ەڭبەك مينيسترلىگى سۇرانىسقا يە ماماندىقتار مەن قىزمەتتەردى اتادى
ەڭبەك مينيسترلىگى قازىر نارىق سۇرانىسىنا يە ماماندىقتار مەن قىزمەتتەردى اتادى، دەپ حابارلايدى قازاقپارات ءتىلشىسى.
«بىزدە ارنايى ورتالىق ەڭبەك نارىعىنا تالداۋ جۇرگىزەدى. سونىڭ ناتيجەسىندە اي سايىن ەل اۋماعىندا قانداي ماماندىقتارعا سۇرانىستىڭ بارى انىقتالادى. قازىر الدىمەن گۋمانيتارلىق سالا ماماندىقتارى، قىزمەت كورسەتۋ جانە IT ماماندارى سۇرانىسقا يە. ءبىز 2030-جىلعا قاراي ورتا مەرزىمگە ەڭبەك نارىعىنا تالداۋ جاسايمىز. سول ارقىلى توپ-10 ماماندىق يەسى انىقتالادى»، - دەدى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز حاتشىسى ساكەن دىلداحمەت ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، بۇگىندە جۇمىس ىزدەپ، تابۋدىڭ زاماناۋي ءتۇرلى ادىستەرى بار.
«پاندەميادان كەيىن جۇمىس فورماتتارى وزگەردى. مىسالى، ونلاين جۇمىس، فريلانسەر، جارتى كۇندىك جۇمىس، كۋرەرلىك جانە تاكسي قىزمەتى. جىل ساناپ ەڭبەك نارىعىنىڭ اياسى كەڭەيىپ كەلەدى»، - دەيدى ول.
ەڭبەك جانە حالىقتى الەۋمەتتىك قورعاۋ ءبىرىنشى ۆيتسە- ءمينيسترى اقمادي سارباسوۆتىڭ مالىمدەۋىنشە، ەكونوميكانىڭ شامامەن 8 سالاسىنا باعالاۋ جۇرگىزىلدى.
ايتۋىنشا، 200 گە جۋىق جاڭا كاسىپ، 100 گە جۋىق ترانسفورماتسيالاۋشى كاسىپ انىقتالدى. سونداي- اق الداعى جىلدارى جوعالىپ كەتەتىن كاسىپتەر بەلگىلى بولدى.
