بايان جالىن قىزى: چەمپيوندىققا قول جەتكىزۋ وڭاي بولعان جوق

سپورتشى التىن مەدال جەڭىپ العاننان كەيىنگى ويىمەن ءبولىسىپ، چەمپيوندىقتىڭ وڭايلىقپەن كەلمەگەنىن ايتتى.

- ازيا ويىندارىنا العاش رەت قاتىسىپ وتىرمىن. التىن مەدال جەڭىپ العان كەزىمدە وتە قۋانىشتى سەزىمدە بولدىم. شىنى كەرەك، بۇل جەڭىسكە قول جەتكىزۋ وڭايعا سوقپادى. ەكىنشى اينالمادا جوعارى شىققاندا شارشاعانىمدى سەزىندىم. الايدا ىشتەي جەڭىسكە جەتۋىم كەرەك ەكەنىن ويلاپ، مارەگە العاشقى بولىپ جەتۋگە بار كۇشىمدى سالدىم، - دەيدى بايان.

سپورتشى ءوزىن قولداپ جاتقان قازاقستاندىق جانكۇيەرلەرگە راحمەت ايتتى.

- مەنى قولداپ-قولپاشتاپ جاتقاندارىڭىزدى ەستىپ جاتىرمىن. بارلىقتارىڭىزعا راحمەت ايتامىن. سىزدەردىڭ قولداۋلارىڭىزبەن بيىكتەردەن كورىنۋگە تىرىسامىن، - دەدى ول.

سوڭىندا، سپورتشى ءوز باپكەرلەرىنە العىس ءبىلدىرىپ، وليمپيادا ويىندارىنا قاتىسۋدى ماقسات ەتىپ وتىرعانىن ايتتى.

- وسىنداي جەڭىسكە قول جەتكىزۋىمە باپكەرلەرىم مەن كوماندالاستارىم ۇلكەن ۇلەس قوستى دەپ ويلايمىن. ەندىگى كەزەكتە وليمپيادا ويىندارىنا جولداما الىپ، سول جەردە جارىس جولىنا شىعۋدى ارماندايمىن، - دەيدى قانداسىمىز.

ايتا كەتەيىك، قازاق قىزى حاربين قىسقى ازيا ويىندارىندا شاڭعى جارىسىنان ايەلدەر اراسىندا 5 شاقىرىمعا سىرعاناۋدان (ەركىن ستيل) 12 مينۋت 07.5 سەكۋند ناتيجە كورسەتىپ، مارە سىزىعىن ءبىرىنشى بولىپ كەستى.

بايان جالىن قىزى 1999 -جىلى ق ح ر التاي ايماعى جەمەنەي اۋدانىندا دۇنيەگە كەلگەن. ول شاڭعى سپورتى تۇرلەرى بويىنشا قىتاي ۇلتتىق قۇراماسىنا قابىلدانىپ، بەيجىڭ قىسقى وليمپياداسىندا ونەر كورسەتتى.

بۇعان دەيىن حابارلاعانىمىزداي، قىتاي قۇراماسىنىڭ ساپىندا ۇلتى قازاق 4 سپورتشى IX قىسقى ازيا ويىندارىنا قاتىسىپ جاتىر. ولار: اقنار اداق قىزى (كونكيمەن جۇگىرۋ)، قاناعات مۇحامەد ۇلى (كونكيمەن جۇگىرۋ)، بايان جالىن قىزى (شاڭعى) جانە سامعار سەرىك ۇلى (شاڭعى).

اۆتور

مۇحتار قاليموللا ۇلى!

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى