بايقوڭىردان 28-اقپانعا قاراعان ءتۇنى عارىشتىق جۇك كەمەسى ۇشىرىلادى
استانا. KAZINFORM - «بايقوڭىر» عارىش ايلاعىنان بيىلعى العاشقى ۇشىرىلىم قىستىڭ سوڭعى كۇنى، 2025-جىلدىڭ 28-اقپانىنا جوسپارلانعان. «پروگرەسس م س-30» جۇك تاسىمالداۋ كەمەسى حالىقارالىق عارىش ستانساسىنا (ح ع س) جىبەرىلەدى.
ۇشۋ الدىنداعى دايىندىق جوسپارعا سايكەس ءجۇرىپ جاتىر. ماماندار عارىش كەمەسىنە جانارماي قۇيىپ، ونى «بايقوڭىر» عارىش ايلاعىنىڭ 254-ۋچاسكەسىنىڭ قۇراستىرۋ-سىناۋ كورپۋسىنا جونەلتتى. وندا كەمە ۇشىرىلىم الدىنداعى ديناميكالىق ستەندكە ورنالاستىرىلدى، دەپ حابارلادى روسكوسموستىڭ باسپا ءسوز قىزمەتى.
«پروگرەسس م س-30» كولىكتىك جۇك كەمەسى بار «سويۋز-2.1ا» زىمىران تاسىمالداعىشىن «بايقوڭىر» عارىش ايلاعىنىڭ 31-پلاتفورماسىنان ۇشىرۋ 28-اقپانعا، استانا ۋاقىتىمەن ساعات 02:24 كە جوسپارلانعان.
جىلدىڭ العاشقى ۇشىرىلىمىن قازاقستان مەن رەسەي عارىش اگەنتتىكتەرىنىڭ باسشىلارى باقىلايدى.
دەرەككوزدىڭ حابارلاۋىنشا، عارىش ايلاعىندا قازاقستان رەسپۋبليكاسىنىڭ سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ پەن روسكوسموستىڭ جاڭا باسشىسى دميتري باكانوۆتىڭ جۇمىس كەزدەسۋى جوسپارلانعان.
سونداي-اق بايقوڭىردا ح ع س باعدارلاماسى بويىنشا كەزەكتى ۇشىرۋعا دايىندىق ءجۇرىپ جاتىر. بايقوڭىر عارىش ايلاعىنان «سويۋز م س-27» باسقارىلاتىن عارىش كەمەسى بار «سويۋز-2.1ا» زىمىران تاسىمالداعىشىن ۇشىرۋ 2025-جىلدىڭ ءساۋىر ايىنا جوسپارلانعان. قۇرامىندا روسكوسموس عارىشكەرلەرى سەرگەي رىجيكوۆ پەن الەكسەي زۋبريتسكي جانە NASA استروناۆتى دجوناتان كيم بار 73-ۇزاق مەرزىمدى ەكسپەديتسيا ەكيپاجى ۇشىرۋعا دايىندالىپ جاتىر.
بۇعان دەيىن «بايقوڭىر» عارىش ايلاعىندا «بايتەرەك» عارىشتىق زىمىران كەشەنىن قۇرۋ تۋرالى زاڭ جوباسى ماجىلىسكە ەنگىزىلگەنى تۋرالى حابارلانعان بولاتىن.
ايتا كەتەيىك، 2025-جىلدىڭ 2-ماۋسىمىندا بايقوڭىر عارىش ايلاعى مەن اتتاس قالانىڭ قۇرىلعانىنا 70 جىل تولادى.
ۇكىمەت بايقوڭىر تۇبىندەگى اەرودرومدى قازاقستان مەنشىگىنە الۋدان باس تارتتى.
