمىز الەۋمەتتىك جەلىدە تۋعان اناسىن ىزدەۋ تۋرالى ۆيدەو حابارلامادا ءوزىن دجاني دەپ تانىستىرعان، جاسى 21-دە.

سونىمەن قاتار ق. دوسجان اتالعان ماسەلەنى قاراۋدى باس پروكۋراتۋراعا جىبەرگەنىن ءمالىم ەتتى.

«ارىزدا ساراپتامالىق زەرتتەۋلەردىڭ ناتيجەسى مەن جانىبەكتى اسىراپ الۋعا قاتىستى ءوزىمىز كوز جەتكىزگەن مالىمەتتەر كورسەتىلدى. باس پروكۋراتۋراعا ءوتىنىشتى بالالاردى شەتەل اسىرۋ، ياعني قىلمىستىق قۇرامى بار باپقا سۇيەنە وتىرىپ جازدىق. ازىرگە وسى جايت تۋرالى تولىق مالىمەتتى اشىپ ايتا المايمىن. پروكۋراتۋرانىڭ جاۋابىن كۇتەمىز. جانىبەكتى اسىراپ العان بەلگيا ازاماتى وعان قاتىستى دەرەكتەر مەن سۋرەتىن ەلەكتروندى پوشتا ارقىلى العان. ول كەزدە حالىقارالىق بالا اسىراپ الۋ تۋرالى اگەنتتىكتەرى ءبىزدىڭ ەلىمىزدە، ودان بولەك، رەسەي، تۇركيا تاعى باسقا مەملەكەتتەردە جۇمىس ىستەدى»، - دەيدى ول.

سونداي- اق، سپيكەر ول كەزدە (2000 -جىلداردىڭ باسى) ەلىمىزدە بالالاردى شەتەل ازاماتتارىنا اسىرۋعا بەرۋگە قاتىستى بازا بولماعانىن ايتتى.

ودان بولەك، رەسمي وكىلمەن سۇحبات بارىسىندا جانىبەكتى اسىراپ العان بەلگيالىق ازاماتتىڭ قازاقستانعا كەلگەندە لاۋازىمدى تۇلعاعا ءىرى كولەمدە اقشا بەرگەنى بەلگىلى بولدى.

«جانىبەكتىڭ تۋعان جەرىنە ساپارى ءبىراز بىلىقتىڭ بەتىن اشقالى تۇر. سەبەبى سول كەزدە ارقالىقتاعى بالالار ۇيىندە جۇمىس ىستەگەن قىزمەتكەرلەر ءالى دە ورنىندا ءجۇر. مەن جانىبەكتىڭ اناسىمىن دەپ كەلگەن ايەل بولدى، ءبىراق د ن ك- ى سايكەس كەلمەدى. تۋعان اناسىن ازىرگە تابا الماي جاتىرمىز. قازىر بار ۋاقىتىمىزدى وسى ىسكە ارناپ جاتىرمىز جانە جانىبەكتىڭ تۋعان اناسىن ىزدەۋ جانە ءىستىڭ ءمان جايىن انىقتاۋ جۇمىسى توقتامايدى»، - دەپ تولىقتىردى قىمبات دوسجان.

اۆتور

داۋلەت ىزتىلەۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى