باسشىسى 92 دە، ەڭ جاس قىزمەتكەرى 76 دا - مينيستر فەسەنكوۆ ينستيتۋتىنداعى داۋعا پىكىر ءبىلدىردى
استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ماجىلىستەگى باسپا ءسوز ءماسليحاتىندا الماتىداعى ۆ. گ. فەسەنكوۆ اتىنداعى استروفيزيكا ينستيتۋتىنىڭ اي مەن پلانەتالار فيزيكاسى زەرتحاناسىنىڭ اينالاسىنداعى داۋعا پىكىر ءبىلدىردى.
- ۆ. گ. فەسەنكوۆ اتىنداعى ينستيتۋت نەگىزى سيفرلىق دامۋ مينيسترلىگىنىڭ قۇزىرەتىندە. ءبىراق عىلىم ساياساتىن ءبىزدىڭ مينيسترلىك ايقىندايتىن بولعاندىقتان مەكەمە ماماندارىمەن سويلەسىپ، ۋاجدەرىن تىڭدادىق. بىرىنشىدەن، زەرتحانا جابىلمايدى. سونداي اقپارات تاراعان ەدى. سول فەسەنكوۆ اتىنداعى ينستيتۋت جانىنان 1974 -جىلى اشىلعان ءبىر زەرتحانا بار. سول ينستيتۋتتىڭ باسشىسى بيىل 93-كە تولادى. ەڭ جاس دەگەن عىلىمي قىزمەتكەر 76 جاستا، - دەدى ول.
ءمينيستردىڭ سوزىنشە، اتالعان زەرتحانا سوڭعى 20 جىلدا ءبىر دە ءبىر ۇلكەن جوباعا قاتىسپاعان.
- گرانتتىق جوبالارعا ءۇش رەت قۇجات تاپسىرىپ، وتە الماعان. 2018 -جىلدان بەرى ءبىر دە ءبىر عىلىمي باسىلىمعا ماقالا شىعارماعان. ءبىزدىڭ دە نىسانالىق باعدارلامالارعا قاتىسپاعان. سوندىقتان دۇرىس تۇسىنۋلەرىڭىزدى وتىنەمىز. اسىرەسە عىلىم سالاسىندا جاستارعا دا جول بەرۋىمىز كەرەك. قازىر ەلدەگى عالىمداردىڭ ىشىندەگى جاستاردىڭ ۇلەسى 46 پايىزعا جەتىپ وتىر، - دەدى ۆەدومستۆو باسشىسى.
ەسكە سالساق، وتكەن اپتادا الماتىدا بىرنەشە عىلىمي قىزمەتكەردىڭ جۇمىستان ادىلەتسىز شىعارىلعانى تۋرالى اقپارات تاراعان بولاتىن.
اۆتور
ەسىمجان ناقتىباي
