باسپالداقتاعى كەپتەلىس: الماتىدا مەكتەپ ديرەكتورى قىزمەتىنەن بوساتىلدى
الماتى. KAZINFORM - الماتىداعى مەكتەپتەردىڭ بىرىندە وقۋشى سانىنىڭ كوپتىگىنەن بالالاردىڭ ەمىن-ەركىن وتە الماي، باسپالداقتا كەپتەلىپ تۇرعان ۆيدەوسى تارادى.
بەينەجازبادان بالالاردىڭ باسپالداقپەن تومەن تۇسە الماي جاتقانىن كورۋگە بولادى.
الماتى قالالىق ءبىلىم باسقارماسىنىڭ مالىمەتىنشە، بۇل جاعداي №41 مەكتەپتە بولعان.
«وسى جىلدىڭ 27-اقپانىندا ەكىنشى اۋىسىمنان كەيىن ءبىرىنشى قاباتتا ورنالاسقان مەكتەپتىڭ كيىم اۋىستىراتىن بولمەسىندە وقۋشىلار كوپ جينالدى. مۇنىڭ سەبەبى - وسى كۇنى وقۋشىلاردىڭ كيىنۋ پروتسەسىنىڭ دۇرىس ۇيىمداستىرىلماۋى. بۇرىن بۇل مەكتەپتە مۇنداي جاعداي بولماعان. مەكتەپ اكىمشىلىگىنىڭ مالىمەتىنشە، زارداپ شەككەندەر جوق»، - دەپ حابارلادى باسقارمادان.
وقۋ پروتسەسىن ۇيىمداستىرۋدا باقىلاۋدى السىرەتكەنى ءۇشىن مەكتەپ ديرەكتورى قىزمەتىنەن بوساتىلدى.
«№41 مەكتەپتە ەكى اۋىسىمدا 1426 وقۋشى وقيدى، جوبالىق قۋاتى 870 ورىن. وسى پروبلەماسىن شەشۋ ءۇشىن 2023 -جىلى سامعاۋ شاعىن اۋدانىندا 2000 ورىندىق جايلى مەكتەپتىڭ قۇرىلىسى باستالدى»، - دەپ اتاپ ءوتتى ءبىلىم باسقارماسىنان.
اۆتور
الما مۇقانوۆا
