باسقا ەلدەرگە ۇلگى – د د س ۇ قازاقستاندا جاستارعا ەنەرگەتيك ساتۋعا تىيىم سالۋ تۋرالى
استانا. KAZINFORM - قازاقستان 21 جاسقا تولماعان ادامدارعا ەنەرگەتيكالىق سۋسىنداردى ساتۋعا تىيىم سالىپ، ولاردىڭ دەنساۋلىعىن قورعاۋ ءۇشىن باتىل قادام جاسادى. بۇل تۋرالى دۇنيەجۇزىلىك دەنساۋلىق ساقتاۋ ۇيىمى (د د س ۇ) ءمالىم ەتتى.
2025-جىلدىڭ قاڭتارىندا كۇشىنە ەنگەن جاڭا زاڭ بالالار مەن جاس وسپىرىمدەر اراسىندا قانت قوسىلعان سۋسىنداردى تۇتىنۋدى ازايتۋعا باعىتتالعان.
ۇيىمنىڭ باسپا ءسوز قىزمەتى اتاپ وتكەندەي، بۇل ولاردى بولاشاقتا سەمىزدىك، قانت ديابەتى، جۇرەك-قانتامىر اۋرۋلارى، سونداي-اق ستوماتولوگيالىق اۋرۋلار سياقتى كوپتەگەن جۇقپالى ەمەس دەرتتەن ساقتايدى.
- جاڭا زاڭ – د د س ۇ ۇسىنىستارىنا سايكەس جاستار اراسىندا قانت تۇتىنۋدى ازايتۋعا جانە حالىقتىڭ دەنساۋلىعىن قورعاۋعا باعىتتالعان كوپتەن كۇتكەن قادام. ەنەرگەتيكالىق سۋسىندارعا قولجەتىمدىلىكتى شەكتەي وتىرىپ، قازاقستان دەنساۋلىقتى بىردەن بىرنەشە دەڭگەيدە جاقسارتادى. ەڭ اۋەلى ۇزاق مەرزىمدى اسقىنۋلارمەن بايلانىستى بالالار مەن جاس وسپىرىمدەر سەمىزدىگىمەن كۇرەسەدى. سونىمەن قاتار جۇقپالى ەمەس اۋرۋلاردىڭ، اتاپ ايتقاندا قانت ديابەتىنەن جۇرەك-قانتامىر اۋرۋلارىنا دەيىنگى دەرتتەرىنە شالدىعۋ قاتەرىن تومەندەتەدى، - دەپ اتاپ ءوتتى د د س ۇ- نىڭ قازاقستانداعى وكىلى دارىگەر سكەندەر سىلا.
د د س ۇ/ەۋروپا تاماقتانۋ، دەنە بەلسەندىلىگى جانە سەمىزدىك ماسەلەلەرى جونىندەگى وڭىرلىك كەڭەسشىسى دارىگەر كرەملين ۆيكراماسينگحە قازاقستاننىڭ ەنەرگەتيكالىق سۋسىنداردىڭ زياندىلىعىمەن كۇرەستە قولعا العان شەشۋشى شارالارى باسقا ەلدەر ءۇشىن ۇلگى بولاتىنىن اتاپ ءوتتى.
- قازاقستاننىڭ قوعامدىق دەنساۋلىق ساقتاۋدا ەنەرگەتيكالىق سۋسىندار مەن قۇرامىندا قانتى بار سۋسىندارعا قاتىستى ماسەلەسىن شەشۋگە دەگەن ۇمتىلىسى – د د س ۇ ەۋروپالىق ايماعىنىڭ باسقا ەلدەرى ءۇشىن ۇلگى. قازاقستان بەرىك ساياسي ەرىك-جىگەردىڭ، ساياساتتى ناقتى دەرەكتەر نەگىزىندە ازىرلەۋدىڭ جانە حالىقارالىق ۇيىمدارمەن ىنتىماقتاستىعىنىڭ ارقاسىندا دەنساۋلىق ساقتاۋ سالاسىندا ايتارلىقتاي پروگرەسكە قول جەتكىزۋگە بولاتىنىن كورسەتتى، - دەدى ول.
د د س ۇ اتاپ وتكەندەي، قازاقستان وسىنداي باتىل ءىس-ارەكەتكە كوشە وتىرىپ، قوعامدىق دەنساۋلىق كوممەرتسيالىق مۇددەلەردەن ماڭىزدىراق ەكەنىن ايعاقتاپ وتىر. سونداي-اق جان-جاقتى ويلاستىرىلعان ساياساتى مەن بىرلەسكەن كۇش-جىگەرىنىڭ ارقاسىندا دەنى ساۋ بولاشاققا ابدەن قول جەتكىزۋگە بولاتىنىن انىق كورسەتەدى.
ەسكە سالا كەتەيىك، ءماجىلىس جاستارعا ەنەرگەتيكالىق سۋسىندار ساتۋعا تىيىم سالۋ تۋرالى زاڭدى بىلتىر قابىلدادى.
بۇدان بولەك، جاس ءوسپىرىم اپپاراتتان ەنەرگەتيكالىق سۋسىن ساتىپ السا، جاۋاپكەرشىلىك كىمگە جۇكتەلەتىنى انىقتالدى.
سونداي-اق، دارىگەر ەنەرگەتيكالىق سۋسىنعا تاۋەلدىلىكتەن قالاي قۇتىلۋعا بولاتىنىن ايتىپ بەردى.
