باتىس قازاقستاندا تۇرۋعا جارامسىز دەپ تانىلعان 400 گە جۋىق ءۇي قايتا سالىنادى
ورال. KAZINFORM - باتىس قازاقستان وبلىسىندا سۋ تاسقىنى باستالعاننان بەرى 1292 تۇرعىن ۇيگە زيان كەلتىرىلدى.
ب ق و اكىمىنىڭ ورىنباسارى تىلەپبەرگەن كايۋپوۆتىڭ ءمالىم ەتكەنىندەي، سونىڭ 116 سى - قاراتوبە، 243 ءى - سىرىم، 218 ءى - ءبورلى، 649 ى - تەرەكتى، 43 ءى - بايتەرەك، التاۋى - تاسقالا اۋدانىندا، 17 ءسى ورال قالاسىندا ورنالاسقان.
تىلەپبەرگەن ەرساي ۇلىنىڭ سوزىنە قاراعاندا، 1150 ءۇي بويىنشا تەحنيكالىق تەكسەرىس جۇرگىزىلدى. سونىڭ ىشىندە 397 ءسى (قاراتوبە – 98، سىرىم – 114، تەرەكتى – 60، بايتەرەك – 4، ءبورلى - 121) تۇرۋعا جارامسىز دەپ تانىلدى.
«كۇنى بۇگىن اتالعان اۋدانداردا جارامسىز دەپ تانىلعان تۇرعىن ۇيلەردى قالپىنا كەلتىرۋ بويىنشا جۇمىستار باستالدى. اتاپ ايتقاندا، سالىناتىن جاڭا تۇرعىن ۇيلەردىڭ جەر ۋچاسكەلەرى انىقتالىپ، گەولوگيا جانە توپو-ءتۇسىرىلىم جۇمىستارى جۇرگىزىلۋدە. قۇرىلىس جۇمىستارىن جۇرگىزۋگە جەرگىلىكتى كومپانيالاردىڭ ءتىزىمى انىقتالىپ، دايىندىق جۇمىستارى باستالدى. تۇرعىن ۇيلەر «قازاقستان حالقىنا» قوعامدىق قورىنىڭ، وڭىرىمىزدەگى ءىرى كاسىپورىنداردىڭ («قپو ب. ۆ.»، «جايىقمۇناي»، «ورالويلەند گاز»، «كوندەنسات») جانە وزگە دە ۇيىمداردىڭ قاراجاتى ەسەبىنەن سالىنادى»، - دەدى ت. كايۋپوۆ.
بۇدان بولەك، زارداپ شەككەندەرگە 100 ايلىق ەسەپ كورسەتكىش مولشەرىندە ءبىرجولعى الەۋمەتتىك كومەك (369,2 مىڭ تەڭگە) كورسەتىلۋدە. قازىرگى تاڭدا 1490 وتباسى 547,3 ميلليون تەڭگەگە الەۋمەتتىك كومەك الدى.
تاعى ءبىر ماسەلە، سۋ تاسقىنى سالدارىنان 2343 باس مال شىعىنعا ۇشىراسا، سونىڭ 341 ءى - ءىرى قارا، 63 ءى - جىلقى، 1742 ءسى - قوي-ەشكى، 116 سى - شوشقا، 81 ءى - ءۇي قۇستارى. شىعىنداردى وتەۋ جۇمىستارى باستالىپ، بۇعان وبلىستىق بيۋدجەتتىڭ رەزەرۆىنەن 187,5 ميلليون تەڭگە ءبولىندى.
«سول سەكىلدى شاعىن جانە ورتا بيزنەس سۋبەكتىلەرىنە كەلتىرىلگەن زيان 2024-جىلى سۋ تاسقىنى سالدارىنان كەلتىرىلگەن مۇلىكتىك نۇقساندى وتەۋ قاعيدالارىنا سايكەس وتەلەدى. اتالعان ەرەجە جوباسى اشىق ن ق ا- لەر پورتالىندا تالقىلاۋدا تۇر. بيزنەسكە كەلتىرىلگەن شىعىنداردى انىقتاۋ ارنايى قۇرىلاتىن كوميسسيامەن اتقارىلاتىن بولادى»، - دەدى ت. كايۋپوۆ.
وبلىس بويىنشا 39 كاسىپكەرلىك سۋبەكتىسى، 20 وسىمدىك، 18 مال شارۋاشىلىعى نىسانىنا (بايتەرەك – 18، تەرەكتى – 34، تاسقالا – 1، سىرىم – 4، قاراتوبە – 8، ءبورلى – 7، ورال قالاسى - 5) زالال كەلتىرىلگەن.
ەسكە سالا كەتەيىك، بۇدان بۇرىن جايىق وزەنىندەگى سۋ دەڭگەيى ورال قالاسى تۇسىندا 864 سانتيمەتردى كورسەتكەنىن جازعان بولاتىنبىز.
ورالدا ساياجايدان قۇتقارىلعان يتتەر قايدا ورنالاستىرىلدى.
