بەلسەندى ۇزاق ءومىر ءسۇرۋ ورتالىعىندا ءوزىمىزدى جايلى سەزىنەمىز - اقتوبەلىك قاريالار

اقتوبە وبلىسىندا 16 بەلسەندى ءومىر ءسۇرۋ ورتالىعى بار

اقتوبە قالاسىنىڭ بىرنەشە تۇرعىن الابىندا بەلسەندى ۇزاق ءومىر ءسۇرۋ ورتالىعى اشىلعان. قالا اكىمىنىڭ باسپا ءسوز حاتشىسى ايگۇل بايمەنوۆانىڭ ايتۋىنشا، جەرگىلىكتى بيۋجەتتەن 150 ميلليون تەڭگە بولىنگەن.

ءار ورتالىق ايىنا شامامەن 200-250 ادامدى قابىلداپ وتىر. ال وبلىس بويىنشا مۇنداي ورتالىق سانى - 16. قالادا التاۋى بولسا، قوبدا، العا، حرومتاۋ، ويىل، مارتوك، ايتەكە ءبي، شالقار، قارعالى، تەمىر اۋداندارىنىڭ ءارقايسىسىندا ءبىر-ەكى جەردە قاريالار جينالادى.

- جىل باسىنان بەرى اقتوبە قالاسىنىڭ 6 ورتالىعىندا 807، العاعا 277، شالقاردا 280، ويىلدا 102، قارعالىدا 70 ادام، حرومتاۋدا 93، قوبدادا 70، تەمىردە 70، مارتوكتە 30، ايتەكە بيدە 66 ادام، ياعني، بارلىعى 1865 ادام قابىلداندى. ورتالىقتىڭ نەگىزگى ماقساتى - بەلسەندى قارتتاردىڭ ءومىر ءسۇرۋ جاسىن، مۇمكىندىگىن ۇلعايتۋ، سالاۋاتتى ءومىر سالتىن ۇستانۋ باعدارلامالارىن ۇسىنۋ.

IT باعىتى بويىنشا كومپيۋتەرلىك ساۋاتتىلىقتى ارتتىرۋ، قىزىعۋشىلىعىنا بايلانىستى شاحمات، دويبى، توعىزقۇمالاق سياقتى سپورتتىق ويىندارمەن اينالىساتىن مۇمكىندىكتەرىدى قاراستىرۋ، - دەدى اقتوبە وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى اسلانبەك سۇيىنشاليەۆ.

بۇل ۇلكەندەرگە ارنالعان ۇيىرمە دەپ ايتۋعا بولادى - اكىمشى

اقتوبە قالاسى مارەسيەۆ كوشەسىندەگى بەلسەندى ۇزاق ءومىر ءسۇرۋ ورتالىعى دۇيسەنبى- جۇما ارالىعىندا ساعات 9:00-دەن 17:00-گە دەيىن جۇمىس ىستەيدى. زەينەتكەرلەر ءبي، ۆوكال، قولونەر، اعىلشىن ءتىلى ۇيىرمەلەرىنە قاتىسىپ، پسيحولوگتەردىڭ ترەنينگتەرىندە اڭگىمەلەسەدى. سونىمەن بىرگە گيمناستيكامەن اينالىسىپ، سكانديناۆيالىق جۇرىستە شىنىعادى. IT ساۋات ارتتىرۋ ءۇشىن تەلەفونداعى قوسىمشالارمەن جۇمىس ىستەۋدى ۇيرەتەدى. سونىمەن بىرگە جازدا تابيعات اياسىنا شىعىپ، تاريحي ورىنداردى ارالايدى. مۇنىڭ ءبارى تەگىن قىزمەت. ال مەرەكە كۇندەرى جينالىپ، ءوز ونەرىن ورتاعا سالادى.

- كەلۋشىلەردىڭ جاس ايىرماشىلىعى ءارتۇرلى. ەڭ ۇلكەنى - 85 جاستا، كىشىسى 60 تان اسقان. مۇندا ەشكىم ءوزىن زەينەتكەرمىن دەپ سەزىنبەيدى. اپالارىمىز وتە بەلسەندى. كەلۋ، جازىلۋدىڭ ەش قيىندىعى جوق. ءتولقۇجات پەن زەينەتكەرلىك كۋالىكتى كورسەتسە، تىركەي بەرەمىز. قالا بويىنشا التى ورتالىق جۇمىس ىستەپ تۇر. ورتالىققا قازان ايىندا 50 دەن استام ادام تىركەلگەن ەكەن. مۇندا جاسى ۇلكەن ادامدار كەلەتىن بولعان سوڭ قۇرامى وزگەرىپ وتىرادى. كەيبىرى وتا جاساتۋعا كەتسە، كەيبىرى اۋىرىپ قالادى، جەكە جۇمىستارىمەن كەتەدى، - دەدى بەلسەندى ءومىر ءسۇرۋ ورتالىعىنىڭ اكىمشىسى گۇلدانا شاراپوۆا.

ونىڭ ايتۋىنشا، كەلۋشىلەر العاشىندا «ولەڭ ايتا المايمىن، بيلەمەيمىن» دەپ كوبىنەن باس تارتادى. ۋاقىت وتە كەلە ءوز زامانداستارىنىڭ اراسىندا اشىلىپ، جاڭا قىرىنان تانىلادى.

- پسيحولوگيالىق ترەنينگتە بارىنە كومەك بەرىلەدى. ءالى قول موتوريكاسىن دامىتۋعا، ءسويتىپ ەستە ساقتاۋ قابىلەتىن ارتتىرۋعا مۇمكىندىك بار. قىزىعىپ، ۇيرەنىپ كەتەدى. قولونەرمەن قاتار ارت تەراپيا دا بار. وندا ۇلكەن كىسىلەر سۋرەت سالادى. قولونەردە جىپتەن اياق كيىم، مونشاقتان سومكە توقىدى. قازىر ىستىق جەلىمدى جانە جىلتىر ۇنتاقتى پايدالانىپ، گۇل دە جاسايدى. ءبىر ادام قانشا ۋاقىت جۇرگىسى كەلسە، سونشا جۇرەدى. شەكتەۋ، تالاپ جوق. كەيبىرى ءبىر-ەكى ساباققا قاتىسىپ، كەتىپ قالادى. كەيبىرى كۇنۇزاققا جۇرەدى. ءار كۇنگە ارنالعان كەستە بار. بۇل ۇلكەندەردىڭ ۇيىرمەسى دەپ تە ايتۋعا بولادى. كوبىنە مۇعالىمدەر كەلەدى ورتالىققا. دارىگەرلەر، قارجىگەرلەر دە بار. 60-70 پايىزى مۇعالىمدەر بىزدە، - دەدى گۇلدانا شاراپوۆا.

زەينەتكە شىققان سوڭ ءوز-ءوزىمدى تابا الماي قينالدىم - نۇرسۇلۋ كلەنوۆا

ۇزاق جىلدار بويى تىنىمسىز جۇمىس ىستەپ، بالاسىن ءوسىرىپ، ەل قاتارىنا قوسقان اجەلەردى وسى جەردەن كەزىكتىرۋگە بولادى. ولار قازىر جاس كۇنىندە ۋاقىت تاپپاعان بار ىستەرمەن شۇعىلدانادى. بيلەيدى، قوسىلىپ ءان شىرقايدى. قولىنا ينە مەن ءجىپ الىپ، كەرەمەت دۇنيەلەر جاسايدى. سونىمەن بىرگە دەنساۋلىعىن قايتا قالپىنا كەلتىرىپ ءجۇر.

