بايان احاتاي: قىز الىپ قاشۋ - توزىعى جەتكەن ءداستۇر
قازاقستان حالقى اسسامبلەياسى «انالار» كەڭەسى ءتوراعاسىنىڭ ورىنباسارى بايان احاتاي قىز الىپ قاشۋ داستۇرىنە قاتىستى پىكىر ءبىلدىردى، دەپ حابارلايدى Kazinform.
«ءداستۇردىڭ وزىعى بار، توزىعى بار. ءبىر كەزدەرى قىز الىپ قاشۋ قابىلداۋعا بولاتىن ءداستۇر بولعان شىعار. قازىر، ءبىزدىڭ زامانىمىزدا «بۇل توزعان ءداستۇر» دەپ ايتار ەدىم. سەبەبى نەكەگە ساۋاتتى، سانالى تۇردە كەلۋ كەرەك. مەكتەپتە دە بالالاردى، جاس وسپىرىمدەردى نەكەگە دايىنداۋ ماسەلەسى بولۋى قاجەت. بۇگىنگى كۇنى اجىراسۋدان دا، ەرتە جۇكتىلىكتەن دە باتىستان وزىپ كەتكەن جاعدايمىز بار. مۇنىڭ سالدارىمەن كۇرەسە بەرمەي، سەبەبىن دە انىقتاۋ قاجەت. ارينە، سالدارىمەن دە كۇرەسكەن ءجون. ءبىراق سەبەبىنە ءۇڭىلىپ، كەلەسى بۋىندا نەكەگە جاۋاپتى قاراۋعا ۇيرەتۋىمىز قاجەت»، - دەدى ول اگەنتتىك تىلشىسىنە بەرگەن سۇحباتىندا.
ونىڭ اتاپ وتۋىنشە، ەگەر ماتەريالدىق جاعدايعا بايلانىستى ەكى جاستىڭ اتا-انالارى ورتاق ۇيعارىمعا كەلسە، ونداي قىز الىپ قاشۋعا بولادى.
وكىنىشكە قاراي وڭتۇستىك وڭىردە كەلىسىمسىز قىز الىپ قاشۋ ءالى دە بارشىلىق. قىزدار ومىرىندە مۇلدەم كورمەگەن ادامعا جار بولىپ جاتقان جاعدايلار بار.
«قىز الىپ قاشۋ كۇتپەگەن نەكە بولعاننان كەيىن ونىڭ سالدارى دا ءارتۇرلى بولىپ جاتادى. قازىر بۇرىنعىداي كونىپ وتىرا بەرەتىن قىزدار جوق»، - دەدى بايان احاتاي.
ايتا كەتەيىك، ەلوردادا ورتالىق ازيا وڭىرىندە ايەلدەر مەن قىزدارعا قاتىستى جاسالاتىن زورلىق-زومبىلىقتىڭ الدىن الۋعا ەر-ازاماتتارى جۇمىلدىرۋ سالاسىنداعى ۇلتتىق الەۋەتتى نىعايتۋعا باعىتتالعان وڭىرلىك سەمينار-ترەنينگ ءوتتى.
