باتىس قازاقستاندا پوليتسياعا كۇش قولدانعاندار جاۋاپقا تارتىلدى
باتىس قازاقستان وبلىسىندا بيلىك وكىلىنە باعىنباي، پوليتسيا قىزمەتكەرىنە كۇش قولدانعاندار جاۋاپقا تارتىلدى، دەپ حابارلايدى قازاقپارات ءتىلشىسى.
ب ق و پوليتسيا دەپارتامەنتى تەرگەۋ باسقارماسىنىڭ ءبولىم باسشىسى، پوليتسيا پودپولكوۆنيگى ەرلان اليەۆتىڭ ايتۋىنشا، كەيبىر ادامدار پوليتسيا قىزمەتكەرلەرىنىڭ بيلىك وكىلى ەكەندىگىن ەسكەرمەي، ولاردىڭ زاڭ اياسىندا تالاپ ەتكەندەرىنە باعىنباي، ەلەمەۋشىلىك تانىتادى.
ەرلان تالاپقالي ۇلىنىڭ سوزىنە قاراعاندا، بيلىك وكىلىنە باعىنباعاندار ق ر قىلمىستىق كودەكسىنىڭ 379-بابىنا سايكەس اسا ءىرى كولەمدەگى ايىپپۇل تولەۋدەن باستاپ ەكى جىلعا دەيىنگى مەرزىمگە باس بوستاندىعىنان ايىرۋ جازاسىنا تارتىلادى.
سونىمەن قاتار بيلىك وكىلىنە قاتىستى قورقىتۋ نەمەسە كۇش كورسەتۋ دە جازاسىز قالمايدى. وسىعان قاتىستى جىل باسىنان بەرى ق ر ق ك 380-بابىنا سايكەس 14 دەرەك تىركەلىپ، سونىڭ ىشىندە قىلمىس قۇرامىنىڭ بولماۋىنا بايلانىستى 2 ءىس قىسقارتىلىپ، جەتەۋى سوتقا جولداندى. بۇل باپقا سايكەس ايىپتى دەپ تانىلعاندار (بيلىك وكىلىنىڭ ءوز قىزمەتتىك مىندەتتەرىن اتقارۋىنا بايلانىستى ودان كەك الۋ ماقساتىندا وعان نەمەسە جاقىندارىنا قاتىستى ولتىرۋمەن، دەنساۋلىققا زيان كەلتىرۋمەن، مۇلكىن بۇلدىرۋمەن نەمەسە جويۋمەن قورقىتۋ) ەكى مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە التى ءجۇز ساعاتقا دەيىنگى مەرزىمگە قوعامدىق جۇمىستارعا تارتۋعا نە ەكى جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا دەيىن جاۋاپقا تارتىلادى.
سول سەكىلدى ق ر ق ك 378-بابىنا سايكەس بيلىك وكىلىن ءوز قىزمەتتىك مىندەتتەرىن اتقارۋ كەزىندە نەمەسە ولاردى اتقارۋىنا بايلانىستى قورلاۋعا بارعاندار سەكسەن ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە سەكسەن ساعاتقا دەيىنگى مەرزىمگە قوعامدىق جۇمىستارعا تارتۋعا نە جيىرما تاۋلىككە دەيىنگى مەرزىمگە قاماققا الۋعا جازالانادى. بۇل باپ بويىنشا 23 ءىس تىركەلىپ، سونىڭ جەتەۋى سوتقا جولداندى. 3 قىلمىستىق ءىس وندىرىسپەن قىسقارتىلدى.
ە. اليەۆ زاڭ جۇزىندە تارتىپكە باعىنباعان ادامدارعا قاتىستى سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە تىركەلگەن دەرەكتەردىڭ ءبىرقاتارىنا توقتالدى.
مىسالى، سوت شەشىمى شىققان وقيعانىڭ ءبىرى بيىلعى 4-ناۋرىز كۇنى تۇنگى ساعات 04.00-دە بولدى. ورال قالاسىنداعى ە. برۋسيلوۆسكي كوشەسىندە ورال قالاسى پوليتسيا باسقارماسى شاعان پوليتسيا ءبولىمى جەرگىلىكتى پوليتسيا قىزمەتىنىڭ ۋچاسكەلىك پوليتسيا ينسپەكتورى، پوليتسيا لەيتەنانتى مەن ونىڭ كومەكشىسى قولىنا ىشىمدىك ۇستاپ، شايقالىپ بارا جاتقان ادامدى كورىپ، زاڭ ءتارتىبىن تۇسىندىرە باستايدى.
الايدا الگى تۇرعىن ءتارتىپ ساقشىلارىن ەلەمەي، بالاعاتتاپ، سۇراق- جاۋاپ الۋ كەزىندە پوليتسيا قىزمەتكەرىنىڭ ار- نامىسان تيەتىن اۋىر سوزدەر ايتقان. كەيىن وسى ارەكەتى ءۇشىن زاچاگان كەنتىنىڭ 1987 -جىلعى تۇرعىنى ق ر ق ك 378-بابى 1-بولىگى (بيلىك وكىلىن ءوز قىزمەتتىك مىندەتتەرىن اتقارۋ كەزىندە نەمەسە ولاردى اتقارۋىنا بايلانىستى قورلاۋ) جانە 380-بابى 3-بولىگىنە (بيلىك وكىلىنە قاتىستى قورقىتۋ نەمەسە كۇش كورسەتۋ ارەكەتتەرى) سايكەس زاڭ الدىندا جاۋاپ بەردى.
تاعى ءبىر دەرەك، ورال قالاسى پوليتسيا باسقارماسىنىڭ قىزمەتكەرى، پوليتسيا كىشى سەرجانتى ورتالىق بازاردا جاياۋ پاترۋلدەۋ كەزىندە بەلگىسىز بىرەۋدىڭ ءوز اۆتوكولىگىن كولىك تۇراعىنداعى ارنايى مۇگەدەك بەلگىسى كورسەتىلگەن تىيىم سالىنعان جەرگە قويعانىن كورگەن. سوعان سايكەس ق ر اكىمشىلىك قۇقىقبۇزۋشىلىق كودەكسى 597-بابى 4-بولىگىنە سايكەس حاتتاما تولتىرۋ ءۇشىن كولىك قۇجاتتارىن سۇراعاندا، الگى ادام كەلىسپەي، ءتارتىپ ساقشىسىنا قارسىلىق تانىتقان. ءبىراق تولتىرىلعان حاتتاماعا نارازىلىق بىلدىرگەن ول پوليتسيا قىزمەتكەرىنىڭ تالاپتارىنا باعىنباي، بالاعات سوزدەر ايتىپ، قوقان- لوققى كورسەتكەن. ءتىپتى قىزمەتتىك مىندەتىن اتقارۋ بارىسىندا جۇرگەن ءتارتىپ ساقشىسىنا قارسى كۇش قولدانىپ، دەنە جاراقاتىن كەلتىرگەن. ناتيجەسىندە پوليتسيا قىزمەتكەرىنە قارسى كۇش قولدانعانى ءۇشىن قاجەتتى ماتەريالدار مەن انىقتامالار جيناقتالىپ، ءىس سوتقا جولداندى.
وسىعان ۇقساس وقيعا 4-تامىز كۇنى تىركەلدى. كەزەكشى بولىمگە ورال قالاسىندا جامبىل كوشەسى بويىنداعى ۇيلەردىڭ ءبىرىنىڭ اۋلاسىندا بىرنەشە ادامنىڭ ىشىمدىك ءىشىپ، جانجالداسىپ جاتقانى تۋرالى حابار تۇسكەن. وقيعا ورنىنا كەلىپ جەتكەن پوليتسيا قىزمەتكەرلەرى قۇقىق بۇزۋشىلارعا زاڭ تالاپتارىن تۇسىندىرە وتىرىپ، تۇنگى ۋاقىتتا ىشىمدىك ءىشىپ، بۇزاقىلىققا بارعاندارعا قاتىستى قر اكىمشىلىك قۇقىقبۇزۋشىلىق كودەكسىنىڭ 440 جانە 437-بابى بويىنشا اكىمشىلىك حاتتاما تولتىراتىندارىن ايتادى. الايدا بۇعان كەلىسپەگەن قۇقىق بۇزۋشىلار ءتارتىپ ساقشىلارىن بالاعاتتاپ، قارسى شىعىپ، ولارعا دەنە جاراقاتتارىن كەلتىرگەن. اقىرى قر قك 378-بابى (بيلىك وكىلىن قورلاۋ)، 379-بابى (بيلىك وكىلىنىڭ زاڭدى تالابىنا نەمەسە وكىمىنە باعىنباۋ) جانە 380-بابىنا (بيلىك وكىلىنە قاتىستى كۇش قولدانۋ) سايكەس ب. ەسىمدى ازامات قىلمىستىق جاۋاپكەرشىلىككە تارتىلدى.
«قۇقىقتىق ءتارتىپتى ساقتاۋ ءار ادامنىڭ جەكە باسىنىڭ جاۋاپكەرشىلىگىنە، قۇقىقتىق ساۋاتتىلىعىنا بايلانىستى. ءتارتىپ ساقشىلارىنا قاتىستى قۇقىققا قايشى ءىس-ارەكەتتەرگە جول بەرگەن كىسى كىم بولسا دا، اكىمشىلىك نەمەسە قىلمىستىق جاۋاپكەرشىلىككە تارتىلاتىنىن ەسكەرگەندەرى ءجون»، - دەپ تۇيىندەدى ءسوزىن ە. اليەۆ.