- وسى ورتالىققا ءۇش جىلدان بەرى كەلىپ ءجۇرمىن. بيىل مەكەنجايى وزگەرىپ، جاڭا ورتادا باسىمىز قايتا قوسىلدى. بەلسەندى ءومىر ءسۇرۋ ورتالىعى جانعا جايلى مەكەنىمىزگە اينالدى. مۇندا ءتۇرلى ءىس-شارامىز وتەدى. ءبىز سياقتى ۇلكەن كىسىلەرگە بۇل ورتالىق ۇنايدى. مەن ءماز بولىپ كەلەمىن. ءبىز تويعا، ءتۇرلى باسقوسۋعا بارعاندا ەمەس، وسىندا كەلگەندە ءوزىمدى جاقسى سەزىنەمىز. مۇندا ءبارىمىز قاتارمىز، ءبىر- ءبىرىمىزدى تۇسىنەمىز. بيلەيمىز، ءان ايتامىز. سونىمەن بىرگە اعىلشىن ءتىلىن ۇيرەنەمىز، پسيحولوگيالىق ترەنينگ تە ءساتتى ۇيىمداستىرىلادى. ورتالىق اكىمشىسى دە ءبىزدىڭ كوڭىلىمىزگە قارايدى. ناعىز دوستى دا تاپقانداي بولامىز. ءبىر كوپقاباتتى ۇيدە تۇرىپ، تالاي جىل ءبىر-ءبىرىمىزدى كورمەي، ورتالىقتا تانىسقان جايىمىز دا بار، - دەيدى اقتوبەلىك نۇرسۇلۋ كلەنوۆا.

ونىڭ ايتۋىنشا، زەينەتكە شىققان سوڭ قايدا بارىپ، نە ىستەرىن بىلمەي قينالدى. ءبىر بىلەرى، ۇيدە وتىرماي، دەنساۋلىعىن كۇتۋ كەرەك. وعان جاياۋ ءجۇرۋ كوپ كومەك بولارىن سەزدى.

- زەينەتكە شىققاندا ماعان قيىن بولدى. وتىرىپ قالماي، جۇرگىم كەلدى. شارۋا شىعىپ قالسا، اۆتوبۋسقا وتىرامىز. ال مىندا يوگا، سكانديناۆايالىق ءجۇرىس بار. وتە جاقسى. بۇرىن اۆتوۆوزكالدا كاسسير بولىپ، كەيىن ساۋداعا شىقتىم. زەينەتكە شىققان سوڭ ءوز-ءوزىمدى تابا الماي قينالدىم. قوناققا شاقىرادى، بارىپ، وتىرىپ قايتامىز. ءتىپتى العاشقى كۇندەرى قالاداعى اللەيا، ساياباقتاردى كەزىپ ءجۇردىم. قولىما سومكە ۇستاپ الامىن. جۇرت «نە ىستەپ ءجۇر» دەپ ايتپاس ءۇشىن، وسىلاي جاساۋشى ەدىم. قازىر جاقسى. جىل باسىندا ورتالىق جۇمىس ىستەمەدى. ول كەزدە بۇرىنعى توپ تاعى زامانداستارىممەن ساياباقتارعا بارىپ، ءدامحانادا باس قوسامىز. قۋانامىز، ءبىر-ءبىرىمىزدى كورگەندە.

تويعا بارساق اۋزىمىزدى اشىپ، اڭگىمە ايتا المايمىز. مۋزىكا، بي، ايقاي- شۋ بولسا، مۇندا ءبارى كەرەمەت. سوندىقتان باسشىلارعا دا العىس ايتامىن. وسى ورتالىققا كەلگەلى قان قىسىمىم قالىپقا كەلدى. ادام كوپ جۇرسە، دەنە جاتتىعۋىن جاساسا، وتە پايدالى ەكەن، - دەدى ول.

بىزگە مۇعالىمدەر «حانىمدار» دەپ ايتادى - داراجا سارسەنوۆا

ال 65 جاستاعى داراجا سارسەنوۆا بۇرىن ەسەپشى بولعان. ورتالىققا كەلىپ جۇرگەنىنە ءۇش جىل تولدى. ول دا دەنە جاتتىعۋلارىن جاساپ، يوگا ۇيىرمەسىنە قاتىسقاندى، سكانديناۆيالىق ءجۇرىستى ۇناتادى. ال مەيىربيكەلەر بولسا، قان قىسىمىن ولشەپ، باعىت-باعدار بەرىپ وتىرادى.

- جاسىمىزدا ايىرماشىلىق بولعانىمەن، تاتۋمىز. ءبىر ءۇيدىڭ ادامىنداي جۇرەمىز. ەشكىم ءبىر-بىرىنە اپا دەپ ايتپايدى. حانىمدار دەپ ايتادى مۇعالىمدەر. ءبارىنىڭ وتباسى، بالا-شاعاسى، نەمەرەلەرى بار. ءبىزدىڭ بالالارىمىز ءوستى. ەندى جاس كەزىمىزدە ۇلگەرە الماعان جۇمىستى قازىر قولعا الدىق. شاحمات، دويبى ويناپ، تۋرنيرگە قاتىسامىز. ترياتلون پارككە دە بارىپ، جۇرەمىز. سەنبى، جەكسەنبى كۇنى بولسا، ءوز ەركىمىزبەن شىعىپ، ساياباقتا جۇرەمىز. بىزدەر بۇرىن بالالارىمىزدى بالاباقشاعا اپاراتىن ەدىك. قازىر بۇل جەردى ۇلكەندەرگە ارنالعان بالاباقشا دەۋگە بولادى. جاقسى قارسى الادى، شايىمىزدى دا بەرەدى. ءوزىمىزدىڭ ورتاق چاتىمىز بار. «سۇلۋلار»، «ارمانداستار»، «اكتيۆنىي» دەپ اتالادى. قاي جەردە جۇرسەك تە نيەت ءبىر، - دەدى داراجا سارسەنوۆا.

ورتالىق كەلۋشىلەرى قاتارعا ەندى قوسىلعانداردى جاتىرقاماي، قۇشاق جايا قارسى الادى. ءتىپتى كورگەن-بىلگەنىن ۇيرەتەدى.

ورتالىقتا ەر ادامدار از

بەلسەندى ۇزاق ءومىر ءسۇرۋ ورتالىعىندا كوبىنە اجەلەر جۇرەدى. مۇندا ەر ادامدار وتە از. بۇرىن اقتوبەدەگى ۇشقىشتار دايارلايتىن جوعارى وقۋ ورنىندا قىزمەت ەتكەن ورازعالي شارماعامبەتوۆتىڭ ايتۋىنشا، بۇل ونىڭ كۇندە تاڭەرتەڭنەن كەشكە دەيىن ۋاقىتتى ءتيىمدى وتكىزەتىن ورنى. زامانداستارىمەن بىرگە سكانديناۆيالىق ءجۇرىس، دەنە جاتتىعۋىنا قاتىسىپ، ءبي، ءان، اعىلشىن ءتىلىن ۇيرەنەدى. ال تاتيانا ەرموشكينا بولسا 76 جاسقا تولادى. ورتالىق اشىلعان ساتتەن باستاپ كەلىپ، ۋاقىتتى ءتيىمدى وتكىزىپ ءجۇر. بالاسى مەن نەمەرەلەرى بار، حابارلاسىپ تۇرادى. ال ءوزى وسى ورتالىقتى جايلى مەكەنىنە اينالدىرعان. ءان ايتىپ، ءبي بيلەگەندى ۇناتادى. رايدا جاقاسوۆا دا ءۇش جىلدان بەرى وسىندا. زامانداستارىنا بەت كۇتىمى تۋرالى ايتىپ، ۇيرەتۋدەن جالىققان ەمەس. سۋرەت تە سالادى. بۇرىنعى حوببيلەرىن قايتا جاڭعىرتتى. قاريالار ءسويتىپ بۇل مەكەندى جانعا جايلى ورىنعا اينالدىرعان.

اۆتور

التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى