باتىس قازاقستاندا قاراسان اۋرۋىنا قارسى ءدارى ەگىلگەن مالدار ءولىپ جاتىر

ءبورلى اۋدانى شارۋا قوجالىقتارى قاۋىمداستىعىنىڭ ءتوراعاسى باقىت دالابايەۆتىڭ ايتۋىنشا، مال قاراسانعا ۇقساس بەلگىلەرمەن ولۋدە.

ونىڭ سوزىنە قاراعاندا، مۇنداي جاعداي تەك وسى ءبورلى عانا ەمەس، وبلىستىڭ باسقا دا اۋداندارىندا، ءتىپتى رەسپۋبليكادا كەزدەسىپ وتىر.

فەرمەرلەر بەلگىسىز ىندەتتەن ءجۇز شاقتى مالدىڭ قىرىلعانىن ايتادى. اۋرۋ مال الدىمەن اقساڭداپ، كەلەسى كۇنى ىسىك پايدا بولىپ، قۇلايدى.

«مۇنىڭ ءبارى مالمەن كۇن كورىپ وتىرعان اۋىل تۇرعىندارىنا قيىن تيۋدە. مال شىعىنىن وتەۋ قاجەت دەپ ەسەپتەيمىن. سونىمەن قاتار اۋرۋ مال ەتىنىڭ بازارلارعا شىعىپ كەتپەسىنە كىم كەپىلدىك بەرەدى؟ وسى ورايدا ۆەتەرينار ماماندار شىندىقتى ايتۋى ءتيىس»، - دەيدى ب. دالابايەۆ.

ب ق و ۆەتەريناريا باسقارماسىنان تۇسكەن اقپاراتقا قاراعاندا، ءبورلى اۋدانىندا بارلىعى 13 باس ءىرى قارا ءتولى شىعىنعا ۇشىراعان.

بيىلعى 4 - قىركۇيەكتە ءبورلى اۋدانى قاراقۇدىق اۋىلدىق وكرۋگىنە قاراستى «رۋسلان» شارۋا قوجالىعىندا 7 باس ءىرى قارا مالى ءتولىنىڭ ءولىمى تىركەلگەن. سول كۇنى ۆەتەرينار ماماندار ولگەن 3 باس مالدان ماتەريال الىپ، ول قاراسان اۋرۋى دەگەن كۇدىكپەن وبلىستىق ۆەتەريناريالىق زەرتحاناعا جولداندى. الايدا زەرتتەۋ قورىتىندىسى بويىنشا دياگنوز راستالمادى.

باسقارمادان ءمالىم ەتكەنىندەي، سونداي- اق قاراعاندى اۋىلدىق وكرۋگى تۇرعىندارىنىڭ 7 باس ءىرى قارا ءتولى اۋىرىپ، سونىڭ التاۋى ءولىپ، بىرەۋى جازىلدى. ولگەن مالداردان پاتولوگيالىق ماتەريال الىنىپ، قاراسان اۋرۋىنا دەگەن كۇدىكپەن وبلىستىق ۆەتەريناريالىق زەرتحاناعا 31- قازاندا جانە 3- قاراشادا جىبەرىلدى. زەرتتەۋ قورىتىندىسى كۇتىلۋدە.

«مال ءولىمىنىڭ تىركەلۋىنە بايلانىستى وبلىستىق ۆەتەريناريالىق ينسپەكتسيا جانە ۆەتەريناريا باسقارماسىنىڭ باسشىلارى ءبورلى اۋدانىنا بارىپ، اۋىل شارۋاشىلىعى جانۋارلارىن قارادى. تۇرعىندارمەن كەزدەسىپ، ءتۇسىندىرۋ جۇمىستارىن جۇرگىزدى. ءبورلى اۋدانى اۋماعىندا 3 ايلىق بۇزاۋدان باستاپ 4 جاسقا دەيىنگى ءىرى قارا مالدارى قاراسان اۋرۋىنا قارسى ەگىلگەن. ەگۋ جۇمىستارىنا «انتيگەن» عىلىمي- وندىرىستىك كاسىپورنى شىعارعان بيوپرەپارات قولدانىلۋدا. وسى پرەپاراتتىڭ تيىمدىلىگىن زەرتتەۋ ءۇشىن ۆەتەريناريالىق ينسپەكتسيا ماماندارىمەن قولدانىستاعى ۆاكسينا الىنىپ، ۆەتەريناريالىق ۇلتتىق رەفەرەنتتىك ورتالىققا جولدانۋدا. ەپيزووتيالىق احۋال تولىقتاي ۆەتەرينار ماماندارىمىزدىڭ ءجىتى باقىلاۋىندا. اۋىل تۇرعىندارى مالدا اۋرۋ بەلگىلەرى پايدا بولعاندا نەمەسە ولگەن جاعدايدا دەرەۋ ۆەتەريناريالىق قىزمەتكە حابارلاۋى كەرەك» دەپ حابارلادى ۆەدومستۆودان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى