باس پروكۋراتۋرا جەتكىنشەكتەردىڭ توپتاسىپ توبەلەسۋى بەلەڭ العانىنا الاڭداۋلى
باس پروكۋرور بەرىك اسىلوۆ وتباسىلىق- تۇرمىستىق زورلىق- زومبىلىق پروفيلاكتيكاسى مەن قوعامدىق ورىنداردا قۇقىق بۇزۋشىلىقتىڭ الدىن الۋ ماسەلەلەرى جونىندەگى ۇيلەستىرۋ كەڭەسىنىڭ وتىرىسىندا جاسوسپىرىمدەر اراسىندا توپتاسىپ توبەلەسۋ بەلەڭ العانىنا الاڭدايتىنىن ايتتى، دەپ حابارلايدى Kazinform.
«كەيىنگى كەزدە جەتكىنشەكتەردىڭ تۇندە توپتاسىپ توبەلەسۋ فاكتىلەرى جيىلەپ كەتتى. وتكەن ايدا اقتاۋ قالاسىندا 19 وقۋشى مەن ستۋدەنت توبەلەستى. شىمكەنت قالاسى مەن تۇركىستان وبلىسىندا 15 وقۋشىنىڭ توبەلەسى ەكى ادامنىڭ ولىمىمەن اياقتالدى. ارينە، ونىڭ باستى سەبەبى - اتا- انا تاراپىنان قاجەتتى باقىلاۋدىڭ بولماۋى. بيىل تۇنگى ۋاقىتتا كوشەدە جۇرگەنى ءۇشىن كامەلەتكە تولماعان 86 مىڭ ادام اكىمشىلىك جاۋاپكەرشىلىككە تارتىلدى»، - دەدى باس پروكۋرور.
ۆەدومستۆو باسشىسىنىڭ مالىمەتىنشە، اقتاۋدا جاسوسپىرىمدەر توبەلەسكە 4 كۇن بويى دايىندالعان.
«پوليسيا بالالار اراسىنداعى شىنايى جاعدايدى ءجوندى بىلمەيدى. ال ءبىلىم بەرۋ ورىندارىندا تاۋەكەل ايماعىنداعى وقۋشىلاردى انىقتاۋ جۇمىسى دۇرىس جولعا قويىلماعان»، - دەدى بەرىك اسىلوۆ.
