باتىس قازاقستاندا كوكجوتەلمەن اۋىرعاندار سانى 4,3 ەسەگە كوبەيدى
ورال. KAZINFORM — باتىس قازاقستان وبلىسىندا وتكەن جىلى ءبىرقاتار جۇقپالى دەرتكە شالدىققاندار سانى وسكەنى تىركەلدى.
ب ق و سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستايەۆتىڭ ءمالىم ەتكەنىندەي، قىزىلشامەن 1302 ادام اۋىرىپ، الدىڭعى جىلعىدان (477) 2,7 ەسەگە اسىپ ءتۇستى.
نۇرلىبەك ەرمەك ۇلىنىڭ سوزىنە قاراعاندا، سىرقاتتانعانداردىڭ 822 ءسى نەمەسە 63,1 پايىزى - 14 جاسقا دەيىنگى بالالار، 164 ءى نەمەسە 12,5 پايىزى - 1 جاسقا دەيىنگى سابيلەر. 796 سى نەمەسە 61,1 پايىزى - ەكپە سالدىرماعاندار.
- سول سەكىلدى كوكجوتەلگە شالدىققاندار 52 گە جەتىپ، 2023-جىلعىدان (12) 4,3 ەسەگە كوبەيىپ كەتتى. مۇنىڭ 51 ءى - 14 جاسقا دەيىنگىلەر، بىرەۋى - ەرەسەك ادام. بالالاردىڭ 48 ءى نەمەسە 92,3 پايىزى ەكپە الماعان. دەگەنمەن بيىلعى قاڭتاردا اۋرۋشاڭدىقتىڭ تومەندەگەنى بايقالادى. قىزىلشامەن 2، كوكجوتەلمەن 3 ادامنىڭ ناۋقاستانعانى تىركەلدى، - دەيدى ن. مۇستايەۆ.
ونىڭ ايتۋىنشا، 2024-جىلى سونداي-اق ەپيدەميالىق پاروتيتپەن 3 (2023-جىلى - 0)، مەنينگوكوكك جۇقپاسىمەن 3 (2023-جىلى - 1) ادام اۋىرعان.
- جالپى، وبلىستا سانيتاريالىق- ەپيدەميولوگيالىق احۋال تۇراقتى. توپتىق اۋرۋشاڭدىق دەرەكتەرى بولعان جوق. تىرىسقاق، قۇتىرۋ، وبا، ءىش سۇزەگى، قىزامىق، ديفتەريا، پوليوميەليت، سىرەسپە، بەزگەك جانە بوتۋليزم جاعدايلارى تىركەلمەدى. وڭىردە وتكەن جىلى 15 جۇقپالى اۋرۋمەن سىرقاتتانعاندار سانى ازايدى، - دەدى ن. مۇستايەۆ.
ەسكە سالا كەتەيىك، بۇدان بۇرىن ب ق و- دا اۋرۋ تاراتاتىن تىشقان ءتارىزدى كەمىرگىشتەر سانى 10 ەسە وسكەنىن جازعان بولاتىنبىز.
